CIPANDE 11
U Mulandu ci Uno Ucuzi Wavulila?
1, 2. Iiuzyo ci lino antu aingi yakauzya?
ELENGANYINI ukuti cimuza icipisye icikakatusya manzi pali yemba (Tsunami) conona umuzi. Kuze, icipondo cingila umu calici nu kupika imfuti mumu kwene nu kumola antu aingi, na yauze yacisika icipisye. Alino Kuze nako, nyina wafwa uku ulwale wakwe kansa nu kusya ana 5.
2 Lino a mazanzo aipisye ndi yaa yacitika, antu aingi yakauzya ukuti “U mulandu ci uno ivintu vya musango uu vikucitikila?” Antu aingi yakauzya u mulandu uno lupato nu ucuzi vyavulila muno nsi. Uzye namwe mwatala mwelenganyapo vivyo?
3, 4. (a) A mauzyo ci yano Habakuku uzizye? (b) Nga Yeova wamwaswike atuli?
3 Muli Baibo tukasambililamo ukuti na aomvi yakwe Leza acumi aaliko mpiti nayo kwene yuzyanga mauzyo ya musango ndi uu. Wenga pali yaayo a kasema Habakuku, uuzizye Yeova ati: “Uzye pa cani cino ukulondela kuti nalukulola amacuzi kwene yaa? Uzye pacani ukuzumilizya kuti ukakasi utwalilile? Apali ponsi nkalukulola uononesi nga ni nkondo. Pali ulwete nu kupazyanya ukukalamba.”—Habakuku 1:3.
4 Pali Habakuku 2:2, 3 tukawelenga vino Yeova waswike mauzyo yano Habakuku uzizye alino na vino wamulavile ukuti alazifya ivintu. Yeova watemwa sana antu. Baibo ikati: “Wene akamusakamala.” (1 Petulo 5:7) Leza wapatisya uyi nu ucuzi kucila na vino antunze yapata ivintu vivyo. (Ezaya 55:8, 9) Fwandi, lekini tulande pi uzyo ilyakuti, U mulandu ci uno umu nsi mwavulila ucuzi?
U MULANDU CI UNO UCUZI WAVULILA VII?
5. Ivyani vino ya kasambilizya aingi yakalanda pa kucula kwa antu? Nga Baibo yene ikasambilizya ikuti uli?
5 Yasimapepo na ya kasambilizya yakalanda ukuti Leza aliwe akalonda kuti antu yaacula. Yamwi nayo yakati vyonsi ivikacitikila umuntu, kumwi ni viipe kwene a Leza uwatantika kuti vyacitika, nu kuti tutalatala tuvwikisye umulandu uno wacitila vivyo. Antu yamwi nayo yakalanda ukuti antu yonsi kumwi na ana kwene, yakafwa pakuti yakikale na Leza ukwiyulu. Lelo vyonsi vivyo visi vya cumi. Yeova asilenga ivintu viipe ukucitika. Baibo ikati: “Leza asicita icintu iciipe, awe. Wamaka yonsi asifyenga umuntu foo!”—Yobo 34:10.
6. Uzye i cani icalenga ukuti antu aingi yaapeela Leza umulandu ukuti aliwe akaleta ucuzi umu nsi?
6 Antu aingi yakapeela Leza umulandu ukuti aliwe akalenga ucuzi onsi, pano yakaelenganya ukuti aliwe akateeka insi. Nomba wakwe vino twasambilile umu Cipande 3, kateeka wa nsi yii, a Satana Ciwa.
7, 8. (a) U mulandu ci uno umu nsi mwayela sana ucuzi?
7 Baibo ikatuneena ukuti: “Insi yonsi ili pisika lya utesi wa Mwipe wilya.” (1 Yoane 5:19) Kateeka wa nsi ii, Satana, wakalipisya napya u munkalwe. Wene “akasomba antu amu nsi.” (Umbwilo 12:9) Antu aingi yakamukolanya. Fwandi ali mulandu onga uno mu nsi mwavulila ulupato, usomvi, nu unkalwe.
8 Kwaya imilandu nayuze iyalenga kuti mu nsi muye sana ucuzi. Lino Adamu na Eva yaapondwike, iifyo lyasalangine uku yana yao. Pa mulandu wi ifyo kwene lii, antu yakalenga kuti antu yauze yacula. Ilingi yakalondesya ukuluta auze. Yakalwa, yakaya uku nkondo, nu kucuzya auze. (Kasambilizya 4:1; 8:9) Insita zimwi icikalenga kuti antu yacula, “i nsita ni vintu ivikacitika ukwaula kwenekela.” (Kasambilizya 9:11, NW) Lino antu yazanwa apa cifulo apasi ningo, na pa nsita iisi ningo, yangaponelwa na mazanzo nanti sile ivintu vyuze iviipe.
9. U mulandu cino uno tungasininkizizya ukuti kufwile kwaya icalenga ukuti Yeova aleke sile ucuzi utwalilile?
9 Yeova asi aliwe akalenga ukuti kuye ucuzi. Asi aliwe akalenga ukuti kuye inkondo, upondo, nanti kucuzya antu. Leza asi aliwe akalenga kuti kuye mazanzo wakwe, ivilundumusi, miza iipisye iikakatusya manzi pali yemba, nanti sile iimvula ya citalawe. Nomba limwi mungelenganya muti, ‘Ndi cakuti Yeova aliwe wakwatisya maka mu uumbo onsi, u mulandu ci uno asilesezya kuti vintu iviipe vitacitika?’ Twamanya ukuti Leza akatusakamala sana, fwandi kufwile kwaya icalenga ukuti aleke sile ucuzi ukutwalilila.—1 Yoane 4:8.
U MULANDU CI UNO LEZA WAZUMILIZIZYA UCUZI?
10. Uzye Satana watwisike uli miteekele yakwe Yeova?
10 Satana wasomvile Adamu na Eva lino yali mu calo ca Edeni. Satana walanzile ukuti Leza wali a Kateeka mwipe. Satana wanenyile Adamu na Eva ukuti kwaya icintu cimwi cisuma cino Leza wayafisa. Satana walondanga Adamu na Eva yazumile ukuti wene angaya akateeka musuma kuluta Yeova, nu kuti yangaikala ningo ukwaula ukuteekwa na Leza.—Utandiko 3: 2-5; lolini Vyeo Vya ku Mpela pa namba 27.
11. Iuzyo ci lino tulinzile ukwasuka?
11 Adamu na Eva yatuvwilile Yeova nupya yamupondokiile. Yelenginye ukuti yaakweti insambu zya kuisoolwela pa cisuma ni cipe. Uzye Yeova wali nu kucita vyani pa kusinila ya cipondoka yaya ukuti vino yasoolwile ukucita vitali ningo, nu kuti aliwe sile wamanya ivingatuzipila?
12, 13. (a) U mulandu ci uno Yeova atumozile yacipondoka lilikwene sile lino yapondwike? (b) U mulandu ci uno Yeova wazumilizizya Satana ukutungulula insi na antunze ukuiteeka aineco?
12 Yeova atononyile Adamu na Eva lilikwene sile lino yapondwike. Lelo wayazumilizye ukukwata ana. Lyene Yeova wapile isyuko kuli ya mwana Adamu na Eva ilyakuisoolwela wino yangatemwa ukuti ayateeka. Yeova walondanga kuti mu nsi yonsi muye antu amalilike, nupya cico i cali nu kucitika nanti Satana angezya uli ukucilikila.—Utandiko 1:28; Ezaya 55:10, 11.
13 Satana watwisike imiteekele yako Yeova ale na angeli imintapendwa yakulolako. (Yobo 38:7; Danieli 7:10) Fwandi Yeova wapeezile Satana insita pakuti cimanyike ningo ngi cakuti vino Satana walandanga vyali ivyacumi. Yeova wapezile na antu insita ya kuiteeka aeneco ale Satana akutungulula, pakuti cimanyike ngi cakuti antu yangaiteeka ningo kwaula utunguluzi wakwe Leza.
14. Uzye vino Yeova waleka sile ukuti antunze yaaiteeka, i vyani ivyacitika?
14 Pa myaka iingi antunze yezya ukuiteeka nomba ivintu vikuya vikwipilako sile. Satana wasinilwa ukuti u wa ufi. Antunze yakalondekwa ukutungululwa na Leza. Kasema Yelemiya walungike lino wavwanzile ati: “Nemo namanya, we Yeova ukuti umuntu atange aisoolwele umweneco uyo wakwe. Kusi umuntu uwakwata amaka akutungulula intampulo zyakwe.”—Yelemiya 10:23, NW.
U MULANDU CI UNO YEOVA WALEKELA UCUZI UKUTWALILILA?
15, 16. (a) U mulandu ci uno Yeova walekela ucuzi ukutwalilila apa nsita itali? (b) U mulandu ci uno Yeova atafumizyapo intazi zino Satana waleta?
15 U mulandu ci uno Yeova walekela sile ucuzi ukutwalilila apa nsita itali? U mulandu ci uno asilesezya ivintu ivipe ukucitika? Papita insita pakuti cisininkiziwe ukuti Satana atanga ateeke ningo. Apa myaka iingi cuze, antunze yezya na maka yonsi ukuiteeka umu nzila izipusane-pusane, nomba ivintu vyatwalilila sile ukwipilako. Nanti cakuti yaalunduluka sana muli vyakwe sayansi nu mu vyakupangapanga, lelo lufyengo lwene, ucuzi, upondo, ni nkondo, alino vikalu-kuvulilako sile. Fwandi tutanga tuiteeke ningo ukwaula ukutungululwa na Leza.
16 Lelo, Yeova ataafumyapo intazi zino Satana waleta. Pano acita vivyo, nga cikaloleka kwati akatungilila uteeko wako Satana, nupya Yeova atalatala acite vivyo. Nakapya, cingalenga antu yalole kwati yangaitungulula aeneco ukwaula uwavya. Nomba, ukwelenganya vivyo, uufi sana, na Yeova atange azumilizye cico. Leza wene asitumpoka.—Ayebulai 6:18.
17, 18. Uzye Yeova alacita uli pa viipe vyonsi vino Satana waleta?
17 Uzye Yeova angafumyapo ivipe vyonsi ivyafuma muli ucipondoka wakwe Satana na antunze? Ee. Kuli Leza kutaya icakoma. Yeova wamanya insita lino vyonsi vino Satana watwisika pali aliwe vilamanyikwa ningo ndi vyacumi. Lyene alalenga insi ukuya paladaise wako vino walondanga kuti iye. Yonsi aya “umu malindi” yalatuutuluka. (Yoane 5:28, 29) Antu yatalatala yalwale nanti ukufwa. Yesu alafumyapo iviipe vyonsi vino Satana waleta. Yeova alaomvya Yesu kuti “aonone vino Ciwa wacita.” (1 Yoane 3:8) Tukataizya pali vino Yeova watutekanizizya, pakuti tungamumanya nu kusoolola ukuti aye kateeka witu. (Welengini 2 Petulo 3:9, 10.) Na lino twacula wene akatwazwa ukusipikizya.—Yoane 4:23; welengini 1 Kolinto 10:13.
18 Yeova asitupatikizya kuti tusoolole aliwe ukuya Kateeka witu. Wapeela antu untungwa wa kuisoolwela. Lekini tulande pali vino uwila uu wacindama kuli sweswe.
UZYE MUMAOMVYANGA ULI UWILA UNO LEZA WAMUPEELA?
19. U wila ci ucindamisye uno Yeova watupeela? U mulandu ci uno tulinzile ukutaizya pa wila kwene uwo?
19 Uwila uu ucindamisye uwa kuisoolwela vyakucita uno Yeova watupeela ukalenga tupusaneko sana ni nyama. Swemo tungaisoolwela vino tukulonda ukwikala nanti ukuisoolwela ndi tukulonda ukuombela Yeova nandi foo. (Mapinda 30:24) Nupya, tutaya wakwe ya masyini akaomba sile vino yayapangile ukuomba. Twakwata untungwa wa kuisoolwela vino tukulonda ukuya, aangaya ivyuza vitu, nanti sile vino tukulonda ukucita umu umi witu. Yeova akalonda kuti twaipakizya umi.
20, 21. I cintu cii lyene icisuma cino mungasoolola ukucita?
20 Yeova akalonda kuti tumutemwe. (Mateo 22:37, 38) Waya wa mu muvyazi umonsi aakatemwa ngi cakuti umwana wamunena wati “Tata nataizya,” asi pa mulandu wakuti umwana wiyo iyamunena sile ukuti avino alande, lelo umwana wiyo waipingula sile umwineco ukuti ataizye ya isi. Yeova watupeela untungwa wa kuisoolwela ngi cakuti tukulonda ukumuombela nanti foo. Satana, Adamu, na Eva yasoolwilepo ukukana Yeova. Nga mwemo mumaomvyanga uli wila uno mwapeelwa?
21 Mwaomvya uwila winu ukuombela Yeova. Kwaya antu aingi apingulapo ukuzanzya Leza nu kukana Satana. (Mapinda 27:11) Uzye namwe mungacita uli pakuti muce mwikale umu nsi ipya yakwe Leza lino alafumyapo ucuzi onsi? Icipande icilondelilepo cilasuka iuzyo lii.
