UZYE i cani icikucitika paa? Antu yakuzevya, iyazanga cuze. Umwene wa Babiloni wata-ama antu acindame sana aingi wakwe cimwi. Yakuomvya yakapu yakwe goldi na yakwe siluva ni imbale vino yafumiizye umu ng’anda ya kupepelamo yakwe Yeova uku Yelusalemu. Nomba, lino yakuzevya ikwiza-kuloleka iminwe ya monsi apa lwelele nu kutandika ukulemba apa ciumba. Antu yonsi kwene yuvwile sana intete.

Belisyazali umwizikulu wakwe Nebukadineza, aliwe wali umwene pa nsita ii. Wapunzile ukuti yame aonsi yano watangi aamano. Wayaneenyile ati: ‘Wensi aamawelenga ivilembo vii nu kuuneena vino vikupiliula, namamupeela ivintu ivingi, nupya alaya kateeka wakwe citatu umucindame sana umu wene wane.’ Nomba kutaali nanti umwi uwawelenzile ivilembo viivi nanti ukwilula.

Nyina wa mwene uvwile icongo nu kwiza umu muputule uwa kuliilamo ukulu cuze. Waneenyile umwene ati: ‘Utuvwa intete. Kwaya umonsi umwi uwaya umu mpanga yako kwene ii uwamanya ya leza. Lino sokulu Nebukadineza wali umwene, wamusoolwile ukuya umukalamba wa yonsi yamano sana. Iziina lyakwe a Danieli. Tuma umwi akamwame, amaiza akwilwile.’

Lyene papo kwene sile Danieli yaamuleesile. Lino yaamuneenyile ukuti yamamupeela uwila, Danieli wakaanyile; watandike ukulondolola icalenzile ukuti Yeova afumyepo Nebukadineza, sikulu wakwe Belisyazali apa wene. Danieli walanzile ukuti: ‘Nebukadineza wali sana ni cilumba, acino Yeova wamufumizizye apa wene.’

Danieli waneenyile Belisyazali ati: ‘Wemo, wamanya ivyacitikiile sokulu, nomba ucili ni cilumba wakwe vino sokulu Nebukadineza wali. Wemo wasenzile ya kapu ni zyambale ukufuma umu ng’anda ya kupepelamo yakwe Yeova nu kutandika ukumwelamo. Ukaapepa tu leza twaufi utwapangwa ukuomvya imiti na mawe, nupya usicindika Kaumba Mukulu. Ali cino Leza atumiile ikasa ukwizalemba amazwi yaa pa ciumba.

Danieli walanzile ati: ‘Ivilemvilwe aevi: MENE, MENE, TEKELI na PALISINI.’

‘MENE cikupiliula ukuti Leza watapenda manda ya wene wako ukufika pano ulapeleela. TEKELI cikupiliula ukuti watupimwa apa masikelo nupya watuzanwa ni viipe vitupu. PALISINI cikupiliula ukuti uwene wako watiupeelwa uku ina Mede na ina Pesya.’

Lino Danieli acili akulanda, aina Mede na ina Pesya yaatandike ukuzanza Babiloni. Yaacimvizye aikazi ya mu musumba nu kukoma Belisyazali. Vino mazwi ya pa ciumba yaalandanga vyacitiike uwanda kwene uuwa usiku! Nomba, uzye lyene, i cani icali nu kucitikila aina Izlaeli? Tuli nu kusambilila pali vivyo ivyayacitikiile, nomba, leka tutale tulole ivyacitikiile Danieli..