ANTU apiipi na 50,000 yaaswilile ku Yelusalemu ukufuma uku Babiloni. Nomba, lino yaafisile, Yelusalemu wali umononeke cuze. Kutaali nanti umwi uwikalanga mwenemo. Aina Izlaeli yaali nu kutandika ukukuula cipya-cipya.

Icintu conga pali vino yaatandikiilepo ukukuula, uulambo. Paa ali pano yaapeelelanga impolelwa zya nyama, nanti uwila kuli Yeova. Lino paapisile sile imyezi inoono, aina Izlaeli yaataandike ukukuula ing’anda ya kupepelamo. Nomba alwani aikalanga umu mpanga zya mupiipi, yataaloondanga ukuti aina Izlaeli yakuule ing’anda ya kupepelamo. Lyene yaatandike ukutiinya aina Izlaeli ukuti yate ukukuula ing’anda ya kupepelamo. Alwani yaaya yaasusile iyaneena umwene mupya uwa Pesya ukuti apeele isunde lyakuti aina Izlaeli yate umulimo wa kukuula.

Paapisile imyaka. Lyene pa nsita ii, ala ipapita imyaka 17 ukufuma pano aina Izlaeli yaafumiile uku Babiloni. Yeova watumile ya kasesema yakwe, Hagai na Zakaliya ukuti yaneene aina Izlaeli ukutandika ukukuula nupya. Antu yaataaile ukuti Leza wali nu kuyazwa, nupya yuvwiliile vino ya kasesema yaalanzile. Yaatandike ukukuula nupya nanti icakuti isunde litaazumiliizye ukucita vivyo.

Lyene umuomvi wa mu uteeko uwiziina lyakuti Tatenai wizile nu kuuzya aina Izlaeli ukuti yamuneene uwayapeezile insambu zya kukuula ing’anda ya kupepelamo. Aina Izlaeli yaamuneenyile ukuti lino yaali uku Babiloni, Umwene Kilusi wayaneenyile amazwi yakuti: ‘Yangini uku Yelusalemu, mukakuule ing’anda yakwe Yeova, Leza winu.’

Tatenai watumile kalata uku Babiloni ukuuzya ndi cakuti Kilusi wazumiliizye aina Izlaeli ukukuula ing’anda ya kupepelamo; pa nsita ii ala Kilusi wafwa. Pataalengiile, umwene wa Pesya umupya walemvile kalata nu kuwezezya Tatenai. Kalata wiyo walanzile ukuti icumicumi Kilusi wazumilizye aina Izlaeli ukukuula ing’anda ya kupepelamo. Lyene umwene walemvile ati: ‘Lekini aina Izlaeli yakuule ing’anda ya kupepelamo Leza wao. Nupya nkumuneena ukuti muyavwe ukukuula.’ Lino paapisile imyaka apiipi na ini (4), aina Izlaeli yaamazile ukukuula ing’anda ya kupepelamo, nupya yaasansamwike cuze.

Paapisile imyaka nayuze iingi. Lyene apa nsita ii ala paapita imyaka apiipi na 48 ukufuma pano ing’anda ya kupepelamo yakuliilwe. Aina Izlaeli aikalanga umu Yelusalemu iizile yaya aapina sana, nu musumba pamwi ni ng’anda ya kupepelamo, vyatiile ukuloleka ningo. Lyene Ezila, umwina Izlaeli, uvwile ukuti ing’anda ya kupepelamo yalondekwanga ukuziifya. Uzye watuumanya cino Ezila wacisile?

Ezila waiile umu kuleenga umwene wa ina Pesya, Alitakisesi, ukuti amuzumilizye ukuya uku Yelusalemu, nu mwene wapeezile Ezila amawila aingi aakusenda uku Yelusalemu. Ezila waneenyile aina Izlaeli aikalanga umu Babiloni pa nsita iiya ukumwazwa ukusenda amawila yaa ukutwala uku Yelusalemu. Aina Izlaeli apiipi na 6,000 yaazumiile ukupita. Yaakweti siluva na goldi nyanya ni vintu na vyuze ivisuma ivingi ivya kutwala uku Yelusalemu.

Ezila wasakamile sana, pano umu nzila mwali aonsi aipe cuze. Aonsi yaayo limwi yaali nu kupoka aina Izlaeli siluva na goldi, nu kuyakoma. Ezila wamile antu nu kuyakolonganika, wakwe vino ukulola apa cikope. Lyene yaapefile kuli Yeova ukuti ayacingilile lino yali pa lwendo lwa kuswilila uku Yelusalemu.

Yeova wayacingiliile. Nupya, lino yaapisile imyezi ini (4), yaafisile uku Yelusalemu ala yali sile ningo. Cii cikulanga ukuti Yeova akacingilila aakamutaaila ukuti ali nu kuyavwa, asi avivyo?