Satana akalonda kuti mwacita ivya malele. Antu aingi yakapeela mawila ku vikolwe vyao ivyafwa nanti uku mipasi kuti yaicingilile uku viipe. Icikalenga yacita vii, ukoopa imipasi. Yakazwala ukasi wa malele nanti incilizi. Yakamwa nanti ukupakala imilembo imwi ino yakati ingayapeela amaka ya kucita ivya malele. Mu mang’anda yao nanti pa misolo, yamwi yakaziikapo ivizimba ivya kuyacingilila. Yamwi yakaomvya imilembo pano yakalola kwati alino ivintu vingapita ningo mu uculuzi wao, pa kweziwa kwa ku sukulu nanti lino yataisyanya.

Ndi mukulonda ukucingililwa ku viipe vyakwe Satana, mulinzile ukuya cuza wakwe Yeova. Yeova Leza na angeli yakwe yakwata amaka ukuluta Satana ni viwa vyakwe. (Yakobo 2:19; Uumbwilo 12:9) Yeova akalondesya ukuomvya amaka yakwe ku kucingilila yacuza yakwe, kuli kuti antu yonsi akamutontela umu cumi.—2 Milandu 16:9.

Izwi Lyakwe Leza likati: “Mutacita malele.” Yeova wapata malele nu ulozi pano aakacita ivintu vii, yakaomviwa na Satana Ciwa.—Levi 19:26.