Ndi mukulonda ukuya cuza wakwe Leza, mulinzile ukumupepa umu nzila ino umweneco akalonda. Yesu wavwanzile ukuti “yakapepa acumi” yaali nu kupepa Leza ukulingana ni “cumi.” (Yoane 4:23, 24) Kwaya sile inzila yonga iyampomvu iya kupepelamo Leza. (Efeso 4:4-6) Upefi wa cumi ukatwala uku umi wa pe, lyene imipepele ya ufi yene ikatwala uku ononesi.—Mateo 7:13, 14.

Mungamanya upefi wa cumi ndi mwalola vino antu aaya mwenemo yakacita ivintu. Antu aakapepa umu cumi yalinzile ukuya antu asuma, pano Yeova wino yakapepa umusuma. Cimuti ca muolenji icisuma cikaseeka maolenji asuma, avino ni mipepele ya cumi yaya, yakwata antu asuma.—Mateo 7:15-20.

Yacuza yakwe Yeova yacindika sana Baibolo. Yamanya ukuti Baibolo yafuma kuli Leza. Yakaleka ivyayamo kuyatungulula umu wikazi wao, nu kuyazwa ukumala intazi zyao, alino nu kuyazwa ukusambilila pali Leza. (2 Timoti 3:16) Yakaezya na maka ukucita vino yakasimikila.

 Yacuza yakwe Yeova yatemwana. Yesu wasambilizyanga antu pali Leza, nu kuyapozya indwala kuti ayalange ukuti wayatemilwe. Na akapepa umu cumi yatemwa antu yauze. Yakakolanya Yesu imiyele, wino atasuuzile apiina nanti antu a mitundu yuze. Yesu walanzile ukuti alondezi yakwe yaali nu kumanyikilwa ku kutemwana.—Yoane 13:35.

Yacuza yakwe Leza yacindika izina lyakwe Leza ilya kuti Yeova. Uzye ndi ca kuti umuntu umwi asilonda ukuomvya izina linu, angaya cuza winu sana? Awe foo! Ndi twakwata cuza witu, tukaomvya izina lyakwe, kapya tukasimikila antu ivisuma pali aliwe. Acino fwandi yonsi yano yakulonda ukuya yacuza yakwe Leza yalinzile ukuomvya izina lyakwe nu kusimikila antu pali aliwe. Yeova akalonda kuti twacita vii.—Mateo 6:9; Loma 10:13, 14.

Yacuza yakwe Leza yakasambilizya antu pa Wene Wakwe Leza ndi vino na Yesu wacisile. Uwene Wakwe Leza uli uteko wa mwi yulu uno ulaleta paladaise umu nsi. Yacuza yakwe Leza yakasimikila antu ilandwe lisuma ilya Wene Wakwe Leza.—Mateo 24:14

Ya Nte Yakwe Yeova yakaezya na maka ukuya yacuza yakwe Leza. Yacindika Baibolo, napya yatemwana. Yakaomvya izina lyakwe Leza nu kulicindika kapya yakasambilizya antu pa Wene Wakwe Leza. Ndakai ya Nte Yakwe Yeova atupu ali yano yakapepa umu cumi pano nsi.