UZYE wayiusya alumendo yaa yatatu? Ee, auze yakwe Danieli aakaanyile ukulya ivyakulya vino yataalondanga. Aina Babiloni yaamaanga alumendo yaa yakuti Syadilaki, Mesyaki na Abedinego. Nomba, lolekesya alumendo yaa pa cikope. U mulandu ci uno yasikufukamila icinkolanya icikulu cuze wakwe vino antu yonsi yakucita? Leka tuvwe vino caali.

Uzye ukwiusya amasunde yano Yeova walemvile aaka-amwa ukuti Amasunde Ikumi (10)? Ilya kutandikilapo pa masunde yaa likati: ‘Utaapepa tu leza tuze suka sile nene.’ Alumendo yaa yano ukulola paa, yakuvwila isunde lii nanti cakuti cisi cangupale ukucita vivyo.

Nebukadineza, umwene wa Babiloni, wamile antu acindame aingi cuze ukwiza-pepa icinkolanya cino wimike. Nupya waneenyile antu yonsi ukuti vii: ‘Ndi muvwa ukulila kwa mapenga, mazeeze na vyuze vino antu yakalizya, mufwile ukufukama nu kupepa icinkolanya cii icapangwa na goldi. Wensi aamakaana ukufukama nu kupepa icinkolanya cii, amasumbilwa umwilungu ilikwaka umoto nupya ilikaye cuze.’

Lyene lino Nebukadineza wizile-auvwa ukuti Syadilaki, Mesyaki na Abedinego yataafukiime, wasosile cuze. Watumile aomvi yakwe ukuyaleta alumendo yaayo. Wizile-ayaneena ukuti yafukame. Nomba alumendo yaaya yaataaile sana Yeova. Yaaneenyile Nebukadineza ukuti: ‘Leza witu wino tukaombela amatupususya. Lelo, nanti Yeova atatupuswisye, swemo tutakufukamila icinkolanya cinu icapangwa na goldi.’

Lino Nebukadineza uvwile vivyo, wasosile ukucila napo. Paali ilungu apiipi nupya waneenyile aonsi yamwi ukuti: ‘Kavyini sana ilungu ukucila vino likavile paa!’ Lyene waneenyile asilika yakwe aamaka sana ukuti yanyepe Syadilaki, Mesyaki na Abedinego nu kuyasumbila umwilungu. Ilungu lyakavile sana icakuti asilika yaaya aali akome sana, yaapiile uku cimbilimbili. Nomba, nga alumendo yaaya yatatu yano yaasumbiile mwenemo, i cani icayacitikiile?

Lino umwene wasungamiile umwilungu, uvwile intete sana. Uzizye ati: ‘Uzye tutaali twanyepa alumendo yatatu nu kuyasumbila umwilungu ilikaye cuze?’

Aomvi yakwe yaaswike yati: ‘Ee, itwayanyepa.’

Lyene umwene alanda ati: ‘Nomba, nkulola aonsi yani (4) yakupita umu moto. Yatanyefilwe, nupya yasikupya. Nakupya, umonsi wakwe cini (4) akuloleka wa mungeli.’ Lyene umwene waiile apiipi nu mulyango wilungu nu kupunda ati: ‘Syadilaki! Mesyaki! Abedinego! Fumini umwilungu, mwe yantu yakwe Leza wa Papela-pela!’

Lino yaafumile, antu yonsi yaaweni ukuti alumendo yaaya yataapiile. Lyene umwene walanzile ati: ‘Lekini Leza wakwe Syadilaki, Mesyaki na Abedinego acindikwe! Watumile umungeli wakwe uwayapuswisye pano yataalondanga ukufukamila nu kupepa tu leza tuuze suka sile Leza wao.’

Naswe tufwile ukuya acuvwila kuli Yeova wakwe vino alumendo yaaya yaali, asi avivyo?