1, 2. I uzyo ci lino mulinzile ukuyuzya mweineco, nupya i cani cino ukuyuzya vivyo kwazipila?

KUFUMA pano mwatandikile ukusambilila Baibo, mwati mumanya vino antu aingi aakailola ukuti yakapepa Leza wa cumi, yakasambilizya ivya ufi nu kucita vino Leza wapata. (2 Kolinto 6:17) Ali mulandu uno Yeova akatunenela ukuti tufume muli “Babiloni Mukulu.” (Umbwilo 18:2, 4) Nga mwemo i vyani vino mulinzile ukucita? Swensi kwene twakwata insambu zya kuisoolwela, nupya tulinzile ukuyuzya sweineco ukuti: ‘Uzye nkalonda ukupepa Leza ukulingana na vino akalonda namupepa, nanti uzye nkulonda sile ukutwalilila ukumupepa mu nzila ino nkapepelamo lyonsi?’

² Ndi cakuti mwafumamo mpiti umu kupepa kwa ufi, ale mwacita ningo. Nomba limwi kungaya ntambi zimwi zino mucili mwatemwa nanti vyuze vino antu aya umu mipepele ya ufi yakacita. Lekini tusambilile pa ntambi kwene zizyo ni vintu vimwi vino antu aya umu mipepele ya ufi yakacita, alino lyene tusambilile nu mulandu uno cacindamila ukulola ivintu vivyo ndi vino Yeova akavilola.

3. (a) U mulandu ci uno yamwi cingayatalila ukuta ukuomvya ivinkolanya pa kupepa? (b) Uzye Baibo yalandapo vyani pa kuomvya ivinkolanya pa kupepa Leza?

³ Antu yamwi pa myaka iingi yaomvya ivinkolanya mu mang’anda yao lino yakupepa Leza. Ndi cakuti namwe mwakwata ivinkolanya, limwi munguvwa kwati catala nanti ukuti i cipe ukupepa Leza ukwaula kuomvya ivintu vivyo. Nomba mwaiusya ukuti, Yeova  akatusambilizya vino tulinzile ukumupepa. Nupya Baibo ikati Yeova asilonda twaomvya ivinkolanya lino tukupepa.—Welengini Kufuma 20:4, 5; Masamu 115:4-8; Ezaya 42:8; 1 Yoane 5:21.

4. (a) U mulandu ci uno tutafwile ukupepela ivikolwe vitu? (b) U mulandu ci uno Yeova walesizye antu yakwe ukulanda na antu afwe?

⁴ Antu yamwi yakasumba insita ikulu na maka yao ukwezya ukuzanzya ivikolwe vyao ivyafwa. Yakapepa ni vikolwe kwene vii. Nomba twasambilile ukuti afwe yatange yatwazwe nanti ukutucisa. Afwe yasitwalilila ukuya nu umi ku cifulo cuze. Napya, ukwezya ukuvwanga na antu afwe, u zanzo sana, pano amazwi akauvwika ngati alupwa itu afwa ali yano yakuvwanga, yakafuma uku viwa. Ali cino Yeova walesizye aina Izlaeli ukuvwanga na antu afwe nanti ukucita ivintu vya mipasi.—Malango 18:10-12; lolini Vyeo Vya ku Mpela pa namba 26 na 31.

5. I cani cingamwazwa ukuta ukuomvya ivinkolanya pa kupepa Leza alino nu kuta ukupepa ivikolwe?

⁵ I cani icingamwazwa ukuta ukuomvya ivinkolanya pa kupepa Leza, nanti ukuta ukupepa ivikolwe? Mulinzile ukuwelenga Baibo, nu kwelenganya sana pali vino Yeova akalola ivintu vivyo. Yeova “wapata” sana ivintu vivyo nupya akavilola ukuti i vyawinyi kuli aliwe. (Malango 27:15) Mwapepa kuli Yeova cila-wanda nu kumunena ukuti mukulondesya ukulalola ivintu vivyo wakwe vino nawe akavilola nu kuti mukulonda ukulamupepa wakwe vino akalonda. (Ezaya 55:9) Mungataila ukuti Yeova alamwazwa pakuti mute ukucita vyonsi ivikumile ukupepa kwa ufi.

6. U mulandu ci uno antu yatandikile ukuzevya kuvyalwa kwako Yesu pa 25 Dizemba?

⁶ Ukuzevya Klisimasi kwaseeka sana, nupya antu aingi yakaelenganya ukuti ala yakuzevya uwanda uno Yesu  wavyalilwepo. Lelo Klisimasi yafuma uku mipepele ya ufi. Ibuku limwi lyalondolola ukuti aina Loma atataile Leza yazevyanga uwanda wa kuvyalwa kwa kasanya pa 25 Dizemba. Yasimapepo ya mu macalici yalondanga ukuti antu aingi yaye Aina Klistu, fwandi nanti cakuti Yesu ataavilwe pa 25 Dizemba, yene yatandike ukulazevya uwanda uwo ukuti ali wanda uno Yesu wavilwe. (Luka 2:8-12) Alondezi yakwe Yesu yatazevyanga Klisimasi. Ibuku limwi (Sacred Origins of Profound Things) lyalondolola ukuti: “Apa myaka 200 kufuma pano Yesu wavyalilwe, kutaali uwamanyile uwanda uno Yesu wavyalilwepo, nakupya antu aingi yatisileko na mano kuti yamanye uwanda uno Yesu wavilwe.” Ukuzevya Klisimasi kwatandike ala papita imyaka iingi kufuma pano Yesu wayelile pano nsi.

7. U mulandu ci uno aina Klistu yasizevezyako Klisimasi?

⁷ Antu aingi yamanya ukuti Klisimasi yafuma uku kupepa kwa ufi, kumwi sile ni ntambi zya pa Klisimasi, wa kupeela mawila alino nu kuzevya. Uku England ni ncende zimwi umu America insita imwi yalesizye ukuzevya Klisimasi pa mulandu na kuno yafumilile. Umuntu wensi uno yazana akuzevya yamufululanga. Nomba umu kupita kwa nsita antu yatandike nupya ukuzevya Klisimasi. U mulandu ci uno aina Klistu yasizevezyako Klisimasi? Pano yakalonda ukuzanzya Leza muli vyonsi vino yakucita.

8, 9. U mulandu ci uno Aina Klistu ya kutandikilako yatazevezyanga amanda ya kuvyalwa?

⁸ Ukuzevya nakuze kuno antu aingi yakazevya, u wanda uno yavilwe. Uzye Aina Klistu yalinzile ukuzevya amanda ya kuvyalwa? Ukuzevya kwa wanda wakuvyalwa ukwalumbulwa muli Baibo akuku sile kuno antu aatapepanga Yeova yazevizye. (Utandiko 40:20; Mako 6:21) Yazevyanga uwanda wa kuvyalwa ku kucindika ya leza ya ufi. Ali mulandu  uno Aina Klistu ya cumi akutandikilapo “yalolanga ukuzevya uwanda wa kuvyalwa kwa muntu ali wensi ukuti u lutambi lwa yantu atamanya Leza.”—The World Book Encyclopedia.

⁹ Aina Loma na Agliki yazumile ukuti lino umuntu akuvyalwa pakaya umupasi umwi, nu kuti umupasi kwene uu ukamucingilila manda yonsi lino ali nu umi. Ibuku limwi (The Lore of Birthdays) lyalondolwile ukuti, “Umupasi uwo ukaombela pamwi na ka leza akavilwe pa wanda uno umuntu wiyo wavyalilwapo.”

10. U mulandu ci uno Aina Klistu yatalinzile ukuzevezyako amanda ya kuvyalwa?

¹⁰ Uzye mukwelenganya ukuti Yeova akazumilizya ukuzevya ukukauvwana ni mipepele ya ufi? (Ezaya 65:11, 12) Awe, asizumilizya. Ali mulandu uno tusizevezyako amanda ya kuvyalwa nanti uwanda wa mwikalwe uli onsi uwafuma uku kupepa kwa ufi.

11. U mulandu ci uno antu yamwi yakazevezya manda ya mwikalwe? Nomba i cani cino mufwile ukucindamika sana?

¹¹ Antu yamwi yamanya ukuti ukuzevya Klisimasi, na manda ya mwikalwe yauze kwafumile kuli yaaya atapepanga Leza, nomba yatwalilila sile ukuzevya. Yakalola ukuti lino yakuzevya amanda ya mwikalwe ali nsita sile isuma iyakuya pamwi na yalupwa yao. Uzye namwe ali vino mukaelenganya? I cisuma ukuya pamwi nu lupwa. Yeova u wapekinye ukuti kuye ulupwa, akalonda ukuti mwauvwana na yalupwa inu. (Efeso 3:14, 15) Nomba, cino tulinzile ukusumbako sana mano, u kukwata ucuza usuma na Yeova, asi kulazevya amanda ya mwikalwe afuma uku kupepa kwa ufi pakuti sile tuzanzye yalupwa. Ali cino umutumwa Paulo walembile ukuti: “Mwaezya kusambilila vintu vino vikazanzya Mwene.”—Efeso 5:10.

12. I cani cingalenga ukuti Yeova atazumilizya ukuzevya uwanda wa mwikalwe?

 ¹² Antu aingi yakaelenganya ukuti ukwafumilile manda ya mwikalwe asi ali cintu cicindame sana, nomba Yeova wene asi ali vino akaelenganya. Wene asizumilizya ukuzevya amanda ya mwikalwe aafuma uku kupepa kwa ufi nanti ukuzevya kwa kucindika antu yamwi nanti vinkolanya vya mpanga. Aina Eguputo yakweti ukuzevya ukwingi kwa kucindika ya leza yao aufi. Lino aina Izlaeli yafumile umu Eguputo, yakolinye aina Eguputo nu kutandika ukuzevya kumwi kuno yamanga yakuti “kuzevya kwa kucindika Yeova.” Nomba Yeova wayafulwile pa mulandu wa kuzevya kuko. (Kufuma 32:2-10) Tulinzile ukuvwila vino Ezaya walanzile ukuti: “Mutezya muleme vyamankowezya.”—Welengini Ezaya 52:11.

13. Ndi mwapingulapo ukuta ukuzevyako amanda ya mwikalwe, a mauzyo ci yano limwi munguzya?

¹³ Ndi mwapingulapo ukuta ukuzevya manda ya mwikalwe, limwi mungaayuzya mweineco amauzyo aingi wakwe yaa, Ngi cakuti yano nkaomba nayo incito, yanguzya u mulandu uno nsizevezyako Klisimasi ningasuka uli? Nga, ndi cakuti umwi wampeela uwila wa pa Klisimasi, ningacita uli? Nga, ndi cakuti yawane yakulonda tuzevye swensi uwanda wa mwikalwe, ningacita uli? Uzye ningacita uli pakuti nazwe ana yane yatauvwa uyi pali vino yasikuzevyako uwanda wa mwikalwe, nanti uwanda wao uwa kuvyalwa?

14, 15. Uzye mungacita uli ndi cakuti umwi wamulamuka ukuomvya amazwi ya pa Klisimasi nanti ndi cakuti wamupeela uwila?

¹⁴ Mufwile ukupingula ningo pali vino mufwile ukucita. Ndi yamwi yamulamuka ukuomvya mazwi ya pa Klisimasi, asi kuti mufwile ukuyaziya. Mungayataizya sile pali vino yamulamuka. Nomba, ndi cakuti umuntu umwi akulonda  ukumanyilapo ivingi pa mulandu uno musizevezyako Klisimasi, mungamulondolwela. Lelo mulinzile ukuya ni cikuku nu mucinzi, nupya mulinzile ukumulondolwela mu nzila isuma pakuti atasoka. Baibo ikati: “Mvwango zinu zilinzile kuya zisuma nupya zyakuzanzya antu, nupya mulinzile kumanya musango uno mungaasukilamo umuntu ali wensi.” (Kolose 4:6) Limwi mungamunena ukuti mwatemwa sana ukuya pamwi na antu yauze nu kupeela amawila, nomba musilonda ukucita vivyo pa manda ya mwikalwe.

¹⁵ Nga, ndi cakuti umwi wamupeela uwila? Baibo isitunena vyonsi vino tulinzile ukucita, lelo yalanda ukuti tulinzile kusungilila kampingu witu umusuma. (1 Timoti 1:18, 19) Limwi wino akumupeela uwila atamanya ukuti musizevyako uwanda wa mwikalwe. Nanti angalanda ati: “Kumanya kwene namanya ukuti musizevya manda ya mwikalwe, nomba nkulonda sile kumipeela uwila uu.” Mweineco mungaipingwila nga mungapoka uwila uwo nanti foo. Lelo vino mwapingulapo ukucita mulinzile ukusininkizya ukuti imusungilila kampingu winu umusuma. Tusilonda ukucita ivintu ivingalenga ucuza witu na Yeova kusila.

16. Mungacita uli ndi cakuti ya lupwa inu yakulonda ukuzevya manda ya mwikalwe?

¹⁶ Mungacita uli ndi cakuti ya lupwa inu yakulonda ukuzevya uwanda wa mwikalwe? Mutafwile ukupaazyanya nayo. Mwaiusya ukuti yakwata insambu zya kuisoolwela vino yakulonda ukucita. Mufwile ukuya ni cikuku nu kucindika vino yapingula ndi vino namwe kwene mungatemwa ukuti yacindike vino mwapingulapo ukucita. (Welengini Mateo 7:12.) Nga ndi cakuti ya lupwa inu yakulonda kuti muzanweko lino yakuzevya uwanda wa mwikalwe, mungacita uli? Lino mutatala mwapingula vino mumacita, mufwile ukupepa kuli Yeova pakuti amwazwe ukupingulapo ningo. Mulinzile ukwelenganyapo nu kulondelezya ivyeo  ivikalanda pali vivyo. Mwaiusya ukuti mulinzile ukuzanzya Yeova lyonsi.

17. Uzye mungacita uli pakuti mwazwe ana inu kuti yatauvwa sana uyi lino yakulola yauze yene yakuzevya manda ya mwikalwe?

¹⁷ Uzye mungacita uli pakuti mwazwe ana inu kuti yatauvwa sana uyi lino yakulola yauze yene yakuzevya manda ya mwikalwe? Mungaayacitilako vimwi viiyeele mu manda yauze. Mungaayapelako na mawila. Nu wila wampomvu kuluta uno mungapeela ana inu, u kuya pamwi nayo insita ikulu nu kuyatemwa.

18. U mulandu ci uno tulinzile ukuila uku kulongana lyonsi?

¹⁸ Pa kuzanzya Yeova, tulinzile ukusenka uku mipepele ya ufi, kuta ukucitako intambi, nu kuta ukuzevya amanda ya mwikalwe aafuma ku mipepele ya ufi. Lelo tulinzile nu kuya umu mipepele ya cumi. Tungacita uli vivyo? Inzila yonga, u kulaya lyonsi uku kulongana kwa Ina Klistu ya cumi. (Welengini Ayebulai 10:24, 25.) Ukulongana kuu kwacindama sana umu kupepa kwa cumi. (Masamu 22:22; 122:1) Pa kulongana kuuko ali pano tungakomelezyanya na ina Klistu yanji.—Loma 1:12.

19. U mulandu ci uno caziipila ukuti mwanenako auzo icumi cino mwasambilila muli Baibo?

¹⁹ Icintu nacuze cino mungacita umu kupepa kwa cumi, u kunenako antu yauze pa vintu ivisuma vino mukusambilila muli Baibo. Antu aingi yakaumvwa uyi pa mulandu ni ntazi izili umu nsi ii ndakai. (Ezekelo 9:4) Limwi namwe mwamanyako antu yamwi akaumvwa vivyo. Mungaayanenako pa vintu ivisuma ivilacitika uku nkoleelo. Ndi mukuya uku kulongana kwa Ina Klistu lyonsi, nu kunenako antu yauze icumi ca muli Baibo, mutalakumbwa ukuya umu mipepele ya ufi ni ntambi zino yakacita. Mwataila sana ukuti mulaya nu luzango cuze, nupya Yeova alamupolelela ndi cakuti mwalemasya umu kupepa kwa cumi.—Malaki 3:10.