ANTU aali paa, aalondezi yakwe Yesu. Yaamuvwilile nu kwikala umu Yelusalemu. Lyene lino yonsi yaali pamwi yakuloleela, kuvwisile icongo sana umu ng’anda ino yaalimo. Kuvwisile ngati kwiza icimuza ica maka sana. Lyene kwalolekiile utumbilimbili twa moto apa mitwe ya yasambi yakwe Yesu. Uzye watuulola utumbilimbili apa mitwe yao? Uzye icintu cii cilozile mwi?

I cizungusyo cii! Pa nsita ii ala Yesu waswilila ukwiyulu kuli Isi, nupya paa ala watatuma umupasi wa muzilo wakwe Leza apa yalondezi yakwe. Uzye watuumanya cino umupasi kwene uu walenzile alondezi yakwe Yesu ukucita? Yonsi kwene yaatandike ukulandila umu ndimi izipusane-pusane.

Antu aingi amu Yelusalemu yuvwile icongo icuvwisile wa cimuza ica maka sana, nupya yaaile umu kulola icacitikanga. Antu yamwi yaafumile uku mpanga zyuze nu kwiza umu kuzevya Pentekositi. Aenyi yaayo yaazungwike sana! Yuvwanga kuno asambi yakwe Yesu yakuvwanga umu ndimi zya enyi kwene yaayo pa vintu ivisuma cuze vino Leza wacisile.

Aenyi yaalanzile yati: ‘Antu yaa yaafuma uku Galile. Nga caya uli pakuti yatandike ukuvwanga indimi izipusane-pusane izikavwangwa uku mpanga zino twafuma kweneko?’

Lyene Petulo wimiliile ukuti alondolwele antu kwene yaaya icacitiike. Watandike ukuvwangisya nu kuneena antu vino Yesu wakomilwe nu kuti Yeova wamutuutulwile. Petulo walanzile ati: ‘Lyene Yesu ali ukwiyulu ukwikasa lilunji lyakwe Leza. Nupya wataatuma umupasi wa muzilo uno walavile. Ali cino mwalolela nu kuvwa ivizungusyo vii.’

Lino Petulo wavwanzile amazwi kwene yaa, antu aingi yuvwile sana uyi pali vino vyacitikiile Yesu. Antu yuzizye yati: ‘Uzye i cani cino tufwile ukucita?’ Petulo wayaneenyile ati: ‘Mufwile ukusenuka, mute ukucita iviipe, nu kuwatiziwa.’ Lyene pa wanda kwene uuwa, antu apiipi na 3,000 yaawatiziiwe nu kutandika ukuya alondezi yakwe Yesu.