NAKUPYA kwene Saulo walondanga ukukoma Davidi. Wakatwisye asilika yakwe 3,000 yano wataile sana nu kupita nayo uku kulonda Davidi. Lino Davidi uvwile vivyo, nawe watumile inengu kuti zikalonde kuno Saulo na antu yakwe yaapangiile inkambi. Nga alino Davidi uzizye aonsi yakwe yaili ati: ‘A weni angatemwa ukuti tuye nawe ku nkambi yakwe Saulo?’

Abisyai aasuka ati: ‘Anene.’ Abisyai wali a mwana Zeluya kaci wakwe Davidi. Lino Saulo na antu yakwe yaaizi, Davidi na Abisyai yaasookeliile umu nkambi. Yaaile yatoolapo isumo lyakwe Saulo ni nsembo yakwe ala wataviika lwa ku mutwe. Kutaali nanti umwi uwamanyile nanti ukuvwa ukuti kwizile umwi, pano ala yonsi kwene yati yakondelwa.

Lola lyene Davidi na Abisyai paa. Iyafumako mpiti iyaya yakwela nu mwamba. Apano Davidi waile apundilila umukalamba wa yasilika ya ina Izlaeli ati: ‘We Abineli, ngi cani cino wavililwa ukucingilila sokulu, umwene? Lola kuno! Uzye isumo lyakwe ni nsembo vili kuli weni?’

Ali pano Saulo wazyusile. Nupya wamanyile ukuti izwi lyali i lyakwe Davidi, acino uzizye ati: ‘Uzye wewe Davidi?’ Uzye watuulola Saulo na Abineli apa cikope icili apisika?

Davidi waswike ati: ‘Ee, a nene kwene we mwene wane.’ Nupya Davidi uzizye ati: ‘U mulandu ci uno ukulondela ukungumoola? Ngi vyani vino naluvyanya? Isumo lyako aeli kuno, we mwene. Tuma umonsi wenga aize asende.’

Nawe Saulo azumila ati: ‘Awe nati nduvyanya. Nati ncita ivya uwelewele.’ Avino Davidi wapisile, na Saulo waswilile ukwakwe. Nomba Davidi welenginye ati: ‘Wanda umwi Saulo alasuka ankome. Ndinzile ukupuukila uku mpanga ya aaFilisiti.’ Avino wacisile vivyo kwene. Davidi waile asomba aaFilisiti kwati walondanga ukuyavwa.

Lino paalengiile, aaFilisiti yaile uku kulwa na ina Izlaeli. Saulo na Yonatani yaafwiliile pa nkondo kwene yiiya. Lino Yonatani wafwile, Davidi wali nu ulanda sana, napya wimvile ulwimbo ulusuma ati: ‘Yonatani mwinane, indi nu ulanda iciipisye. Wewe twatemwanine sana!’

Kufuma papo, Davidi waswilile uku Izlaeli nu kuya ikala umu musumba wa Hebuloni. Lyene kwizile ikuya ulwi umu Izlaeli, antu alondanga Isyibosyeti ukuti aye umwene yalwisyanga antu alondanga Davidi ukuti aaliwe aateeka. Nomba antu yakwe Davidi aliyo yaacimvizye. Davidi watandike ukuteeka ala ali ni myaka ya kuvyalwa 30. Wateesile umu Hebuloni apa myaka 7 ni myezi 6. Ana yamwi yano wavile lino wali kuuku, a Amunoni, Abusalomu na Adoniya.

Lyene insita yafisile iyakuti Davidi na antu yakwe yaye umu kupoka umusumba usuma sana uno yaatangi Yelusalemu. Yoabu, umwana monsi na muze wino Zeluya kaci wakwe Davidi waviile, aaliwe watungululanga asilika. Acino, Davidi walambwile Yoabu lino wamusoolwile ukuya ali mukalamba wa yasilika. Awe, a vino Davidi watandike ukuteeka umu Yelusalemu.