Vintu viipe vino vikucitika pano nsi ulangilizyo wa kuti Paladaise ali pa piipi. Baibolo yalanzile ukuti tulalola ivintu vipisye nga kwasyala panono kuti Paladaise ize. Ya kwene yaa, ali manda yano tulimo! Lolini vimwi vimwi vino Baibolo yasowile ukuti vilaacitika:

Nkondo zikalamba. “Inko zilakatukilana, na mawene yalakatukilana.” (Mateo 24:7) Usowelo uu wafikiliziwa. Kutandika umu 1914 kufika ndakai, kwacitika inkondo zya nsi yonsi ziili ni nkondo zyuze izinono. Nkondo zii zyakoma antu aingi wakwe cimwi.

Ndwala izivula umu nsi yonsi. Kulaya ‘impungo [vikuko] mumwi mumwi.’ (Luka 21:11) Uzye icintu ci cacitika? Ee cacitika. Indwala zyakwe ya kansa, izya ku mwenzo, TB, malelia, AIDS, ni ndwala zyuze, zyakoma antu iingi sana.

Kuulizya ivya kulya. Umu nsi yonsi mwaya antu atakwata ivya kulya vikumanile. Antu aingi sana yakafwa cila mwaka ku mulandu ni nzala. Uu ulangilizyo na unze wa kuti Paladaise yatipalama. Baibolo ikati: ‘Kulaya ni vipowe.’—Mako 13:8.

 Vilundumusi. ‘Kulaya vilundumusi mu ncende zimwi zimwi.’ (Mateo 24:7) Icintu cii na co cikucitika umu manda yitu. Antu kucila pali 1 milyoni yaafwa umu vilundumusi ukutandika umu 1914.

Antu aipe. Antu ‘yalatemwisya impiya’ kapya ‘yalaitemwa.’ “Yalatemwa ivya kuizanzya kuluta kutemwa Leza.” Ana “yatalayela akwasi yao.” (2 Timoti 3:1-5) Uzye musikuzumila ukuti ndakai kwaya antu iingi a musango uu? Yasyamucindika Leza nupya yikalila sile ukucuzya auze akalonda ukusambilila pali Leza.

Upondo. Kapya “antu yalaifya ukuluta.” (Mateo 24:12) Kwene na mwe kwene mungazumila ukuti upondo iuvulilako kuluta vino wali mpiti. Antu yonsi pa mpanga ya pa nsi yangayiyila, ukuyasomba, nanti ukuyacisa pano upondo iuvula.

Vintu vyonsi vii icili cimanyililo ca kuti Uwene Wakwe Leza uli mu piipi. Baibolo ikati: “Lino mulalola ivintu vi vikucitika, mulamanya vino Uwene wakwe Leza uli pipi nu kwiza.” (Luka 21:31) Uzye Uwene Wakwe Leza icani? Uuteko wakwe Leza uwayu mwi yulu uno ulaleta Paladaise pano nsi. Uwene Wakwe Leza ulafumyapo mauteko ya yantu kuti uliwo uce wateka.—Daniele 2:44.