LYENE uwanda uu a pali Cini usiku. Yesu na atumwa yakwe 12 yati-iza umu muputule uu uwa papela pakuti yalye icakulya ca Ucilo. Umonsi wino ukulola akuya panzi, a Yuda Isikalyoti. Akuya uku kuneena yasimapepo ivyakucita pa kulema Yesu.

Uwanda wafumileko, Yuda waile kuli aliyo nu kuyuzya ati: ‘Mulampeela vyani nga namwavwa ukulema Yesu?’ Nayo yaamuneenyile yati: ‘Tulakupeela impiya zyakwe siluva makumi yatatu (30).’ Fwandi paa akuno Yuda akuya pakuti aize ayalange ukuli Yesu. Uzye vwile i cisuma ukucita vii?

Yesu na atumwa yaamazile ukulya icakulya ca Ucilo. Nomba Yesu wapanzile icimulo nacuze iciiyele. Wapeezile atumwa yakwe umukate nu kuyaneena ati: ‘Liini, pano mukate uu ukwimililako umwili wane uulapeelwa ku kumupususya.’ Nga alino watoozile kaapu wakwe waini nu kuyaneena ati: ‘Mwini, pano waini wii akwimililako uwazi wane, uulazwa uku kumupususya.’ Muli Baibo icimulo cii cika-amwa ukuti ‘icakulya ca manguzi ica Mwene.’

Aina Izlaeli yalyanga icakulya ca Ucilo kuti yaiusya vino umungeli wakwe Leza waciliile mang’anda yao umu Eguputo nu kumoola mayeli umu mang’anda ya ina Eguputo. Nomba, Yesu walondanga ukuti alondezi yakwe yace yamwiusya aliwe, na vino wapeezile umi wakwe ku kuyapususya. Fwandi ali cino wayaneeniile ukuti yaazevya ndi vii cila-mwaka.

Lino yaamazile ukulya Icakulya ca Manguzi Ica Mwene, Yesu waneenyile atumwa yakwe ukuti yafwile ukusipa nu kuya sana nu utailo. Awe, avino imbiile Leza injimbo nu kufuma iyapita. Papo, ala uusiku sana, limwi ala uusiku pakasi. Leka tumvwe kuno yaaile..