UZYE watumumanya wiyo uwatalaala apansi? Umuntu wii a Saulo. Iusya ukuti Saulo kwene wii u walolanga amakoti ya onsi yaaya aatamanga Sitivini na mawe. Lola uluswepo luulo! Uzye i vyani ivikucitika?

Lino Sitivini wafwiile, Saulo watandike ukucuzya sana alondezi yakwe Yesu. Wayanga umu mang’anda yao nu kuyalema ayayalila umu cifungo. Asambi aingi yutukiile uku misumba yuze ali kuno iyaya yatandika ukukosoola “ilandwe lisuma.” Nomba Saulo wayanga uku misumba yuze mu kulonda alondezi yakwe Yesu. Paa lyene ali pa ulendo wa kuya uku Damasiko. Nomba, lino akuya uku Damasiko, icintu ca kuzungusya camucitikila.

Lino Saulo akupita, kwiza uluswepo kufuma umwiyulu lwamuwalila. Lyene wapona pansi, wakwe vino tukulola paa. Awe lyene auvwa izwi likuti: ‘Saulo, Saulo! Uzye i cani cino ukunzunyizya vii?’ Aonsi aali na Saulo yaaweni uluswepo luulu nu kumvwa izwi, nomba, yataamanyile ivyalanzilwe penepo.

Saulo nawe auzya ati: ‘Mwene, uzye wewe weni?’

Nupya uvwile izwi lyati: ‘Aneene Yesu wino ukuzunya.’ Yesu walanzile amazwi yaa pano lino Saulo wacuzyanga alondezi yakwe Yesu, na Yesu kwene atumvwanga ningo, uvwanga kwati ali wino yaacuzyanga.

Papo kwene sile Saulo uziizye ati: ‘Mwene, uzye ncite uli?’

Alino Yesu nawe ati: ‘Likwene katuka yanga uku Damasiko. Kuuku kwene akuno umaya ukamanye vino ufwile ukucita.’ Lino Saulo wakatwike ukuti aapita, wafizilwe ukulola pano ala amanso yati-yayalika. Alivino wapafwile nu kupafula! Lyene aonsi yano wali nayo aliyo yamulemile apikasa yamutwala uku Damasiko.

Yesu waneenyile umusambi wakwe wenga uwa mu Damasiko, ati: ‘We Ananiya katuka. Yanga uku museo uno yakati umuseo Ololoke. Ndi wafika apa ng’anda yakwe Yuda uye ukalonde umonsi uwiziina lyakuti Saulo. Nati-musoolola ukuti aye umuomvi wane umucindame.’

Ananiya nawe uvwilile vino Yesu wamuneenyile. Lino wazanyile Saulo, wisile ikasa lyakwe pali Saulo alino ati: ‘Umwene watantuma kuli wewe pakuti utandike ukulola nupya, nu kuti umupasi wa muzilo uye pali wewe.’ Papo kwene sile, vimwi ivyakozile amamba vyalukwite ukufuma umu manso yakwe Saulo, atandika nu kulola nupya.

Saulo waomvile na maka sana ukukosoola ku yantu amitundu iingi. Watandike nu kwamwa ukuti umutumwa Paulo; tulasambilila ivingi pa mutumwa Paulo. Nomba paa, leka tutale tulole vino Leza waneenyile Petulo ukuomba.