UZYE watumumanya umwanaci wii aakwiza uku kukomaanya Davidi? Iziina lyakwe a Abigelo. Wali umwanaci wa mano, nupya wavwile Davidi ukukanacita icintu cimwi iciipe. Nomba, lino tutatala twasambilila pali vii, leka tulole ivyacitikilanga Davidi.

Lino Davidi wapuusile ukufuma kuli Saulo, waile afisama umu ninga. Aina yakwe pamwi nu lupwa nayo yaamulondiile. Aonsi apiipi na 400 izile kuli aliwe, nupya Davidi wizile aya intunguluzi yao. Lyene Davidi waile uku mwene wa ina Moabu nu kumuneena ati: ‘Nkuleenga ukuti tata na mayo yaikala naawe ukufikila ince ndole vino cilaya.’ Ukufuma papo, Davidi na onsi yakwe yaatandike ukufisama umu myamba.

Lyene Davidi waile akomaana na Abigelo. Iya wakwe Abigelo, Nabali, wali uwavyuma sana nupya wakweti impanga ikulu sana. Wakweti imfwele 3,000 ni imbuzi 1,000. Nabali wali umonsi uwa cilumba nupya umwipe. Nomba mamakwe Abigelo wene wali umusuma sana. Nupya wacitanga ivintu ivisuma. Pa nsita imwi wapuswisye nu lupwa lwakwe. Leka tulole vino caali.

Davidi na onsi yakwe yaali sana ni cikuuku kuli Nabali. Yamwavwile ukucingilila imfwele. Lyene wanda umwi Davidi watumile aonsi yakwe kuli Nabali ukuti ayavwilizye. Aonsi yakwe Davidi yaaile kuli Nabali pa nsita ino Nabali na aomvi yakwe yaputulanga imfwele amavumbu. Waali u wanda wa kuzevya, nupya Nabali wakweti ivyakulya ivisuma ivingi. Lyene aonsi yano Davidi watumile yaaneenyile Nabali iyati: ‘Swemo twaali ni cikuuku kuli wewe. Tutaatazile itukwiila imfwele, twakwavwanga ukuzisakamala. Acino, twapapata, tukuleenga ukuti utupeeleko ivyakulya.’

Nomba Nabali waswike ati: ‘Ntanga mupeele ivyakulya vyane.’ Walandanga ni mitumfyo, nu kupontela Davidi. Lino aonsi yaaya yaswilile nukuyaneena Davidi ivyacitiike, Davidi wasosile sana. Wayaneenyile ati: ‘Sendini impanga, twapiteni!’ Avino yakatwike kuti yakuumoole Nabali na onsi yakwe.

Lyene umuomvi wakwe Nabali wenga, uuvwile amazwi aipe yano Nabali walanzile, waile aneena Abigelo. Lilyo kwene sile Abigelo wapekiinye ivyakulya. Wavilonzile pali ya punda nu kutandika uulendo. Lino wakomenkiine na Davidi, wisile pali punda nu kwinama, alino avwanga ati: ‘Napapata mukwai, mutasumba mano kuli vino u wane Nabali waacisile. Wene asielenganya ningo, akacita sile ivya uwelewele. Mukwai namuletela uwila. Pokelelini, nupya mutweleele pali vyonsi ivyacitiike.’

Nawe Davidi walanzile ati: ‘Wewe mwanaci wa mano sana. Wangavwa ukuti ntakoma Nabali pa miyele yakwe iipe. Ale pitanga uku mwinu, upite ningo.’ Lino paapisile insita, Nabali wafwile, nawe Davidi atoola Abigelo ukuya mamakwe.