Mungamanya Yeova ndi mukuwelenga Baibolo. Mpiti sana Leza wasolwile antu yamwi kuti yalembe amelenganyo yakwe. Na vino yalemvile vili vino tukaama tukuti Baibolo. Ndakai tungamanya Leza ndi tukuwelenga Baibolo. Nakapya Baibolo, Izwi lyakwe Leza, pano umwaya amazwi nanti ilandwe lyakwe Yeova. Tungataila vino Baibolo ikalanda pano Yeova asitumpoka. ‘Leza atangatumpoke.’ (Ayebulai 6:18) Mu Izwi Lyakwe Leza mwaya icumi.—Yoane 17:17.

Baibolo yaya pa vintu ivisuma sana vino Leza watupeela. Yaya wakwe kalata uno isi watumila ana yakwe yano watemwa. Ikatunena pa ulayo wakwe Leza uwa kusenula insi ukuya impanga isuma iya kwikalamo, kuli kuti paladaise. Ikatunena pa vintu vino Leza wacitiile ana yakwe a cumi mpiti, na vino akuyacitila ndakai, alino na vino alayacitila ukunkolelo. Kapya Baibolo kwene i, ikatwazwa kucimvya intazi zitu nu kuzana insansa.—2 Timoti 3:16, 17.

 Ya Nte Yakwe Yeova acuza yakwe Leza; aliyo yalamwazwa ukuvwikisya cino Baibolo ikasambilizya. Mwemo mungayanena sile muti mukulonda ukusambilila Baibolo. Yasilipilisya nu kulipilisya. (Mateo 10:8) Alino na cuze cino mungacita, mungaaya nu mu kukongana kwa ina Klistu. Kukongana kuu, kukayela mu Mang’anda ya Wene. Ndi ca kuti mwatandika ukuya umu kukongana kwa ina Klistu, mulamanya Leza zuwa zuwa.

Mungasambilila pali Leza ku vintu vino wapanga. Ca kulolelako a ici cino Baibolo ikati: ‘Leza waumvile iyulu ni nsi.’ (Utandiko 1:1) Lino Yeova ‘waumvile iyulu,’ wapanzile na kasanya. Uzye lyene icintu ci cikutusambilizya cani pali Leza? Cikutusambilizya ukuti Yeova wakwatisya maka. Pano uwakwatisya maka, aliwe wenga sile angapanga icintu ca maka wa kasanya. Cintu cii cikutusambilizya nu kuti Yeova wakwata amano, pano uwa mano sile aangapanga kasanya ka kuti kangaleta icikailila nu luswepo ukwaula kuti kene kazime.

Vintu vino Yeova waumba a kuno tukaalolela ukuti watutemwa. Elenganyini pa misango uwingi ya vizao vino vyaya pano nsi. Yeova nda atemwa, nga wapanzile sile umusango onga, nanti sile ukukana pangapo uuli onsi. Nomba Yeova watupezile imisango iingi ya visekwa vipusanepusane mu mipangilwe, ukulu, milolekele, na vino vikauvwika ndi twalya. Fwandi cii, a cino tungalolelako ukuti Yeova a Leza uwatutemwa, uwa wiila, watusakamala kapya uwa luse.—Masamu 104:24.