UZYE watuumanya vino akakazyana kaa na auze yakuwelenga? Yakuwelenga ibuku ilili wakwe likwene lino naawe ukuwelenga ilyakuti Ibuku Lyane Ilya Malyasi Amuli Baibo. Nupya yakuwelenga ilyasi kwene lii lino ukuwelenga ilikuti “Vyakucita Pakuti Tukikale Amanda Pe.”

Nga vino yakusambilila watuvimanya? Iyatandikilapo ukusambilila ivintu vino tufwile ukumanya pali Yeova na Yesu, pakuti tukikale amanda pe. Baibo ikati: ‘Pakuya nu umi wa pe, ufwile ukucita vii: Wasambilila pali Leza wa cumi wenga nu kusambilila pa mwanakwe, Yesu Klistu wino watumile ukwiza pano nsi.’

Tungacita uli pakuti tusambilile pali Yeova Leza na Yesu? Inzila yonga u kusambilila umwibuku kwene lii ilyakuti Ibuku Lyane Ilya Malyasi Amuli Baibo nu kulimala lyonsi. Ibuku lii likatusambilizya ivingi pali Yeova na Yesu, uzye asi avivyo? Nupya likatuneena ivingi pali vino yaacita, na vino yalacita uku nkoleelo. Nomba tutafwile ukupeleela sile apa kuwelenga ibuku lii casila.

Uzye watuulola ibuku nalyuze apa cikope lino yati-ika apansi? A Baibo. Waneena yamwi amanya ukuwelenga yakuwelengela malembelo muli Baibo apafumile malyasi aaya umwibuku kwene lii. Baibo ikatulondolwela vyonsi ivikalondekwa pakuti twaombela ningo Yeova pakuti tukaye nu umi wa pe. Fwandi tufwile ukusambilila Baibo lyonsi.

Nomba tutafwile ukupeleela sile apa kusambilila pali Yeova Leza na Yesu Klistu. Limwi tungaasambilila ivingi sana pali aliyo na vino yakaatusambilizya nomba ukwaula ukwizaya nu umi wa pe. Uzye wamanya ivintu navyunze vino tufwile ukucita?

Tufwile nu kuomba ivintu ukulingana na vino tukusambilila. Uzye ukwiusya umonsi wiiya, wino yatangi Yuda Iskalioti? Nawe kwene wali u mutumwa wakwe Yesu. Yuda wamanyile ningo sana Yeova na Yesu. Nomba, i vyani ivyamucitikiile? Watandiike ukuya na ukaitemwe, nupya wakazizye Yesu uku yalwani pa mpiya zyakwe siluva makumi yatatu (30). Fwandi, Yuda wene atalaya nu umi wa pe.

Nga Geazi wiiya wino twasambiliile Umwilyasi 69, ukumwiusya? Walondanga ukupoka impiya ni vizwalo ivitaali ivyakwe. Acino, waile asomba pakuti yamupeele ivintu viivi. Nomba Yeova wamufulwile. Nafwe nga tusikuuvwila masunde yakwe, alatonoona.

Nomba kwaya antu aingi acisinka aombelanga Yeova. A yano cingaziipa ukuti twakolanya, uzye asi avivyo? Mulumendo Samueli, tungamukolanya, pano waombanga ningo sana. Iusya vino twasambiliile umwilyasi 55 muno tuvwile ukuti watandike ukuombela Yeova apa ng’anda ya kupepelapo ala ali sile ni myaka ya kuvyalwa 4 nanti 5. Naawe kwene, nandi ungaya umwance uli, utanga uvilwe ukuombela Yeova.

Yesu Klistu ali wino swensi kwene tungatemwa ukukolanya sana. Nanti sile lino wali umwance, wakwe vino twasambiliile umwilyasi 87, waile aikala umu ng’anda ya kupepelamo atandika nu kulanda na antu pali Isi wa mwiyulu. Tulinzile ukumukolanya. Tufwile ukuneenako antu aingi pali Leza witu Yeova, nu Mwanakwe Yesu Klistu. Ndi tumacitanga vii, tulikala amanda pe muli paladaise wino Leza alatupangila pa mpanga ya pansi.