UZYE watuumanya vino umukazyana wii akulanda? Akuneena umwanaci wii ukuti ku Izlaeli kwaya kasesema Elisya wino Yeova aka-avwa ukucita ivizungusyo. Umwanaci wii wene ataamanya Yeova, pano asi mwina Izlaeli. Leka fwandi tuvwe umulandu uno umukazyana ayeliile umu ng’anda yamwanaci wii.

Umwanaci kwene wii u mwina Asilya. Uwakwe a Naamani, umukalamba wa ya silika aaina Asilya. Aina Asilya aliyo yasenzile umukazyana wii umwina Izlaeli, iyamuleta uku ng’anda yakwe Naamani ukuti aye umuomvi wa pa nga’anda.

Naamani walwile indwala iipisye ino yakati tembwe. Indwala ii ingalenga umunyefu wa muntu aalwile ukususuka. Acino, umukazyana akuneena muka Naamani akuti: ‘Ngi cakuti yasikulu yangaya kuli kasesema wakwe Yeova uku Izlaeli, cingazipa. Kasesema wiyo alaya akayapozye.’ Naamani yaamuneenyile amazwi kwene yaa.

Naamani walondanga sana ukupola; acino, waiile uku Izlaeli. Lino wafisile kuuku, waile uku ng’anda yakwe Elisya. Nawe Elisya watumile aomvi yakwe ukuyaneena Naamani ukuti aye akoowe umu Luzi Lwa Yodani, amaila 7. Naamani wasosile sana ukuvwa amazwi yaa, watiile: ‘Ku mwitu kwaya inguzi izya mpomvu ukucila izyaya umu Izlaeli!’ Lino walanzile vivyo, watandike ukuswililamo.

Lyene umuomvi wakwe Naamani umwi wamuneenyile ati: ‘Ya sikulu, Elisya amuneena ukucita icintu icitale, ngi imwacita. Nomba, i cani cino mwakaanila ukuyafulala ndi vino wali walanda?’ Naamani uvwile vino umuomvi wakwe walanzile, nupya waile aingila umu Luzi Lwa Yodani, nu kutuwila amaila 7. Lino wacisile vivyo, umunyefu wakomile nu kuya upuma!

Naamani watemilwe sana. Waswiliile kuli Elisya nu kuyamuneena ati: ‘Lyene nasininkizya ukuti Leza wa mu Izlaeli ali Leza wa cumi wenga umu nsi yonsi. Naleta uwila, pokelela.’ Lelo, Elisya walanzile ati: ‘Awe foo, ntaakupoka.’ Elisya wamanyile ukuti nga waluvyanyizye atoola uwila uuwa, pano Yeova aliwe wapozizye Naamani. Nomba umuomvi wakwe Elisya, Geazi wene walondanga ukutoola uwila uuwa.

Lyene vino Geazi wacisile vitaazifile. Lino Naamani wapisile, Geazi walondiile kuti akatoole uwila. Waile alanda ati: ‘Elisya watantuma ati nkuneene ukuti akulonda umupeelepo vimwi pali vivi vino walukasi ukumupeela, pakuti apeele aenyi yamwi aliyasyala iza. Vino Geazi walanzile, wali ufi. Nomba Naamani ataamanyile ukuti wali ufi, acino, wamupeezile uwila.

Lino Geazi wawezile uku ng’anda, Elisya wamanyile vino Geazi wacisile. Yeova u wamuneenyile. Lyene Elisya waneenyile Geyazi ati: ‘Lyene icintu cii iciipe cino wacita cimalenga ukuti tembwe uwali apa mwili wakwe Naamani amaiza pali wewe.’ Papo kwene sile Geazi walwile tembwe!

Uzye vyonsi vii vikutusambilizya vyani? Icakutandikilako, tukusambilila ukuti tufwile ukuya wa mukazyana uwalanzile pali Yeova. Cikaziipa ndi twacita vivyo. Cakwe ciili, tutalinzile ukuya ni cilumba wakwe vino Naamani wali apa kutandika, tufwile ukuvwila aomvi yakwe Yeova. Na cakwe citatu, tutalinzile ukusomba wakwe vino Geazi wasomvile. Fwandi tungasambilila ivingi nga tukuwelenga Baibo, uzye asi avivyo?