UZYE watuulola ivyati-vicitika paa? Umulumendo wii watapususya akana ka mfwele kuli ci beele. Ci beele cali-casenda akamwana ka mfwele kuti cikalye. Nomba umulumendo wali wacizinganya mpaka waya wacipoka akana ka mfwele. Lyene lino ci beele cali-cakatuka kuti cimulume, umulumendo wii wali wacilema nu kucifwanta pansi mpaka cafwa! Kwali nu uwanda umwi lino wapuswisye akana ka mfwele kuli cisama. Mulumendo wii wasipa sana, asi avivyo? Uzye watumumanya umulumendo wii?

Iziina lyakwe a Davidi. Akaikala umu muzi wa Betelemu. Sikulu wakwe waali a Obedi mwana Luti na Boazi. Uzye waiusya antu yaayo? Isi wakwe Davidi wali a Yese. Davidi wacemanga imfwele zyakwe isi. Davidi wavilwe ala papita imyaka 10 ukufuma pano Yeova wasoolwile Saulo ukuya umwene.

Lyene uwanda umwi Yeova waneenyile Samueli ukuti: ‘Senda amafuta asuma cuze uye uku ng’anda yakwe Yese uku Betelemu. Nati-nsoolola umwanakwe umonsi ukuti aliwe aye umwene.’ Lyene lino Samueli waile alola iyeli lyakwe Yese, Eliabu, welenginye ati: ‘I cumicumi wi kwene wii ali wino Yeova watasoolola.’ Nomba Yeova wamuneenyile ati: ‘Wemo utalola sile vino umonsi wii watalimpa nu kuyemba. Asi ali wino nsoolwile ukuti aye umwene.’

Lyene Yese wamile umwanakwe namuze, Abinadabu. Nomba Samueli watiile: ‘Awe, na wi kwene Yeova atamusoolwile.’ Kufuma papo, Yese wamile umwanakwe namuze kwene, Syama. Nomba Samueli watiile: ‘Awe cumi, na wi kwene Yeova atamusoolwile.’ Yonsi kwene ana 7 yano Yese waleesile kuli Samueli, pataali nanti umwi wino Yeova wasoolwile. Nga alino Samueli uzizye Yese ati: ‘Uzye yakwene sile ali yana yako aonsi?’

Nawe Yese aasuka ati: ‘Kwasyala sile kasuli. Nomba, wataya umu kucema imfwele.’ Lyene lino yaile yama Davidi, Samueli waweni ukuti Davidi wali umusuma sana. Nga alino Yeova walanzile ati: ‘Ali wikwene. Mwitile amafuta pa mutwe.’ Nawe Samueli avino wacisile. Insita yali nu kwiza lino Davidi wali nu kuya umwene wa ina Izlaeli.