LINO Davidi atatala wafwa, walangiliile Solomoni vyonsi ivyakulondela pa kukuula ing’anda ya kupepelamo Yeova. Lyene lino Solomoni wateekanga umu mwaka wakwe cini (4), watandike ukukuula ing’anda ya kupepelamo, napya paapisile imyaka 7 ni myezi 6 pakuti yamale ukukuula. Antu aingi wakwe cimwi iizanga umu kukuula, ni cikuulwa cico casenzile impiya izingi cuze pakuti cisile. Ni calenzile kuti impiya zivule, a goldi na siluva wino yaaomvizye.

Ing’anda ya kupepelamo yakweti imiputule ikalamba iili, wakwe vino itenti lya kupepelamo lyali. Nomba imiputule ii yaali ikulu sana ukucila iiya iyali umwitenti lya kupepelamo. Solomoni wisile imbokosi ya upangano umu muputule wa mukasi alino ivintu vyunze ivyali umwitenti lya kupepelamo waviisile umu muputule uze.

Lino yaamazile ukukuula ing’anda ya kupepelamo, kwali ukuzevya. Solomoni wafukiime lwa pa mulyango wa ng’anda ya kupepelamo atandika ukupepa, ndi vino ukulola pa cikope. Pa kupepa kuli Yeova, Solomoni walanzile ati: ‘Nanti sile iiyulu litanga likukwane, fwandi ing’anda ii yene yacepa ukutalitali. Nomba, we Leza wane, si wauvwako lino antu yako yakupepa kuli wewe apa cifulo cii.’

Lino Solomoni wamazile ukupepa, kwizile umoto ukufuma ukwiyulu. Wizile ioca impolelwa zya nyama zino yaapeezile. Nga alino kwizile uluswepo ulukulu ulwaziile umu ng’anda ya kupepelamo. Cii calangililanga ukuti Yeova uvwanga vino Solomoni wapepanga, nupya watemilwe ukuti yaakuuzile ing’anda ya kumupepelamo. Ing’anda yii aali kuno antu yaayanga umu kupepa Leza, yaatiile ukuya ukwitenti lya kupepelamo.

Pa nsita iitali, Solomoni watwaliliile ukuteeka na mano sana, nupya antu yaali ni nsansa sana. Nomba Solomoni watwazile yamama aingi sana aku mpanga zyuze kuno yataapepanga Yeova. Uzye watuulola mama wenga pa cikope vino akupepa kaluwi? Lino paapisile insita, Solomoni walondiile yamama yakwe, atandika nu kupepa tu leza twaufi. Uzye watuumanya icacitiike lino Solomoni watandike ukucita vii? Watiile ukuteeka antu ningo. Lyene wizile-aya umunkalwe, na antu yatiile ukwikala umutende.

Yeova wasosile sana pali vino Solomoni wacisile, acino, wamuneenyile ati: ‘Ndakupoka uwene, ince mpeele umuntu muze. Ntalakupoka ala ucili umuumi, ndapoka ala umwanako aliwe akuteeka. Nomba ntalapoka antu yonsi kufuma umu wene wa mwanako.’ Leka tulole vino icintu cii cacitiike..