AKALUMENDO kaa kakuloleka ningo, asi avivyo? Iziina lya kalumendo kwene kaa a Samueli. Nu monsi aalemile Samueli apa mutwe a simapepo mukalamba Eli. Lyene pali isi wakwe Samueli, Elikana na nyina Hana aalesile Samueli kuli Eli.

Samueli ali ni myaka umupiipi na 5 iyakuvyalwa. Nomba, ali nu kutandika ukwikala na Eli pamwi na yasimapepo yauze apitenti lya kupepelapo Yeova. U mulandu ci uno Elikana na Hana yaatwaliile Samueli lino acili umwance sana uku kuombela Yeova apitenti lya kupepelapo? Leka tulole.

Pa nsita imwi lino cii citatala cacitika, Hana wali sana nu ulanda. Icalenzile aye sana nu ulanda i cakuti atakwatanga ana, nupya walondesyanga ukukwata umwana. Lyene wanda umwi lino Hana waile ukwitenti lyakupepelapo Yeova, wapefile ukuti: ‘Yeova, utanjilila napaapata! Nkulaya ukuti ndi wampeela umwana, ndamupeela kuli wewe pakuti ace aakuombela amanda yonsi.’

Yeova waswike ipepo lyakwe Hana, na lino papisile imyezi, Hana wizile avyala Samueli. Hana watemilwe sana umwanakwe, nupya watandike ukumusambilizya pali Yeova ala acili akanya. Waneenyile iiya ukuti: ‘Ndi Samueli wakulako panono, ndamutwala ukwitenti lya kupepelapo Yeova pakuti ace aaombela Yeova kuuku.’

Ali vino ukulola pa cikope cii, Hana na Elikana yatwala Samueli apitenti lya kupepelapo Yeova. Lyene vino avyazi yakwe Samueli yamusambilizya ningo, Samueli watatemwa cuze ukutandika ukuombela Yeova ukuntu kuu, apitenti lyakwe Yeova. Cila-mwaka Hana na Elikana yaayanga umu kupepa Yeova apitenti kwene lii ilya muzilo, nu kutandalila umwanao. Nupya cila-mwaka Hana watwalilanga Samueli ikoti ilipya ilya makasa aipi ala watamusumila.

Lino imyaka yapitanga, Samueli watwaliliile ukuombela Yeova apitenti, nupya Yeova na antu kwene yatemilwe sana Samueli. Nomba, Hofini na Pineasi ya mwana Eli simapepo mukalamba, yene yaali aipe. Yacitanga ivintu ivipisye, nupya yaleenganga antu yauze ukukana uvwila Yeova. Nga caziifile Eli ayafumya pali usimapepo, nomba asi vino wacisile foo.

Samueli ataalesile ukuti iviipe ivyacitikanga apitenti vimuleenge ukuta ukuombela Yeova. Nomba, pa mulandu wakuti kwali antu anoono sana aatemilwe Yeova, paatazile ipaleengela sana ala Yeova waata ukuvwanga na antunze. Lino Samueli wakuzileko, ivyacitiike aevi:

Wanda umwi lino Samueli waizi, uvwile izwi likumwama ukutulo nu kumuzyula. Lino uvwile izwi kwene lilyo, waswike ati: ‘Indi pano.’ Nupya wazyusile nu kuya kuli Eli, amuneena ukuti: ‘Imwangama, anene indi pano natiniiza.’

Nomba, Eli waswike ukuti: ‘Awe ntakwamile, swilila kalaale.’ Avino na Samueli aswilila uku kulaala.

Lyene umuku wakwe ciili Samueli uvwile yakumwama ukuti: ‘Samueli!’ Lyene Samueli akatuka nupya nu kusimula ukuya kuli Eli. Walanzile ati: ‘Imwangama, anene ndi pano, natiniiza.’ Nomba Eli waswike ukuti: ‘Awe ntakwamilepo mwanane. Swilila kalaale.’ Samueli waswiliile.

Izwi lyaswilizyepo ukwama Samueli umuku wakwe citatu iliti: ‘Samueli!’. Nupya kwene Samueli asimula aya kuli Eli. Napya waile amuneena ukuti: ‘Anene niiza, umuku uu wene mufwile mwati-mungama.’ Lyene Eli amanya ukuti afwile a Yeova aakwama Samueli. Lyene Eli aneena Samueli ukuti: ‘Pitanga kalaale, nupya ndi cakuti uvwa umwi wakwama, uwasuke uti: “Vwanga, Yeova, umuomvi wako akuuvwa.”’

Vivyo kwene avino Samueli waswike lino Yeova wamwamile nupya. Lyene Yeova aneena Samueli ukuti ali nu kufulula Eli na ana yakwe aonsi. Lino papisile insita, Hofini na Pineasi izile iyafwa lino yalwanga inkondo na aa Filisiti, na Eli lino uvwile ukuti ana yakwe yati yafwa, waponyile, aivuna insingo nu kufwa. Fwandi vino Yeova walanzile i vyacitiike.

Samueli wakuzile, nupya wali ali kapingula wakusyalikizya uwa ina Izlaeli. Lino wakosile, antu yaamuneenyile iyati: ‘Soolola umwi aye umwene witu.’ Samueli ataaloondanga ukucita vivyo, pano Yeova wali ali mwene wao. Nomba Yeova waneenyile Samueli ukuvwa vino antu yamuneenyile.