LINO amanda yakupita, Yesu walolekanga uku yalondezi yakwe maila ingi. Kwali uwanda umwi lino asambi yakwe 500 yaamuweni. Lino Yesu walolekiile kuli aliyo, uzye watuumanya vino wayaneenyile? Wayasimikiile apa wene wakwe Leza. Yeova watumile Yesu ukwiza pa mpanga ya pansi kuti asambilizye antu pa Wene. Watwalilile ukusimikila na lino watuutulwike.

Uzye ukwiusya vino uwene wakwe Leza ukapiliula? Uwene kuli kuti uuteeko wakwe Leza, uwa cumi uwaya umwiyulu, na Yesu ali Wino Leza wasoolola ukuya umwene. Twasambiliile ukuti Yesu walangiliile vino alaya umwene uwampomvu, pano waliisyanga antu aali ni inzala, wapozyanga alwale, nu kutuutulula afwe.

Uzye lino Yesu alaateeka umwiyulu apa myaka 1,000, ivintu vilaya uli pano nsi? Insi yonsi ilaya paladaise umusuma cuze. Kutalaya inkondo, upondo, ukulwala, nanti imfwa. Twasininkizya cii pano lino Leza wapanzile insi, waipanzile paladaise kuti antu yaaipakizya. Fwandi cili cino wapangiile icalo ca Edeni apa kutandika. Yesu alasininkizya ukuti vyonsi vino Leza akalonda, vice vicitike.

Lyene insita yafisile iyakuti Yesu aswilile ukwiyulu. Pa manda 40 Yesu wailangizyanga uku yasambi yakwe. Fwandi yaasininkizye ukuti watuutulwike. Nomba, lino atatala wapita ukwiyulu, waneenyile asambi yakwe ati: ‘Muce mwikale umu Yelusalemu kufikila muce mupokelele umupasi wa muzilo.’ Umupasi wa muzilo kuli kuti amaka yano Leza akaomvya, yaaya kwati umuza, uli uno ulavwa asambi yakwe ukucita vino Leza akaalonda. Lyene, Yesu wavwanzile ati: ‘Mukaakosoola pali neene ukufika kuno insi yapela.’

Lino Yesu wamazile ukulanda vii, kwacitiike icintu cimwi ica kuzungusya. Watandike ukukatuka ukuya umwiyulu, wakwe vino ukulola pa cikope cii. Lyene wingile umwikumbi, na asambi yata nu kumulola. Ali vino Yesu waile ukwiyulu ayatandika nu kuteeka alondezi yakwe aaya pano nsi.