UMONSI wino ukulola pa cikope, aimi, u mutumwa Petulo, na yaayo aaimi uku nsizi aauze. Nomba i cani cino umonsi wii akufukamila Petulo? Uzye afwile ukufukamila umuntu? Uzye watumumanya umonsi wii?

A Konelio. Ali mukalamba wa asilika aina Loma. Konelio ataamanyile Petulo, nomba umungeli wamuneenyile ukuti akaame Petulo. Leka tuvwe icalenzile.

Alondezi yakwe Yesu akutandikilapo yaali aa Yuda, nomba Konelio wene ataali umuYuda. Nomba, watemilwe sana Leza, nupya wapepanga kuli aliwe, nu kwavwa sana antu yauze. Lyene uwanda umwi, akasanya, umungeli wizile kuli aliwe nu kumuneena ati: ‘Leza watemwa vino ukacita, napya ama-asuka mapepo yako. Tuma aonsi yamwi yaye yakaame umonsi wi ziina lyakuti Petulo. Akaikala uku Yopa apa ng’anda yakwe Simoni uwikalila lwa mu nkumba yakwe yemba.’

Awe, papokwene sile, Konelio watumile aonsi yamwi uku kulonda Petulo. Lyene uwanda walondeliilepo ala aonsi yaaya yakupalamila uku Yopa, Petulo wali apipaala lya ng’anda yakwe Simoni. Papakwene a pano Leza wamulenzile ukutandika ukwelenganya kwati akulola icisalu cimwi cikwika ukufuma ukwiyulu. Mu cisalu cico, ala muli inyama zya misango yonsi. Kulingana ni sunde lyakwe Leza, inyama zizyo antu yataaliinzile ukuzilya pano zitaali izisanguluke, nomba kwali izwi lino uvwile likuti: ‘Petulo we, katuka. Koma inyama zizyo ulye.’

Nawe Petulo ati: ‘Awe foo! Nemo ntaatala nalyapo inyama izikowele.’ Lelo izwi lineena Petulo liti: ‘Ute ukwama ivintu ukuti ivikowele vino Leza akuti i visanguluke.’ Cintu cii cacitiike maila yatatu. Lyene lino Petulo acili akwelenganya pali vino waweni, aonsi yano Konelio watumile, yaafisile apa ng’anda iyati yakulonda Petulo.

Nawe Petulo watentemwike, aya aneena aonsi yaaya ati: ‘A nene nemuno mukulonda. Nga kwacitika vyani?’ Lino aonsi yaaya yalondolwile ukuti umungeli waneenyile Konelio ukuti akaame Petulo, Petulo wazumiile kupita nayo. Uwanda walondeliilepo, Petulo na auze yaakatwike ukuya kuli Konelio uku Kesaliya.

Konelio wakonganiike yalupwa yakwe ni vyuza. Lino Petulo wafisile, Konelio wamupokeeliile. Wafukamiile Petulo, wakwe vino ukulola pa cikope. Nomba Petulo amuneena ati: ‘Katuka, pano nani nene muntu sile.’ I cumicumi, Baibo ikati, citaazipa ukufukamila umuntu nu kumupepa. Tufwile ukupepa Yeova wenga mpo.

Lyene Petulo wasimikiile antu yonsi akolongiine. Wayaneenyile ati: ‘Lyene nalola ukuti Leza akapokelela antu yonsi aakalonda ukumuombela.’ Lino acili akuvwanga, Leza watumile umupasi wakwe uwa muzilo, na antu yatandika ukuvwanga indimi izipusane-pusane. Lyene asambi aali aYuda aizile na Petulo yaazungwike cuze, pano yene yelenganyanga ukuti Leza watemilwe aYuda yatupu. Fwandi icintu cii cayasambilizye ukuti Leza asyalola antu amutundu umwi ukuya acindame sana ukucila amutundu uze. Icintu cii tufwile ukuciusya sana, asi avivyo?