IMYAKA 10 yapisilepo, na 20 ipita, na 30 ipita, na 39 kwene iiza-ipita! Ala aina Izlaeli yacili umu lwanga. Nomba, Yeova watwalilile ukusakamala aina Izlaeli pa myaka yonsi kwene ii. Wayapeelanga maana. Wayatungululanga ukuomvya ikumbi umusanya, nupya usiku wayatungululanga ukuomvya umoto. Alino apa myaka yonsi kwene ii, ivizwalo vyao vitaasilanga nupya yataapyanga ni vilonda uku ngazo.

Lyene alino yatandika sile umwaka wakwe 40 ukufuma pano yaafumiile uku Eguputo. Aina Izlaeli nupya yaatazile iikala apa Kadesyi. Paa, ali pano yaali lino inengu 12 zyaiile uku kulengula impanga ya Kenani apiipi ni myaka 40 iyapitapo. Milyamu nyinalenzi wakwe Mose wizile-afwila apa Kadesyi. Pantu kwene paa napo pizile paya intazi sana.

Pataali amanzi. Acino antu yaatandike ukuilizyanya kuli Mose iyati: ‘Nga cazifile itufwila sile limwi. I cani cino watufumiziizye umu mpanga ya Eguputo ukutuleeta kuno ukusyamela nanti kamwi? Kutaya ivilimwa, imyangazi nanti ama pomegeleneti. Kutaaya nanti amanzi yakumwa.’

Lino Mose na Aloni yaaile umwitenti lya kupepelamo uku kupepa kuli Yeova, Yeova waneenyile Mose ati: ‘Kolonganika antu pamwi. Lyene ndi yakolongana ulande uku ciliwe icili paapa. Pamafuma manzi aingi kuti inyama na antu yamwe.’

Lyene Mose wakolonganiike antu nu kuyaneena ukuti: ‘Uvwini mwe yano mutataila Leza! Uzye nemo na Aloni tutanga tumupeele amanzi ukufuma umu ciliwe cii?’ Lyene Mose uumile umu ciliwe imiku iili, na manzi aingi yatandika ukufuma. Inyama na antu yatandika ukumwa amanzi aingi cuze.

Lelo Yeova wasokiile Mose na Aloni. Uzye watuumanya umulandu? Apa mulandu wakuti Mose na Aloni yaaneenyile antu ukuti aliyo yaali nu kuyapeela amanzi ukufuma umu ciliwe. Nomba Yeova aliwe wapeezile antu manzi. Nupya Yeova walanzile ukuti amapaanika Mose na Aloni pano yataalanzile icisinka pa cintu kwene cii cino Yeova wacisile. Walanzile ati: ‘Mutalatungulula antu yane ukwingila umu mpanga ya Kenani.’

Paapisile sile insita inono avino aina Izlaeli yaafumile apa Kadesyi. Pa kasita kanoono sile yaafisile uku Mwamba wa Holi. Kuu, ali kuno Aloni wafwilile apa mwamba papela. Wafwile ala ali ni myaka yakuvyalwa 123. Aina Izlaeli yaali sana nu ulanda, nupya yonsi kwene yaatandike ukulosya Aloni pa manda 30. Eleaza mwana Aloni aliwe wapyanyile isi ukuya simapepo mukalamba uwa ina Izlaeli.