AONSI yaa, yali umu uzanzo. Yafwile ukufumako kuu. Antu yaa, i nengu zya ina Izlaeli, nu mwanaci aakwavwilizya inengu zii a Laabu. Laabu akaikala umu ng’anda kwene ii iyayeela apa viumba vya musumba wa Yeliko. Leka tulole umulandu uno aonsi kwene yaa yaelile umu uzanzo.

Aina Izlaeli yaaipekinye ukulamba Uluzi Lwa Yodani nu kwingila umu Kenani. Nomba lino yatatala yalamba, Yoswa watumile inengu ziili. Wazineenyile ati: ‘Yangini mukalole impanga nu musumba wa Yeliko.’

Lino inengu zyafisile umu Yeliko, zyaiile uku ng’anda yakwe Laabu. Nomba, umuntu umwi waneenyile umwene uwa mu Yeliko ati: ‘Kwizile aina Izlaeli yaili ilelo usiku umu kulengula impanga.’ Lino umwene uvwile vivyo, watumile aonsi kuli Laabu, iyaya yamuneena yati: ‘Fumya aonsi yano usunzile umu ng’anda!’ Nomba, Laabu wayafisile apipaala. Lyene alanda ati: ‘Aonsi yamwi yali-iza umwane, nomba ntamanyile kuno yali-yafumile. Iyaapita lino paali-patandika sile ukufiita, ala yatatala yayala impongolo. Ndi mwapitisya, mungayazana!’ Lyene aonsi iyatandika ukusimula ukulondela aonsi yaayo.

Lino yafumapo, Laabu aya zuwa-zuwa apipaala. Aneena inengu ati: ‘Nimanya ukuti Yeova ali nu kumupeela impanga ii. Tuvwiile vino Leza winu walenzile Yemba Muyenzu ukuuma lino mwafumile umu Eguputo, na vino mumoozile umwene Siooni nu mwene Ogi. Natindaanga sana icikuuku kuli mwemwe, fwandi namwe mundaye ukuti mulanguvwila uluse. Muce mupususye tata na mayo, alino na yakalume yane na yakaci yane.’

Inengu zyalavile Laabu ukuti zilacita vivikwene vino walanzile, nomba Laabu walondekwanga ukucita icintu cimwi. Inengu zyaneenyile Laabu iziti: ‘Toola umwando uu uyenzu uunyepelele apiwindo lya ng’anda yako, nupya ukolonganye yalupwa yako yonsi umu ng’anda yako. Na lino swensi tuliza umu kupoka Yeliko, tulalola umwando uu apiwindo lya ng’anda yako, nupya tutalumoola nanti umwi umu ng’anda yako.’ Lino inengu zyaswiliile kuli Yoswa, zyaile izimuneena vyonsi ivyacitiike.