LINO Umwene Yeloboamu wafwile, aene yonsi aateekanga umu wene wa Izlaeli uwa mitundu 10 uwayeliile uku kaeya, yaayanga aipe. Umwene uwipiisye wali a Aabu. Uzye watuumanya icalenzile? Icalenzile sana a mamakwe umwipe, Yezebele.

Yezebele ataali umwina Izlaeli. Wali umwana wa mwene uwaku Sidoni. Yezebele wapepanga ka leza ka ufi kano yatangi Baali, nupya walenzile ukuti na Aabu kwene kumwi na ina Izlaeli aingi yatandike ukupepa Baali. Yezebele ataatemilwe Yeova, nupya wakomile ya kasesema yakwe Leza aingi. Ya kasesema yamwi yutwike iyaya yafisama umu ninga pakuti atayakoma. Yezebele wene nga akulonda ukupoka icintu cimwi, wakomanga umwine wa cintu cico pakuti acitoole.

Wanda umwi Umwene Aabu wali sana nu ulanda. Lyene Yezebele wamuuzizye ati: ‘Ngi cani cino muyeliile nu ulanda vii?’

Nawe Aabu wamwaswike ati: ‘U mulandu na vino Naboti wali waneena. Nemo nali-nkulonda ukukala icalo cakwe ica myangazi. Nomba wali-waneena wati atanga ankazye.’

Nga alino Yezebele aiza muneena ati: ‘Mutasakamala. Namamupokela icalo.’

Papo kwene sile Yezebele walemvile ya kalata uku ikolo amu musumba muno Naboti wikalanga. Walemvile ati: ‘Muneene aonsi asile-sile ukuti yalande yati Naboti wataatuka Leza nu mwene. Alino musende Naboti ukunzi ya musumba mukamutamoole mawe uleke afwe.’

Lino Yezebele uvwile ukuti Naboti watafwa, lilyo kwene sile waneenyile Aabu ati: ‘Lyene kapokini icalo cakwe Naboti ica myangazi.’ Yezebele nawe kwene afwile ukufwa pa cintu cii iciipe cino wacisile, asi vivyo?

Acino lino paapisile insita, Yeova watumile umonsi wiziina lyakuti Yeu pakuti akumoole Yezebele. Lino Yezebele uvwile ukuti Yeu akwiza, waizifizye sana pakuti aloleke ningo. Nomba lino Yeu wafisile, waweni Yezebele api windo, lyene waneenyile aonsi aombanga ukwisano ati: ‘Musumbini apansi!’ Nayo aonsi yacisile vino wayaneenyile, wakwe vino ukulola pa cikope paa. Yaamusuumvile aizaitama pansi afwa nu kufwa. Yaali ili mpela yakwe Yezebele namwene umwipe.