LOLA Paulo iyamunyepelela umu munyololo, napya lola umusilika wa ina Loma akumulinda. Paulo ali umu cifungo uku Loma. Akuloleela sile kuti kateeka wa ina Loma, Kesa amupingule. Lino Paulo wali umu cifungo antu yaayazumilizyanga ukuya-mutandalila.

Lino paapisile amanda yatatu kufuma pano Paulo wailiile uku Loma, watumile aakuya-ama intunguluzi zya aYuda. Lyene aYuda aingi amu Loma iizile. Paulo wayasimikiile pali Yesu na pa wene wakwe Leza. Yamwi yaataile iyaya Aina Klistu, nomba yamwi yene yataazumiile.

Nakupya, Paulo wasimikiile uku yasilika aingi aizanga uku kumulinda. Pa myaka iili ino Paulo wali umu cifungo uku Loma, wasimikiile antu aingi wakwe cimwi. Na cii calenzile ukuti na yalupwa yakwe kateeka Kesa nayo kwene yuvwe ilandwe lisuma ilya wene, icakuti yamwi izile yaya Aina Klistu.

Nomba, nga wii atenzi paa akulemba, a weni? Uzye watumumanya? A Timoti. Insita imwi na Timoti kwene wali umu cifungo pa mulandu nu kusimikila pa wene, lelo paa yaamufumya. Lyene paa aizile ukukwazwa Paulo. Uzye watuumanya vino Timoti akulemba? Leka tuuvwe.

Uzye ukwiusya imisumba iili iya Filipi na Efeso ino twasambiliilepo umwilyasi lyalenga 110? Paulo wazwilizye antu ukutandika ivilongano vya Ina Klistu umu misumba kwene iiya. Nomba, lino Paulo wali umu cifungo, walembiile Aina Klistu yaaya amakalata. Ya kalata kwene yaayo yaaya muli Baibo, nupya tukayama tukuti Efeso na Filipi. Paa Paulo akuneena Timoti ivya kuleembela Aina Klistu yauze aku Filipi.

Aina Filipi yaasakamiile sana Paulo. Yamutumilanga ivintu ala ali umu cifungo, fwandi nawe wayalembiile kalata kuti ayataizye. Epafulodito aliwe waleesile uwila uwo. Nomba, wizile alwala sana icakuti kwasiile sile panono ukuti afwe . Nomba wapozile apekanya nu ulendo wakuswilila uku mwao. Aliwe wasenzile kalata wino Paulo na Timoti yaalembiile aina Filipi.

Lino Paulo wali umu cifungo walemvile ya kalata nayauze yaili aaya muli Baibo. Kalata wenga watumiile Aina Klistu amu musumba wa Kolose. Uzye wamanya vino tukaama kalata wiyo? Tukati Kolose. Kalata muze walembiile cuzakwe wino yaatangi Filimoni uwikalanga umu Kolose kwene. Muli kalata wiyo walanzile pali Onesimasi umuomvi wakwe Filimoni.

Onesimasi utwike ukufuma kuli Filimoni nu kupuukila uku Loma. Lino Onesimasi wiyo wali uku Loma, alino uvwile ukuti Paulo wali umu cifungo. Waile amupempula umu cifungo, nawe Paulo wasimikiile Onesimasi. Pataalengiile nu kulengela, Onesimasi aya Umwina Klistu. Lyene Onesimasi uvwile uyi ukuti utwike ukufuma kuli Filimoni. Uzye watuumanya vino Paulo walemvile muli kalata wino watumiile Filimoni?

Paulo waleenzile Filimoni ukuti aeleele Onesimasi. Walemvile ati: ‘Nkumutuma ukuti awelele kuli wewe. Nomba paa asi muomvi wako sile. Lyene u mwina umusuma sana.’ Lino Onesimasi waswiliile uku Kolose, wasenzile ya kalata yaaya yaili, wenga wamutwazile uku ina Kolose na muze wamutwazile kuli Filimoni. Filimoni afwile watemilwe sana lino uvwile ukuti umuomvi wakwe wali Umwina Klistu.

Muli ya kalata yano Paulo waleembiile aina Filipi, na Filimoni, wayaneenyile ilyasi ilisuma sana. Waneenyile aina Filipi ati: ‘Ndatuma Timoti ukuti akiize kuno muli. Nomba, nani kwene nasya nce nize uku kumutandalila.’ Lyene kuli Filimoni walemvile ati: ‘Undondeleko apakwiza-ikala lino ndiza.’

Lino Paulo wafumile umu cifungo, watandaliile aina na yankazi aali uku ncende izipusane-pusane. Nomba, Paulo yaamulemile nupya nu kumuyaalila umu cifungo uku Loma. Pa nsita ii peene wamanyile ukuti lyene yamamukoma. Acino, walembiile Timoti kalata nu kumuneena ukuti aize zuwa. Walemvile ati: ‘Nemo naaya uwa cumi kuli Leza, nawe Leza alandambula.’ Imyaka inoono sile ukufuma lino yaakomile Paulo, umusumba wa Yelusalemu onoonyilwe nupya, aina Loma aliyo izile yaonoona.

Nomba muli Baibo mwaya ivingi. Yeova Leza waneenyile umutumwa Yoane ukulemba mabuku ya kusyalikizyako amuli Baibo kumwi ni buku lyakuti Umbwilo. Ibuku lilyo likalanda pa vintu ivilacitika uku nkoleelo. Leka fwandi tusambilile pa vintu ivilacitika uku nkoleelo..