LINO paapisile imyezi iili ukufuma pano aina Izlaeli yaafumiile umu Eguputo, iizile yafika uku mwamba wa Sinai, uno yaamanga nu kuti Holebu. Ku mwamba uu ali kuno Yeova wavwanzizye Mose pa cimpuza icakaanga icimbilimbili. Lyene paa ali pano aina izlaeli iizile iikala pa nsita inoono.

Mose wizile akwela umwamba, nayo aina Izlaeli iyasyala yakumuloleela umwisika. Lino Mose wali pa mwamba, Yeova wamuneenyile ukuti walondanga aina Izlaeli yamuvwila nu kuti yaye antu yakwe yano watemwisya. Lyene Mose aiza atentemuka umwamba nu kwizaneena aina izlaeli vyonsi vino Yeova wamuneenyile. Nayo antu iyazumila yati yalaauvwila Yeova, pano yalondanga ukuti yaye antu yakwe aiyele.

Lyene Yeova acita icintu cimwi ica kuzungusya. Pa mwamba papela ipiza paloleka icunsi sana, alino ipapangalakasya sana inkuwa. Nga alino aizaneena antu ati: ‘Nene Yeova Leza winu uwamufumizye umu Eguputo.’ Aiza peela ni sunde ati: ‘Mutafwile ukupepa tu leza tuuze, suka sile neene, casila.’

Lyene Leza apeela aina Izlaeli amasunde nayauze 9. Antu yuvwile sana intete. Lyene iyaneena Mose yati: ‘Wewe uwatuneena vino Leza walanda pano tukoopa ukuti ndi twavwanga na Leza, tungafwa.’

Lino paapisile insita, Yeova waneenyile Mose ati: ‘Uwize apa mwamba. Indi nu kukupeela amawe yaili aapapatane yano naleembapo amasunde yano aina Izlaeli yafwile ukuvwila.’ Lyene Mose aswilila apa mwamba. Aya ikala penepo amanda 40 musanya nu usiku.

Leza wapeezile aina Izlaeli amasunde aingi cuze. Mose walemvile amasunde kwene yaayo. Nupya Leza wapeezile Mose amawe yaili aapapatane. Pa mawe kwene yaayo Leza walemvilepo amasunde 10 yaaya kwene yano walanzile lino wavwanzyanga aina Izlaeli. Masunde kwene yaayo yakaayama yakuti Amasunde Ikumi (10).

Masunde ikumi, a masunde acindame sana. Nomba, na masunde yauze yano Leza wapeezile aina Izlaeli nayo yaali acindame sana. Isunde lyonga pa masunde kwene yaa likati: ‘Uwatemwa Yeova Leza wako nu mwenzo wako onsi, na mano yako yonsi, nu umi wako onsi, alino na maka yako yonsi.’ Lyuze nalyo likati: ‘Uwatemwa antu yauzo vino waitemwa.’ Yesu Klistu Umwana wakwe Leza, walanzile ukuti yaa ali masunde yaili acila amasunde yonsi pali yano Yeova wapeezile aina Izlaeli. Uku nkoleelo, tulasambilila ivingi pali Yesu na vino wasambilizyanga.