YESU akuloleka ukuti watasoka sana paa, asi avivyo? Uzye watuumanya cino asokiile vii? Watasoka sana pano aonsi yaa aali pa ng’anda ya kupepelapo Yeova umu Yelusalemu yaaitemwa sana. Yakalondesya impiya ukufuma uku yantu aakaiza uku kupepa Leza.

Uzye watuulola ing’ombe, imfwele ni nkunda? Aonsi yakukazya inyama zii apa ng’anda kwene ii iyakupepelapo. Uzye watuumanya cino yakucitila vii? Cino yakucitila vii, u mulandu wakuti aina Izlaeli yakaloonda inyama ni vyunyi ivya kupeela impolelwa kuli Leza.

Isunde lyakwe Leza lyalanzile ukuti umwina Izlaeli ndi waifya, wali nu kupeela uwila kuli Leza. Kwali utusita na tuuze lino aina Izlaeli yaali nu kupeela amawila kuli Yeova. Nomba uzye aukwi kuno umwina Izlaeli wali nu kuzana ivyunyi ni nyama izyakupeela uwila kuli Leza?

Aina Izlaeli yamwi yaateesile inyama ni vyunyi. Aakweti ivintu vii yene citaayatalilanga ukupeela uwila. Nomba aina Izlaeli yamwi yene yataakweti inyama nanti ivyunyi. Yauze nayo iikalanga ukutali sana na Yelusalemu icakuti yataaseendanga inyama ukuya nazyo uku ng’anda ya kupepelamo. Acino antu yaayanga yakukala inyama nanti vyunyi vino yaalondanga uku Yelusalemu kwene. Nomba, aonsi aakazyanga ivintu vivyo yaakomyanga sana umutengo. Yaacenjezyanga antu. Cuze naco icakuti, antu yaaya yataalondekanga ukukazya ivintu vii apa ng’anda yakwe Leza iya kupepelapo.

Fwandi ivintu kwene vii ivyacitikanga i vyalenzile ukuti Yesu asoke sana. Lyene wapenwiile amatebulo ya yonsi yaaya ni mpiya izisalangana pansi. Nupya Yesu wapanzile swepu nu kuzingila inyama zyonsi apanzi ukufuma umu ng’anda ya kupepelamo. Lyene wakalipiile aonsi aakazyanga inkunda ati: ‘Zifumyini muno! Mute ukuomvya ing’anda yakwe Tata ukuzanilamo ulupiya ulwingi.’

Yamwi pa yalondezi yakwe Yesu yaali nawe lino ivintu vii vyacitiike apa ng’anda ya kupepelapo. Yazungwike sana ukulola vino Yesu wacitanga pa nsita iyaa. Lyene iwisye amazwi alembwa muli Baibo aakaati: ‘Ukutemwa ing’anda yakwe Leza kula-aka wa moto muli aaliwe.’

Lino Yesu wali umu Yelusalemu, uku kuzevya Ucilo, wacisile ivizungusyo ivingi. Lyene Yesu wafumile uku Yudeya nu kutandika ulwendo lwa kuswilila uku Galile. Nomba, lino wali pa lwendo, wapisile umu citungu ca Samaliya. Leka tulole ivyacitike kuuku..