YESU wapozyanga alwale, konsi kuno wayanga. Ilandwe lii lyamanyikwe umu mizi inoono ni ikalamba. Lyene antu yaaletanga alemale, impafu na yacipuuli, ngalino na alwale. Yesu nawe wayapozyanga yonsi kwene.

Ukufuma pano Yoane wawatizizye Yesu, paapisile imyaka ukucila pali itatu. Lyene Yesu waneenyile atumwa yakwe ukuti alaya uku Yelusalemu, kuno alaya akafwile, nu kwiza-tuutuluka. Pa nsita kwene ii, Yesu watwaliliile ukupozya alwale ndi vino wacitanga lyonsi.

Uwanda umwi Yesu wasambilizyanga apa wanda wi Sabata. Isabata u wanda uno aYuda yaapuuzanga. Umwanaci wino ukulola paa wali umulwale iciipisye. Apa myaka 18 ino walwalanga wakongozanga, nupya wafilwanga ukwololoka. Lino Yesu wamulemile mwenemo, watandike ukupita umwololoke. Avino umwanaci wiyo wapozile!

Yasimapepo yaasosile sana ukulola vino Yesu wacisile. Simapepo umwi wavwanzile ukwiumba ati: ‘Kwaya amanda mutanda (6) yano tulinzile ukuombamo imilimo. Amanda yaa ali yakwiza uku kupoziwa, apa wanda wi Sabata pene foo!’

Nomba Yesu waswike ati: ‘Mwemwe onsi aipe. Mwemo mungasenda punda nu kuya-mupeela amanzi akumwa pa wanda wi Sabata. Uzye umwanaci wii umupiina, uwalwala pa myaka 18, wene atange apoziwe apa wanda wi Sabata?’ Vino Yesu waswike aonsi yaaya aiipe vyalenzile ukuti yumvwe insonyi.

Lyene Yesu na atumwa yakwe yapita iyaya uku Yelusalemu. Lino yaapalamiile uku Yeliko, ya kaleenga aali impafu yuvwile kuno Yesu akupita. Acino, yaapunzile yati: ‘Yesu, twavwilizyeko!’

Yesu nawe wamile aonsi yaaya impafu, nu kuyuzya ati: ‘Uzye mukulonda imucitile cani?’ Nayo yaswike yati: ‘Mwene, tukulonda ukuti amanso iitu yatandike ukulola.’ Yesu nawe walemile umu manso ya mpafu ziizi, lilyokwene sile yatandika nu kulola! Uzye watuumanya cino Yesu wacitilanga ivizungusyo vyonsi kwene vii? Umulandu u wakuti Yesu watemwa antu nupya akaalonda ukuti yaamutaaila. Fwandi tutanga tutwisike ukuti lino alaateeka insi, kutalaya nanti awenga aalalwala nupya.