LOLA Yesu pa cikope wataikala. Akusambilizya antu yonsi yaa apa mwamba uku Galile. Aonsi ati-ikala apipi nawe aasambi yakwe. Paa watasoolola asambi 12 ukuya atumwa. Atumwa, aasambi yakwe Yesu aiyele. Uzye wamanya amaziina ya atumwa yaa?

Kwali Simoni Petulo nu mwinakwe Andeleya. Alino kwali Yakobo nu mwinakwe Yoane. Nakupya, kwali Yakobo namuze, alino kwali na Simoni namuze. Nga alino kwali atumwa yaili aakweti iziina ilikolane ilyakuti Yuda. Wenga yaamwamanga yakuti Yuda Iskalyoti, na Yuda muze wakweti iziina nalyuze ilyakuti Tandeo. Nupya, kwali Filipo na Natanaeli (wino yamanga nu kuti Batolomeo), alino kwali na Mateo na Tomasi.

Lino Yesu wawezile ukufuma uku Samaliya, watandike ukukosoola akuti: ‘Uwene wa mwiyulu uli apiipi.’ Uzye waumanya uwene uwo? Uuteeko wakwe Leza. Yesu ali kateeka umu wene uwo. Alaateeka umwiyulu nu kuleta umutende pano nsi. Uwene wakwe Leza ulalenga insi yonsi ukuya paladaise.

Paa Yesu akusambilizya antu pa wene uwo. Akulondolola akuti: ‘Mwapepa mwati vii: ‘Tata witu uwa mwiyulu, iziina lyako licindikwe. Uwene wako wize. Leka ukulonda kwako kucitike pano nsi ndi vino kwacitwa umwiyulu.’ Antu aingi yaka-ama ipepo lii yakuti ‘Ipepo Lya Mwene.’ Yauze nayo yakati ipepo lyakwe ‘Tata Witu.’ Nga wemo uzye ungalanda amazwi aaya umwipepo lii?

Nakapya, Yesu akusambilizya antu vino yafwile ukucitila auze. Akuti: ‘Mwacitila auzo ivintu vino mukulonda ukuti yamucitile.’ Uzye wemo usiuvwa ningo nga antu yamwi yakucitila ivisuma? Fwandi, Yesu akusambilizya ukuti tulinzile ukuya acikuuku uku yantu yauze. Uzye vwile citalaziipa sana umu paladaise lino antu yonsi yalaya ni cikuuku uku yantu yauze?