LEKA tulande pali vino vyacitike pa myaka inoono lino Ezila atatala waya uku Yelusalemu. Modekai na Esita a ina Izlaeli aali acindame sana umu mpanga ya Pesya. Esita wali a namwene nakupya umuvyala wakwe Modekai uwali wakwe ciili ku mwene uwa teekanga pa nsita iiya. Leka tulole vino caali.

Avyazi yakwe Esita yaafwile ala acili umwance sana, fwandi Modekai u wamusunganga mpaka akula. Aasuwelo umwene wa Pesya, wakweti isano mu musumba wa Susa, nupya Modekai wali umuomvi wakwe. Nomba; uwanda umwi Vasyiti umuci wa mwene wakaanyile ukuvwila uwakwe, acino umwene wasoolwile umuci munze kuti aliwe aye namwene. Uzye watumumanya umwanaci wino wasoolwile? Ee, a Esita umukazyana umusuma cuze.

Uzye watuulola umonsi wa cilumba wino antu yakufukamila paa? Umonsi wii a Hamani. Umonsi kwene wii wacindikwe sana umu mpanga ya Pesya. Hamani akulonda ukuti na Modekai kwene, wino ukulola ateenzi paa amufukamile. Nomba Modekai asikufukama. Pano wamanyile ukuti ukufukamila umuntu umwipe wakwe Hamani i ciipe. Lyene Hamani wasosile iciipisye. Fwandi vino wacisile aevi:

Hamani waneenyile umwene ivya ufi pa ina izlaeli. Walanzile ati: ‘Aina Izlaeli aaipe sana, yasikuvwila amasunde. Yalinzile ukumoolwa.’ Aasuwelo ataamanyile ukuti Esita umuci wakwe wali umwina Izlaeli. Fwandi uvwilile vino Hamani wamuneenyile; wisileko ni sunde lyakuti uwanda umwi aina Izlaeli yonsi yalumoolwa.

Lino Modekai umvwile vivyo, wasakamile sana. Watumile amazwi kuli Esita ati: ‘Uneene umwene nu kupaapata sana pakuti ace atucingilile.’ Umu mpanga ya Pesya mwali isunde lyakuti pakuya uku kulola umwene, suka sile ndi iyakwama. Nomba, Esita wene waile kweneko ukwaula ukuti yamwame. Acino umwene wataambike Esita intuwa yakwe goldi, iya kumanyila kweneko ukuti atafwile ukumolwa. Esita wapekinye ivyakulya ivingi nu kwama umwene na Hamani kuti ize yaliile pamwi. Alino umwene uzizye Esita cino angatemwa ukuti amucitile. Nawe Esita walanzile ukuti alamuneena ndi cakuti umwene na Hamani yaaca iza nupya uwanda walondeliilepo lino alapekanya ivyakulya navyuze.

Lyene lino yakulya, Esita aneena umwene ati: ‘Nemo na antu yane yakulonda ukutuumoola.’ Nawe umwene asoka cuze. Alino umwene amuuzya ati: ‘Uzye a weni aakulonda ukucita icintu ca musango uu?’

Nawe Esita aasuka ati: ‘A ewii, Hamani, ali mulwani witu.’

Lyene umwene wasosile sana. Walanzile nu kuti Hamani alinzile ukumoolwa. Lyene, umwene wasoolwile Modekai ukuya kateeka wakwe ciili. Nawe Modekai apanga ni sunde ilipya pakuti aina Izlaeli yace yalwisye apa wanda uno yaali nu kumoolwa. Modekai lyene wali umucindame sana, fwandi, antu aingi yavwilizye aina Izlaeli ku kulwisya alwani, nupya yaapuswike.