ISAMBILILO 2
Uzye Leza wa Cumi A Weni?
1. U mulandu ci uno tulinzile ukupepela Leza?
Leza wa cumi ali Kaumba wa vintu vyonsi. Pataaya pano wene watandikiile ukuyako kapya atalatala apeleele. (Masamu 90:2) Ali Mweneco wi lyasi lisuma ilyaya umu Baibolo. (1 Timoti 1:11) Tulinzile ukupepa Leza wenga mpo, pano aliwe watuumvile.—Welengini Umbwilo 4:11.
2. Uzye Leza waya umu musango ci?
Kutaya umuntu watala walolapo Leza, pano Leza u Mupasi; kuli kuti ataaya wa viumbwe vyonsi ivyaya pano nsi, wene waya papelapela. (Yoane 1:18; 4:24) Nomba tungamanya vino Leza waya na vino akaelenganya ndi twalola ivintu vino wapanga. Tulande pa vizao uwingi na maluwa vino wapanga; cumi kwene vikatulanga ukuti watutemwa kapya u wa mano. Lyene ndi twalola uumbo onsi vino wakula, i cumi cumi tungati wakwata maka cuze.—Welengini Loma 1:20.
Ndi twawelenga Baibolo, alino tungamanyilapo ivingi pali Leza. Ikatusambilizya vino Leza watemwa na vino wapata; vino akaomba na antu, na vino akacita nga ivintu vimwi vyacitika.—Welengini Masamu 103:7-10.
3. Uzye Leza wakwata izina?
Yesu walanzile ati: “Tata witu wino alu mwi yulu, Izina lyako liye nu muzilo.” (Mateo 6:9) Kwaya inzila izingi zya kwamilamo Leza, nomba izina lyakwe lyaya sile lyonga. Izina lilyo yakalilumbwila umupusane-pusane ukulingana nu lulimi luno mukuomvya. Mu ciMambwe-Lungu yakati “Yeova.” Nomba kwayako antu yaunze akaati “Yawe.”—Welengini Masamu 83:18.
Izina lyakwe Leza yalifuuta umu maBaibolo iingi nu kulipyanikizyapo na mazina ya malumbo a kuti Umwene nanti Leza. Nomba lino Baibolo yalemvilwe, izina lyakwe Leza amuno lyali maila mupiipi na 7,000. Lino Yesu wasambizyanga antu pali Leza, wayasambizyanga ni ziina lyakwe Leza.—Welengini Yoane 17:26.
Tambini vidyo ya kuti Uzye Leza Wakwata Izina?
4. Uzye Yeova akatusakamala?
Leza akatusunga pa kuti twaikala ningo lyonsi, wako vino umonsi wii akusakamala umwanakwe
Uzye lyene vino antu yakaalu-kucululuka vii, tungati Yeova atatusakamala? Antu yamwi yakati Yeova aaliwe akaleka kuti twacula pa kuti alole ndi ca kuti twamutemwa; nomba vyonsi vii, uufi.—Welengini Yakobo 1:13.
Leza wapeela antu insambu zya kuicitila vyonsi vino yakulonda. Kuli kuti fwandi watucindika. I cumicumi tukamutaizya pa kutupeela untungwa wa kuisolwela ukumuombela, nandi foo. (Yoswa 24:15) Nomba antu aingi yasolola ukulacuzya aunze; acino ucuzi wavulila vii. Yeova asitemwa ukulola ulufyengo lwa musango uu.—Welengini Utandiko 6:5, 6.
Yeova watusakamala wakwe cimwi. Akalonda kuti twaikala ningo. Likwene sile wasya ace afumyepo ucuzi onsi kumwi na antu kwene akacuzya auze. Pa nsita yii, umwineco wamanya cino wazumilizizya ukuti ucuzi utwalilile pa nsita inono. Mwi Sambililo lyalenga 8 amuno tulalola icalenga kuti azumilizizye ucuzi.—Welengini 2 Petulo 2:9; 3:7, 13.
5. Tungacita uli pa kuti Leza aye cuza witu?
Yeova akalonda kuti tuye yacuza yakwe. Nga tukulonda ukuya yacuza yakwe Leza, tulinzile ukupepa kuli aliwe. Fwensi watusumbako mano. (Masamu 65:2; 145:18) Akalondesya ukutwelela ndi twaluvyanya. Akalola vino tukaezya na maka ukucita vino watemwa; akalola nu kuti insita zimwi tukavilwa ukucita ivisuma. Acino fwandi, nanti ica kuti tutamalilika, tungaya yacuza yakwe Leza yano watemwa.—Welengini Masamu 103:12-14; Yakobo 4:8.
Yeova aaliwe watuumvile, acino tulinzile ukumutemwa sana ukuluta na vino twatemwa antu yonsi. (Mako 12:30) Lyene ndi mukulonda kuti muce mupalamile sana kuli Leza, mwalangizya ukuti mwamutemwa. Na vino mungalangizya ukuti mwamutemwa u kulasambilila pali aliwe nu kulacita vyonsi vino akumuneena.—Welengini 1 Timoti 2:4; 1 Yoane 5:3.
