UMWANACI aakuloleka paa, a Maliya. U mwanaci umwina Izlaeli, uwikalanga umu muzi wa Nazaleti. Leza wamumanyile ukuti wali a mama uwa miyele isuma. Uli mulandu uno watumiile umungeli Gabilieli kuti akamuneene amazwi yamwi. Uzye watuumanya vino Gabilieli wizile-aneena Maliya? Leka tuvwe vino wamuneenyile.

Gabilieli waneenyile Maliya ati; ‘Mwapola, wemuno watemwikwa cuze. Yeova ali naawe.’ Maliya ataatazile alolapo muntu wii. Fwandi wasakamiile sana, pano ataamanyile muno amazwi yano umungeli wamuneenyile yaalozile. Nomba Gabilieli wamuteekiizye.

Umungeli wamuneenyile ati: ‘Maliya utuvwa intete. Yeova akaazanga sana pali wewe. Ali cino ali nu kukucitila icintu icisuma sana. Uli nu kukwata umwana. Nupya ukamutemele iziina lyakuti Yesu.’

Gabilieli walondolwile ati: ‘Umwana wii alaya umukalamba, nupya alaya Umwana wakwe Leza wa Papela-pela. Yeova alamusoolola ukuya umwene, wakwe vino Davidi wali. Lelo, Yesu wene alaya umwene wa pe, nu wene wakwe ulikalilila amanda pe!’

Nawe Maliya uzizye ati: ‘Uzye ndakwata ntuuli umwana? Pano nemo ntaatwalwa. Nupya ntaatala nalaalapo nu monsi, nga ndamukwata ntuuli?’

Gabilieli waswike ati: ‘Amaka yakwe Leza yalaya naawe. Acino umwana alaamilwa ukuti Umwana wakwe Leza.’ Napya, waneenyile Maliya ati: ‘Iusya Elizabeti lupwa wako. Antu yaatangi u mukote, atange akwate aana. Nomba lola, wasya akwate umwana umonsi. Acino fwandi, pasi cino Leza angavilwa ukucita.’

Papo kwene sile, Maliya ati: ‘Nene muomvi mukazyana wakwe Yeova! Lekini cikacitike nga muno mulandiile.’ Lyene umungeli avino wapisile.

Lyene Maliya wakatwike zuwa-zuwa aya uku kutandalila Elizabeti. Lino Elizabeti umvwile Maliya akuvwanga, umwana umunda yakwe Elizabeti watandike ukupantooka pa mulandu ni nsansa. Umupasi wakwe Leza wizile pali Elizabeti, atandika ukuneena Maliya ukuti: ‘Wapaalwa sana umu yanaci yonsi.’ Maliya watenzi na Elizabeti mupiipi ni myezi itatu, nga alino aswilila ukumwao uku Nazaleti.

Pa nsita ii ala umonsi uwiziina lyakuti Yosefu wataisya Maliya. Nomba, lino umvwile ukuti Maliya ali nu kukwata umwana, walondanga ukuti ataca amutwale. Lyene, umungeli amuneena ati: ‘Utuvwa intete, wemo umutoole sile aye umuci wako. Pano Leza uwatapeela Maliya umwana.’ Awe, avino Yosefu na Maliya yaatwaliine, iyatandika nu kuloleela ukuvyalwa kwakwe Yesu..