SOLOMONI watandike ukuteeka ala atatala wafisya imyaka ya kuvyalwa 20. Watemilwe sana Yeova nupya walondelanga vyonsi vino isi, Davidi wamusambizye. Yeova watemilwe vino Solomoni waombanga, acino uwanda umwi usiku, wamuneenyile umu ciloto ati: ‘We Solomoni, i vyani vino ungatemwa ukuti ince nkupeele?’

Nawe Solomoni waswike ati: ‘Yeova, Leza wane, nemo nene mwance sana, nupya ntaamanya na vino ningateeka antu. Fwandi mpeeko amano uleke nteeke antu yako mu nzila ya mpomvu.’

Yeova watemilwe vino Solomoni walenzile. Wamuneenyile ati: ‘Pa mulandu wakuti watulenga amaano, utalenzile ivyuma, fwandi namakupeela amano aingi cuze yano kusi uwatala wakwatako apa mpanga ya pansi. Nomba, ndakupeela na vino utalenzile, kuli kuti ivyuma nu ucindami.’

Kufuma papo, paapisile sile amanda anoono ikwiza anaci yaili kuli Solomoni ala yali ni intazi. Umwanaci wenga wailizyanyizye ati: ‘Tukaikala umu ng’anda ili yonga nu mwanaci wii. Nemo naviile umwana monsi, lyene lino paapisile amanda yaili nawe kwene waviile umwana monsi. Uwanda umwi usiku umwana wakwe wafwile. Nomba lino naizi, walaliike umwanakwe umufwe pano naizi nu kusendapo umwanane. Lyene lino nizile-nkatuka, nalolekiisye umwana umufwe, nupya naweni ukuti umwana wiyo ataali mwanane.’

Nga nawe umwanaci muze ati: ‘Awe! Wikwene umwana umupuma ali mwanane, wiya uwatafwa ali mwanakwe!’ Nawe umwanaci uwatandikiilepo ukulanda waswike ati: ‘Awe foo! Umwana uwatafwa u wako, umupuma ali mwanane!’ Awe anaci yaayo a vino yaatandike ukupaazyanya. Uzye Solomoni wacisile uli?

Waneenyile aomvi yakwe ukuleta ulupanga, nu kuyaneena ati: ‘Putulini umwana wii apakasi muyankanye anaci yaa.’

Nyina wa mwana wapunzile ati: ‘Awe mwe! Napaapata mutuumoola umwana. Fwandi mupeelini ku mwanaci kwene wii!’ Nomba umwanaci muze wene ati: ‘Ee, fwandi mutatupeela fwensi kwene; muputulini pakasi.’

Alino Solomoni wavwanzile ati: ‘Mutakoma umwana wiyo! Peelini umwanaci uwali watandikilapo ukulanda. Wii ali nyina wa cumi.’ Solomoni wamanyile nyina wa mwana uwa cumi, pano nyina wiyo watemilwe sana umwanakwe icakuti wazumile ukuti yapeele umwanaci muze ukucila yakome umwana. Lino antu yuvwile vino Solomoni waputwile umulandu uu, yaatemilwe sana pano yaaweni ukuti wali umwene wa mano.

Pa nsita lino Solomoni wateekanga, Leza wapoleliile antu icakuti umusili wamezyanga sana ingano, imyangazi, amaku, ni vyakulya vyuze. Antu yaazwalanga ivizwalo ivisuma, nupya iikalanga umu mang’anda asuma. Yonsi kwene yaipakizyanga ivintu ivisuma ivingi.