Yeova atalaleka antu aipe ukonona Paladaise. Yacuza yakwe atupu aliyo yalaikalamo. Nga lyene antu aipe yene cilaya uli? Nga mukulonda ukumanya icasuko, mwelenganye pi lyasi lyakwe Nowa. Nowa waliko mpiti sana. Wali umuntu musuma wino wezyanga na maka ukucita vino Yeova akalonda. Nomba antu yauze yene yacitanga iviipe. Acino Yeova wanenyile Nowa ati alaleta mulamba aalonona antu yonsi aipe. Wanenyile Nowa ati akuule iciwato icikulu ca kuti Nowa nu lupwa lwakwe yace yapusukilemo lino mulamba aliza.—Utandiko 6:9-18.

Nowa nu lupwa lwakwe yakuuzile iciwato. Nowa wacelwile antu ukuti mulamba aliza, nomba antu yene yatamuvwilile. Yatwalilile sile ukucita iviipe. Lino yamazilu kukuula iciwato, Nowa wingizye inyama mu ciwato, alino nawe pali pamwi nu lupwa lwakwe iyingila. Lyene Yeova waleesile imvula iikalamba. Imvula yiyo yatonyiizye manda makumi yani (40) musanya nu usiku. Mulamba waziile insi yonsi.—Utandiko 7:7-12.

 Antu aipe yafwile, nomba Nowa nu lupwa lwakwe yene yapuswike. Yeova wayapuswisye kuli mulamba nu kuyaleta umu nsi umutaali ui. (Utandiko 7:22, 23) Baibolo ikati nakapya kwene, insita ikwiza lino Yeova alonona yonsi aakakaana ukucita ivintu visuma. Asuma yene atalayonona. Yalikala muli Paladaise pano kwene pa mpanga ya pa nsi amanda yonsi.—2 Petulo 2:5, 6, 9.

Na ndakai kwene antu yakacita ivintu viipe. Insi yazulamo malanda. Yeova akatuma ya Nte yakwe maila na maila a kucelula antu, nomba antu aingi yasilonda ukutezya amazwi yakwe Yeova. Yakakaana ukuta imisango yao. Yasilonda ukuzumila vino Leza walanda ukuti vili visuma nanti vili viipe. Uzye icani cilacitika ku yantu yaa? Uzye manye uwanda umwi yalazenzuka? Antu aingi yatalatala yazenzuke. Insita ikwiza lino antu aipe yalononwa, kapya yatalatala yayepo apuma foo.—Masamu 92:7.

Insi yene italononwa; yalaisenula ukuya paladaise. Yacuza yakwe Leza yalikala amanda yonsi muli Paladaise wa pano nsi.—Masamu 37:29.