1. Uzye ndi ‘twapalama kuli Leza,’ i vyani ivilacitika?

YEOVA watemwa antu aakamuombela. Namwe nga mukupepa Yeova alamupolelela ndakai nu ku nkoleelo. Baibolo ikati: “Mupalame kuli Leza, nawe amapalama kuno muli.”—Yakobo 4:8.

2. Tungacita uli pa kuti tuye yacuza yakwe Leza, kupya tufwile ukupepa uli?

² Pakuti mupalame kuli Leza, nu kuya cuza wakwe, mufwile mwasambilila Izwi lyakwe nu kuomvya vino mukusambilila. Nga mukupepa kuli Yeova ukulingana na vino akaalonda, aluvwa nu kwasuka mapepo inu. Mutumwa Yoane walemvile ati: “Twasininkizya ukuti ndi twamulenga wene akatuvwa nu kutwasuka pali consi cino twalenga ukulingana nu kulonda kwakwe. Lyonsi lino twamulenga akatuvwa. Twamanya ukuti cii ica cumi. Nupya twamanya ukuti wene akatupela vyonsi vino tukamulenga.”—1 Yoane 5:14, 15.

3-7. Tungacita uli pakuti tuye na mano aakafuma kuli Leza, alino uzye amano kwene yayo yangatwazwa uli?

³ Nakupya, ndi mwaya cuza wakwe Leza, alamupeela amano akucimvizyamo intazi. Baibolo ikati: “Ndi umwi uwa munomuli ulilwa mano, wene alinzile kulenga Leza.”—Yakobo 1:5.

⁴ Uzye amano aakafuma kuli Leza yangamwavwa uli? Ca nkoleelo, amano yayo yangamwavwa ukumanya ivintu vino Yeova wapata. Kupya, mungamanya umulandu uno ivintu vivyo viipila, na vino mungasenka uku viipe kwene vivyo. Ndi mwamanya ivya kucita, mulacingililwa uku ntazi izingi zino aingi yaya nazyo. Antu yakwe Leza aakauvwila isunde lyakwe ilyakuti tufwile ukuya ni miyele isuma, yasiya na mavya aali wa ukupula inda, kwambula indwala izikaiza ku mulandu nu upulumusi, kukanaya ni nsansa umu cupo nanti ukutaana.

⁵ Nga vyuze i vyani vino amano aakafuma kuli Leza yalamwavwa ukucita? Mulaaya ni nsansa lyonsi. Mulamanya ivya kucita nga mukulonda ukuomba vimwi, wakwe ukuomvya ningo impiya. Mulaasoolola ningo ivya kucita, asi kusoolola ivintu ivitacindama sana.

⁶ Mano aakafuma kuli Leza yalamwazwa nu kuuvwana ningo na antu yauze. Mulaya ni nsansa umu lupwa. Mulakwata ivyuza visuma, nupya antu yalaamucindika, kumwi na yayo aasiombela Leza.

⁷ Nakupya, ndi mwaya na mano aakafuma kuli Leza, mutalaasakamala sana pa ntazi zya muno nsi. Nandi kuye amavya, nanti ngi vintu visyakucitika ukulingana na vino mukulonda, mulaateeka umwenzo. Kupya, mulataila ukuti uku nkoleelo ivintu vilaziipa. Nga mukutaila vivyo, mulaya nu luzango kapya mutalaasakamala sana icakuti imulwala nu kulwala.—Amapinda 14:30; Ezaya 48:17.

8. Uzye nga mukuombela Leza, i vyani vino mutalaatiina?

⁸ Ndi mukuombela Leza wa cumi, mulakululwa ukufuma uku ntete zino antu asimuombela yaya nazyo. Mutalaaopa afwe, pano mwamanya ukuti afwe yataya nu umi. Mutalaatiina ukufwa, pano mwataila  ukuti Leza alatutulula afwe. Nakapya, mutalaatiina ulozi nanti uwanga, pano mwamanya ukuti Leza wakwatisya amaka.—Yoane 8:32.

9-11. Aantu ya musango ci aalaikala umu Paladaise, nupya antu ya musango ci aatalikalamo?

⁹ Nga mwaya cuza wakwe Leza, mutalaaopa ivilacitika uku nkoleelo. Itusambilila ukuti Baibolo yasoowile ukuti kulaya intazi iziliko ndakai. Yeova akaatuneena ukuti intazi zii i zya pakasita sile akanono; likwene sile Uwene Wakwe Leza wasya uzifye insi pakuti ice iye paladaise.—Luka 21:10, 11, 31; 23:43, NW.

¹⁰ Antu aaya ya cuza yakwe Yeova nupya aakamuombela aliyo sile aalikala umu Paladaise. Baibolo ikati: ‘Kwasyala sile panono, nu mwipe wilya atalayapo; nupya ulalolekesya pano wali, atalalolekapo. Lelo afuuke yene yalikala umu nsi, kupya yalaaipakizya ukwikala umu mutende.’—Masamu 37:10, 11.

¹¹ Yonsi asilonda ukuvwila masunde yakwe Leza ampomvu yalonoonwa, kupya yatalatala yayepo nu umi nupya. (2 Tesalonika 1:8, 9) Yene yatalayapo foo. Nayo yalafwa wakwe vino Satana ni viwa yalafwa. (Umbwilo 20:10, 14) Lelo yonsi aakasambilila pali Yeova, nu kumuombela, yalaaipakizya umi usuma umu Paladaise pa mpanga ya pa nsi.

12. Uzye Baibolo ikati uku nkoleelo ivintu vilaya uli?

¹² Kwaya ivintu ivingi ivisuma sana vino Yeova alacitila antu aamutemwa! Umvwini vino Baibolo yalaya ukuti avino ivintu vilaya umu Paladaise pano nsi:

• Kulaya ivyakulya ivingi: ‘Kulaya ingano izingi [kuli kuti vyakulya ivingi] pano nsi; na pa myamba kwene zilavula cuze.’—Masamu 72:16.

• Mang’anda asuma: ‘I cumicumi yalakuula mang’anda nu kwikala mwenemo.’—Ezaya 65:21.

• Milimo isuma: ‘Milimo yao asoololwe yane yalaiomba ningo. Yatalaaombela apa sile-sile.’—Ezaya 65:22, 23.

• Kutalaya ukulwala: ‘Kutalaya umwikazi aalavwanga ati “nene mulwale.”’—Ezaya 33:24.

• Kutalaya kulemala: ‘Pa nsita yiiya amanso ya mpafu yalalola, na matwi asiuvwa yalayulika. Pa nsita yiya umulemale maulu alatolooka wa nsasu, nu lulimi lwakwe ciulu lulapunda ni nsansa.’—Ezaya 35:5, 6.

• Kutalaya ukuwaika, ulanda, ni imfwa: “[Leza] alayakumbula minsozi yonsi. Kutalaya imfwa nupya. Kutalaya kulosya nanti kulila, nanti kuvwa kuwaika. Vintu vya mpiti vyativipita.”—Umbwilo 21:4.

• Kutalaya inkondo: ‘[Leza] akulenga inkondo ukusila ukufika kuno insi yapelela.’—Masamu 46:9.

• Umi wa pe: ‘Aololoke yalapyana insi, nupya yalikala penepo amanda pe.’—Masamu 37:29.

13. A weni wenga mpo angalenga insi ukuya Paladaise, nupya icani cino cayela vivyo?

¹³ Antunze yatanga yalete ivintu vyonsi vii, lelo Yeova wene wakwata amaka yakucita vyonsi vino wataka ukuti alacita. Kutaya icintu nanti cimwi icingalesya ukuti acite vino akasi. Baibolo ikati: “Pataya cintu nanti cimwi cino Leza angaposiwa.”—Luka 1:37.

14. Mungacita uli pa kuti muye umu nzila iikatungulula uku umi wa pe?

¹⁴ Yeova akatuma ya Nte yakwe ku kuneena antu yonsi ukuti yaapita apa “mpongolo ifyenkane” nu kulondela inzila iikatungulula uku umi wa pe. Si, namwe mwazumila vino ya Nte yakamuneena ukuti mwapita umu nzila iyo. Twalililini ukupepa Leza umu cumi, nga alino Yeova alaamupolelela amanda pe!—Mateo 7:13, 14.