1. Uzye tungacita uli pakuti twazanzya Leza?

P AKUTI twaipakizya ucuza usuma na Leza, tutafwile ukulacitako ivicitwa ivyaya umu mipepele yaufi. Tufwile ukupepa Leza umu cumi. Ndakai kwaya antu aingi sana aakapepa Leza umu cumi.

2. Uzye aukwi kuno ya Nte Yakwe Yeova yangazanwa, nupya umulimo ci uno yakaomba?

² Wakwe vino Baibolo yasowile, yakapepa a cumi yaya “iumba likulu cuze” ukufuma “umu nko zyonsi, mu mitundu yonsi ya antu mu misango yonsi ya antu, nu mu ndimi zyonsi.” (Umbwilo 7:9) Mu mpanga ukuluta pali 235, ya Nte Yakwe Yeova ukucila pali 7,000,000 yakaombesya ukwazwa antu ukusambilila pali vino Yeova akaalonda twacita.

3. A weni wino ya Nte yakapepa, alino i mipepele ci ino yakakaana?

³ Ya Nte yamanya ukuti Yeova aliwe sile alinzile ukupepwa. Yasifukamila iviluwi nanti ivikope. (1 Yoane 5:21) Yasipepa afwe; pa ndosya yasifuvya utulo ku mulandu ni ntambi, nanti ukucita ivya ntambi ivikatungilila ivizumilo vya ufi ivyaya umu mipepele na “masambilizyo kufuma ku mipasi ya nkota.” (1 Timoti 4:1) Yene yakakomelezya antu yano yafwilwa lino yakayaneenako vino Leza walaya ukuti alatutulula afwe pa kuti yace ikale umu paladaise pano nsi.—Yoane 5:28, 29; Milimo 24:15.

4. Uzye antu yakwe Leza yakacitako ivya malele?

⁴ Ya Nte yasicitako ivya malele, uwanga, nanti ulozi, pano yamanya ukuti vyonsi vii vikafuma kuli Ciwa. Yasitaila ukuti ivya malele vili vino vingayacingilila, yene yataila Yeova.—Amapinda 18:10.

5. Uzye i cani icikalanga ukuti ya Nte yataya “wa antu amu nsi”?

⁵ Yesu walanzile ukuti asambi yakwe yatalaya “wa antu amu nsi.” (Yoane 17:16) Nanti a Yesu kwene wakaanyile ukuya umu vikanza vya miteekele ya mpanga. (Yoane 6:15) I cilicimwi na ya Nte kwene, nayo yataaya umu vikanza vya miteekele, yasyacindikisya impanga ino ikalamo, nanti ukulola kwati aliyo yacindama ukuluta aunze. Nomba, yakalipila imisonko, kupya yakauvwila masunde ya mpanga kuno yikala.—Yoane 15:19; Loma 13:1, 7.

6. A masunde ci yano aomvi yakwe Leza yakauvwila pa vya utwazi nu kutaana?

⁶ Ya Nte yakauvwila masunde ya uteeko, a cino yakauvwila isunde lya uteko pa kutwala, nanti ukutwalwa. (Tito 3:1) Nupya yasitwala impali pano yakauvwila masunde yakwe Leza. (1 Timoti 3:2) Nakupya, aomvi yakwe Leza yakauvwila ni visinte vya masunde, cili cino yene yasitaana citaane-taane.

7. Uzye ya Nte yakalaanga uli ukuti yatemwana?

⁷ Ya Nte yatemwana. Kutemwana kuu, alino nu kutemwa kuno yatemwa Leza, kukayalenga ukuombela pamwi nu kuuvwana nanti cakuti yapusana umu mitundu ni indimi. Ndi kwacitika uzanzo uwipisye, nanti ndi yamwi yali ni ntazi, ya Nte yakaavwana. Ivintu vino ya Nte yakacita, vili vino vikalaanga ukuti yaya nu kutemwa.—Yoane 13:35.

8. I vicitwa ci iviipe vino antu yakwe Leza yakasenkako?

⁸ Aomvi yakwe Yeova yakalemasya ukuti yaya acumi nupya amiyele isuma. Yene yasyaiya, kusomba, kucita upulumusi, kukoleka, nanti ukukaanaya na ucisinka mu vya uculuzi. Aonsi yasyauma aci. Yamwi lino yatatala yaya ya Nte yacitanga iviipe kwene vii, nomba yatiile pano Yeova wayaazwilizye. Leza wayaweni ukuti ‘yaswefiiwe.’—1 Kolinto 6:9-11.

9. Uzye ibuku limwi lyalanzile liti uli pa macalici amu Africa?

⁹ Amu mipepele iingi yakaitaka ukuti yamanya  icumi. Limwi yangaalozya nu ku milimo ino yakaomba iyakwazwilizya antu. Wakwe vino caya umu macalici amu Africa, ibuku limwi likati: “Milimo ya kwe yakacita ya malele na ya sing’anga yasila, lyene kwasyala sile [aina Klistu] . . . Yakaitaka ukuti yakaomba ivipezya mano. Ya kasema yao yakataka ivilolwa, nupya yakasokolola iviloto. Yakaomvya manzi amuzilo, mafuta amuzilo, itwi, ya kandulo, ni vyakoca vinunkile ku kupozya nanti ukulesya indwala.”

10, 11. Uzye u mulandu ci uno tungati ivintu vino yakati i vipezya-mano, visi ivikaalanga ukuti imipepele yafuma kuli Leza?

¹⁰ Antu aya umu mipepele ii yakataka ukuti ivipezya-mano i vikasinila ukuti Leza aka-avwa imipepele iyo. Nomba ivintu vino yakati i vipezya mano visilaanga ukuti Leza watemwa imipepele kwene iyo. Satana aakapeela amu mipepele yaufi imwi-imwi amaka yakucita “ivizungusyo vyaufi.” (2 Tesalonika 2:9) Nakapya, Baibolo yasoowile ukuti mawila yakwe Leza akucita ivizungusyo aali wa ukusesema, kuvwangila umu ndimi zisyauvwika, nanti ukumanya vimwi ivitale, ukuti “vyonsi kwene vilasila.”—1 Kolinto 13:8.

¹¹ Yesu walanzile ati: “Asi muntu wensi akangama ati, ‘Mwene, Mwene’ alingila mu Wene wa mwiyulu, suka sile yao akacita kulonda kwakwe Tata uwa mwiyulu. Pa wanda ulya uwa upinguzi, aingi yalavwanga kuno ndi yati, ‘Mwene, Mwene uzye asi mwizina lyako amuno [twasesemelanga?] Uzye asi mwi zina lyako amuno twafumizizye mipasi yankota, nu kucita ivinjelengwe? Lyene nani ndayanena paswe inti, ‘Ntamumanyile, fumini pano, mwe yakacita ya viipe.’”—Mateo 7:21-23.

12. Uzye aantu ci aalingila umu Wene wa mwiyulu?

¹² Nga fwandi, aantu ci aalingila umu Wene wa mwiyulu? A yayo aakacita vino Yeova akaalonda.

13. U mulimo ci uno Leza waneena antu yakwe ukuomba ndakai, alino aaweni aakauomba?

¹³ Uzye i vyani vino Leza akaalonda ukuti antu yakwe yaacita? Yesu watiile: “Landwe Lisuma lii lya Wene lilakosolwa mu nsi yonsi kuya umboni ku antu amu nko zyonsi.” (Mateo 24:14) Uu uli mulimo uno ya Nte Yakwe Yeova yakaombesya ndakai.

14. Uzye Uwene wakwe Leza i cani, kupya aaweni aalateeka umu Wene uu?

¹⁴ “Umu nsi yonsi,” ya Nte Yakwe Yeova yakakosoola pa Wene Wakwe Leza ukuti uli uteeko wa mwiyulu uulateeka ningo insi yonsi. Yakasambizya ukuti Yeova wasonta Klistu Yesu ukuya Umwene wa Wene uuwa, nu kuti alateekela pamwi na ya kateeka yauze 144,000 asoololwa ukufuma pano nsi.—Danieli 7:14, 18; Umbwilo 14:1, 4.

15. Uzye Uwene ulonoona vyani?

¹⁵ Ya Nte yakaomvya Baibolo ukuneenako antu ukuti Uwene Wakwe Leza ulonona ivintu vyakwe Satana vyonsi. Ni mipepele ya ufi ale yonoonwa mpiti kumwi ni visambilizyo ivyayamo ivisyacindika Leza nupya ivikalumbanya Ciwa! (Umbwilo 18:8) Kapya, na mauteeko ya antunze kwene aakakaanya Leza ala yonoonwa mpiti!—Danieli 2:44.

16. Aaweni aalaya ateekwa yakwe Klistu Yesu, kupya yalikala kwi?

¹⁶ Nakapya, ya Nte Yakwe Yeova, yakasambilizya ukuti Klistu Yesu alaleetela ivintu visuma yonsi aakacita vino Leza akaalonda. Antu yayo ali yano yalaya ateekwa yakwe pano nsi. Baibolo yalaya ukuti: ‘Alatuula umupiina aakuleenga uwazwilizyo, na aakucula na wensi atakwata uwa kumwavwa. Aluvwila mizu wino akucula nu mupina, kupya alapususya apiina.’—Masamu 72:12, 13.

17. Aaweni sile aakakosoola pa Wene Wakwe Leza?

¹⁷ Kutaaya antu na yauze aakakosoola ilandwe lisuma ilya wene pakuti yacita vino Leza akaalonda. A ya Nte Yakwe Yeova sile aakasambilizya pa Wene Wakwe Leza umu nsi yonsi.