LOLA vino antu yakuomba paa. Aina Izlaeli yati-yapamviwa sana pa mulimo wakukuula iviumba vya Yelusalemu. Pa nsita ii ala paapita ni myaka 152 kufuma pano Umwene Nebukadineza onooniile Yelusalemu, nu kuwisya iviumba alino nu koca ivisaasa vya pa mpongolo. Aina Izlaeli yatiizile iyatandika ukukuula iviumba lino yaafisile sile umu Yelusalemu.

Uzye vwile aina Izlaeli yuvwanga uli ukwikala umu musumba uwaula iviumba pa myaka yonsi iyapisilepo? Yuvwanga intete. Ndi cakuti alwani yao izile, yaali nu kuyazanza ukwaula nu kusumba insita. Lyene paa, umonsi wino ukulola, uwiziina lyakuti Neemiya, akwavwa aina Izlaeli ukukuula iviumba nupya. Uzye wamumanya Neemiya?

Neemiya wali umwina Izlaeli uwikalanga uku Susa, kuno Modekai na Esita iikalanga. Neemiya waombelanga ukwisano, fwandi afwile wali acuza wakwe Modekai na Namwene Esita. Nomba, Baibo itaalandapo ukuti Neemiya wali umuomvi wa mwene Aasuwelo, muka Esita. Wali u muomvi wa mwene uwalondelilepo, umwene Alitakisesi.

Iusya ukuti Alitakisesi wali umwene umusuma sana uwapeezile Ezila impiya izyakusenda uku Yelusalemu ukuya-ziifya ing’anda yakwe Yeova iya kupepelamo. Nomba, Ezila ataakuuzile iviumba vya musumba wa Yelusalemu. Leka tulole vino caali pakuti Neemiya aize aombe umulimo wa kukuula iviumba.

Paapisile imyaka 13 ukufuma pano Alitakisesi wapeeliile Ezila impiya zya kuziifizya ing’anda ya kupepelamo. Pa nsita ii, ala Neemiya ali mukalamba wakwe yano yaapekanyizyanga Umwene Alitakisesi ivyakumwa. Cii cilozile umukuti Neemiya ali wino wapekanyizyanga umwene waini, nu kusininkizya ukuti kusi umwi afwile ukwikila umwene sumu umu vyakumwa. Waali umulimo ucindame sana.

Lyene, wanda umwi Hanani mwina Neemiya na onsi yauze ukufuma uku Izlaeli, yaiile umu kutandalila Neemiya. Yaamuneenyile intazi zino aina Izlaeli yaakweti, nu kuti iviumba vya Yelusalemu vyali ivyononeke. Cii calenzile Neemiya ukuya sana nu ulanda, nupya wapefile kuli Yeova.

Uwanda umwi, umwene waweni ukuti Neemiya ali nu ulanda, lyene wa muuzizye ati: ‘I cani cino uyelile nu ulanda?’ Neemiya waswike ukuti wali nu ulanda pano umusumba wa Yelusalemu wali uononeke ni viumba ala vyawa. Lyene umwene uzizye Neemiya ati: ‘Ukulonda cani?’

Neemiya waswike ati: ‘Lekini inje uku Yelusalemu, pakuti nkakuule iviumba nupya.’ Umwene Alitakisesi wali sana ni cikuuku. Wazumiliizye Neemiya ukupita, nupya wamwavwile nu kuzana imbao zya kuomvya pa kukuula. Lino Neemiya wafisile uku Yelusalemu, waneenyile aina Izlaeli vino walondanga ukucita. Aina Izlaeli yaatemilwe sana vino Neemiya wayaneenyile, nupya yaalanzile ukuti: ‘Lekini tutandike ukukuula.’

Lino alwani ya ina Izlaeli yaaweni ukuti iviumba vyatandika ukukuulwa, yaalanzile yati: ‘Tumaya tukumoole aina Izlaeli, nu kulesya umulimo wakukuula.’ Lelo, Neemiya uvwile, nupya wapeezile aomvi amasumo ni mpanga. Nupya walanzile ati: ‘Mutatiina alwani itu. Pususyini aina inu, ana inu, yamama inu, na mang’anda inu.’

Antu yizile yasipa sana. Yaombanga ni vyanzo umusanya nu usiku. Lyene lino paapisile sile amanda 52, umulimo wakukuula iviumba wasizile. Lyene antu yaatiile ukuvwa intete umu musumba. Neemiya na Ezila yaatandike ukusambilizya aina Izlaeli amasunde yakwe Leza, nupya antu yaasansamwike cuze.

Nomba, ivintu vitaali wakwe vino caali mpiti lino aina Izlaeli yatatala yasendwa umu uzya uku Babiloni. Pa nsita ii, aina Izlaeli lyene yaatekwanga na ina Pesya, nupya yaayaombelanga. Nomba, Yeova walavile ukuti alatuma umwene umupya, nu kuti umwene wiyo alaletela antu umutende. Uzye u mwene ci wiyo? Uzye alaomba atuuli pakuleta umutende umu nsi? Paapisile imyaka 450 ala ivintu vitatala vyamanyika apilyasi lii. Lyene kwizile ikuvyalwa umwana umucindame sana. Nomba, ilyasi lilyo ili-iyeela.