LYENE iipapita ni myaka umupiipi na iili ukufuma pano aina Mede na ina Pesya yaacimviizye umusumba wa Babiloni. Lyene lola icikucitika paa! Aina Izlaeli yakufuma umu Babiloni. Uzye caali uli pakuti yakululwe? Uzye a weni uwayaneenyile ukuti yapite?

A Kilusi, umwene wa Pesya. Pa myaka iingi lino Kilusi atatala wavyalwa, Yeova waneenyile kasesema Ezaya ukulemba ukuti: ‘Ulacita vino ndaloonda ukuti ucite. Impongolo zilasyala ukwaula ukuyalwa pakuti uce ucimvye umusumba.’ Ni cizile icicitika i cakuti Kilusi u watungulwile asilika pa kucimvya Babiloni. Aina Mede na ina Pesya ingiile umu musumba wa Babiloni usiku apa mpongolo izyasile ukwaula ukuyalwa.

Nomba, kasesema wakwe Yeova, Ezaya walanzile nu kuti Kilusi wali nu kupeela isunde lyakuti Yelusalemu ni ng’anda ya kupepelamo vikuulwe nupya. Uzye Kilusi wizile apeela isunde lii? Ee, vivikwene avino wacisile. Vino Kilusi waneenyile aina Izlaeli aevi: ‘Yangini uku Yelusalemu likwene, mukakuule ing’anda yakwe Yeova, Leza winu.’ Nupya ali mulandu uno aina Izlaeli yakufumila umu Babiloni pakuti yakakuule ing’anda ya kupepelamo.

Nomba, asi ina Izlaeli yonsi angapita ukuyafika uku Yelusalemu. U lwendo lwali ulutali cuze, ulwa makilomita 800 nupya aingi yaali aakote sana, yamwi nayo yaali alwale icakuti nga yataakwanisye ukuyafika uku Yelusalemu. Nupya kwali imilandu na yuze ino yamwi yaafililwe ukupita. Nomba, Kilusi waneenyile yano yaafizilwe ukupita ati: ‘Peelini goldi na siluva na mawila yauze kuli yano yakuswilila umu kukuula Yelusalemu ni ng’anda ya kupepelamo.’

Lyene aina Izlaeli aaswililanga uku Yelusalemu yaasenzile amawila aingi cuze. Napya, Kilusi wapeezile aina Izlaeli izyambale na ya kapu vino Nebukadineza wasenzile umu ng’anda yakwe Yeova lino onoonyile Yelusalemu. Antu yaakweti ivintu ivingi ivyakusenda.

Lino paapisile imyezi ini (4) ala yali pa lwendo, aina Izlaeli yaaile iyafika uku Yelusalemu. Paapisile imyaka 70 ukufuma pano umusumba wa Yelusalemu onooniilwe, nupya icifulo casyazile itongwa. Nanti cakuti aina Izlaeli yaaswilile uku mpanga yao, insita zimwi yaali nu kuya ni intazi, wakwe vino tuli nu kusambilila.