Satana ni viwa vyakwe yasilonda kuti mwaombela Leza. Yakalonda kuti antu yonsi yapondokele Leza. Uzye umu nzila ci muno yakacitila vii? Inzila yonga, i mipepele ya ufi. (2 Kolinto 11:13-15) Ndi ca kuti imipepele isisambilizya icumi ica muli Baibolo, ala imipepele iiyo iya ufi. Mipepele ya ufi yakola impiya zya ufi—zingaloleka wa mpiya zya cumi, fwandi zisi zilizyo. Imipepele yiyo ingamutwala sile umu ntazi.

Ufi wa mu mipepele utanga uzanzye Yeova, pano a Leza wa cumi. Lino Yesu wali apa mpanga ya pa nsi, kwali iumba lyakwe yakapepa ilyalondanga ukumukoma. Yene yalolanga kwati imipepele yao i yali ya cumi. Yavwanzile yati: “Swemo twakwata Tata wenga sile, na wi a Leza.” Uzye Yesu wayazumilizye? Awe foo! Wayanenyile ati, “Mwemwe ana ya Musomvi, wi ali so.” (Yoane 8:41, 44) Na ndakai kwene, antu ingi yakalola kwati yakapepa Leza, nomba umu cumi wino yakaombela a Satana ni viwa vyakwe!—1 Kolinto 10:20.

 Ndi vino icimuti ciipe cikaseeka ivizao viipe, avino ni mipepele ya ufi na yo yaya, yakwata antu akacita iviipe. Umu nsi mwaya intazi pano antu yakacita ivintu viipe. Mwaya upulumusi, ulwete, uwivi, ukutitikizya antu, ukomi, nu kulaala anaci uku maka. Aingi akacita ivipe vii, yakwata na kuno yakapepa, nomba imipepele yao isiyasambilizya ukucita ivisuma. Yatanga yaye yacuza yakwe Leza ndi yatatiile ukucita iviipe.—Mateo 7:17, 18.

Mipepele ya ufi ikasambilizya antu ukupepa uku tuluwi. Leza wakaanya ukupepa uku tuluwi. Isunde lii lyaya sile ningo. Uzye mwemo munguvwa ningo ndi ca kuti umuntu umwi asilonda ukumuvwanzya, suka ukuvwanzya icikope cinu? Uzye umuntu wiyo angaya cuza winu uwa cumi? Awe foo, atanga aye. Yeova akalonda kuti antu yamuvwanzya, asilonda antu yavwanzya ivimumbwa vya yantu, nanti vikope ivitaya nu umi.—Kufuma 20:4, 5.

Mipepele ya ufi ikasambilizya antu ukuti ukukoma kwaya sile ningo mu nsita ya nkondo. Yesu wavwanzile ukuti yacuza yakwe Leza yalatemwana. Tutanga tukome antu yano twatemwa. (Yoane 13:35) Nanti sile antu aipe, na yo kwene iciipe ukuyakoma. Lino alwani yakwe Yesu izile mu kumulema, alondezi yakwe yalondanga ukukatusya ulwete pa kuti yamucingilile, nomba Yesu wayalesizye.—Mateo 26:51, 52.

Mipepele ya ufi ikasambilizya ukuti aipe yalacuziwa umu moto usizima. Nomba Baibolo yene ikasambilizya ati, umuntu nga akucita iviipe akaafwa. (Loma 6:23) Yeova a Leza wa lukundo. Uzye Leza wa lukundo angalukulacuzya antu manda yonsi? Atanga acite! Umu Paladaise, mulaya upefi onga sile, uno Yeova umweneco watemwa. (Uumbwilo 15:4) Mipepele yonsi iikalondelela ufi wakwe Satana ilafumapo.