UZYE watuumanya umwanaci wii na onsi yaili aakuloleka paa? Umwanaci wii a Maliya umwina Magadala, cuza wakwe Yesu. Alino aonsi yaa yaili aazwite ivizwalo ivitiswe aangeli. Akamuputule kano Maliya akusungamila mwenemo ali muno yisile umwili wakwe Yesu lino wafwiile. Kamuputule kwene kaa i lindi. Nomba, umwili wakwe Yesu musi! Uzye a weni uwaufumizyemo? Leka tuvwe.

Lino Yesu wafwile, yasimapepo yaneenyile Pilato yati: ‘Lino Yesu atatala wafwa walanzile ukuti alatuutuluka ndi papita amanda yatatu. Fwandi mutume yamwi akuti yakaalinda ilindi. Alino asambi yakwe Yesu yatalaya yakiiye icitumbi nu kulanda ukuti Yesu watatuutuluka!’ Lyene Pilato waneenyile yasimapepo ukutuma asilika kuti yakaalinda ilindi.

Nomba, apa wanda wakwe citatu akatondotondo, ukufuma pano Yesu wafwilile, u mungeli wakwe Yeova wizile apilindi. Umungeli wii wizile akunkulusya iwe ilyali apilindi. Asilika aalindanga ilindi yuvwile intete cakuti iyafilwa nu kupita. Lyene lino yaasungamiile umwi lindi, yaaweni ukuti umwili musi! Asilika yamwi yaapisile ukuya umu musumba nu kuyasimikilako yasimapepo. Uzye watuumanya vino yasimapepo aipe yaacisile? Yaapeezile impiya asilika yaaya pakuti yalande ivyaufi. Yaaneenyile asilika yati: ‘Mulande muti asambi yakwe Yesu yaali-izile usiku ala itulaala, nu kwizaiya icitumbi.’

Pa nsita kwene iiya, yamama yamwi auze yakwe Yesu yaaile ukwilindi. Yaaile yazunguka cuze lino yaazanyile ukuti umwilindi musi umwili wakwe Yesu! Papo kwene sile, angeli yaili yaaloliike ala yazwite ivitiswe. Alino angeli yuzizye yamama yaaya yati: ‘Uzye u mulandu ci uno mwiziile umu kulonda Yesu kuno? Yesu watatuutuluka. Pitisiini, kaneniini asambi yakwe ukuti watatuutuluka.’ Awe lyene yamama yaayo yaasimwiile! Nomba, umu nzila lino yakuya, umonsi umwi waimiike. Uzye vwile watumumanya umonsi uwaimiike? Wali a Yesu! Yesu wayaneenyile ati: ‘Yangini mukaneene asambi yane.’

Lino yamama yaaya yaile yasimikilako asambi ukuti Yesu watatuutuluka, nu kuti yaamuweni, asambi yataasininkizye. Petulo na Yoane yaasimwile iyaya ukwilindi kuti yakasininkizye, nomba, yaazanyile ukuti musi mwili wakwe Yesu! Lino Petulo na Yoane yaaswilile, Maliya umwina Magadala wasiile kuuku kwene ukwilindi. Ali lino wasungamiile umwi lindi nu kulola angeli yaili.

Uzye watuumanya ivyacitike ku mwili wakwe Yesu? Leza walenzile ukuti ute ukuloleka. Leza atatuutulwile Yesu nu mwili wa untunze uno wafwililemo. Wamutuutulwile umu mwili uze wa mupasi, wakwe vino angeli yaaya. Nomba, pakuti asambi yamanye ukuti Yesu u mupuma, wizilanga umu mwili uno antu yangalola, nupya ali lyasi ililondeliilepo.