UZYE waamanya umonsi uwakwatiisye amaka ukucila antu yonsi? Wali a kapingula Samusoni. Yeova u wapeezile Samusoni amaka. Lino Samusoni atatala wavyalwa, Yeova waneenyile nyina wakwe Samusoni ukuti: ‘Wasya ukwate umwana. Alatungulula aina Izlaeli nu kuyapususya uku ya Filisiti.’

Aa Filisiti yaali antu aipe aikalanga umu Kenani. Yaakweti aonsi ya ulwi aingi cuze, nupya yacuzizye sana aina Izlaeli. Pa nsita imwi lino Samusoni wayaanga uku ncende ino aa Filisiti iikalanga kweneko, wakomanyile na cisama umukulu sana ala akung’anza. Nomba Samusoni umoozile cisama wiyo ni minwe sile ukwaula icanzo. Umoozile na aa Filisiti aingi sana.

Lyene Samusoni watemilwe sana umukazyana uwiziina lyakuti Delila. Intunguluzi zya ya Filisiti zyalavile Delila ukuti ndi cakuti wayaneena icaleenga ukuti Samusoni akwatisye amaka, cila muntu waali nu kumupeela impiya zyakwe siluva 1,100. Delila walondesyanga ukukwata impiya kwene zizyo. Ataali cuza wa mpomvu kuli Samusoni, nanti antu yakwe Leza kwene atayatemilwe. Fwandi watwaliliile ukuuzikisya Samusoni ukuti amanye icalenzile akwatisye amaka.

Lyene wanda umwi Delila wasusile alyombeleka Samusoni ukumuneena icalenzile ukuti Samusoni akwatisye amaka. Samusoni walanzile ukuti: ‘Ntatala napelwa inyele, ukufuma sile lino naviilwe, Leza wansoolwile ukuya umuomvi wakwe umutemwikwe sana aakaamwa ukuti Umunazili. Ndi cakuti umwi wampela inyele, amaka yano nakwata yangasila.’

Lyene lino Delila uvwile vivyo, walaalikizye Samusoni apa maulu. Lyene wamile umonsi umwi ukwiza mupela inyele. Lino Samusoni wazyusile, ataakweti amaka nanti panono. Lyene aa Filisiti izile iyamulema nu kumunyepa. Yamutonkola amanso nu kumupanga ukuya umuzya wao.

Wanda umwi aa Filisiti yazevyanga ala yakupepa leza wao wino yamanga yakuti Dagoni, nupya yafumizye Samusoni umu cifungo pakuti ize ayacitile imipuulwe. Nomba paa lyene ala inyele zyakwe zyakula. Samusoni waneenyile umulumendo uwa mulemile apikasa ukuti: ‘Leka ndeme incesi izyatungilila icikulwa cii.’ Lyene Samusoni wapefile kuli Yeova ukuti amupeele amaka, nupya watandike ukusunka incesi izyatungilile icikuulwa. Wapunzile wati: ‘Leka mfwile pamwi na aa Filisiti.’ Paali aa Filisiti 3,000 azevyanga, nupya lino Samusoni winiime nu kusunka sana incesi, icikulwa caponyile nu kumoola antu yonsi kwene yaaya aali aipe cuze.