‘Mulinzile ukuya ya kasambilizya.’ (Ayeb. 5:12) Elenganyini pali cii: Yeova Kasambilizya uwacila yonsi umu uumbo aliwe watupeela umulimo wa kusambilizya yauze! Umulimo uli onsi uwakusambilizya icumi pali Yeova, kuli kuti umu lupwa, umu cilongano, nanti umu mulimo wa kusimikila, i syuko iliyiyele nupya u mulimo ucindame sana. Uzye tungacita uli pakuti twasambilizya ningo?

Icasuko cikazanwa umu mazwi yano umutumwa Paulo walembiile Timoti akuti: ‘Twalilila ukwika mano umu kuwelenga malembelo pa lwalala nu kukonkomezya nu kusambilizya.’ Paulo walanzile nu kuti: “Pano ndi wacita cii, ale lyene ulaituula wemwisikulu nga na yao akukuvwa.” (1 Tim. 4:13, 16) Mwapeelwa ilandwe lya kunena antu ilingayapususya. Fwandi icicindama ukuti mwazifya imiwelengele inu ni misambilizizye. Kabuku kaa kapangwa ukuti kamwazwa ukucita vikwene. Lolini vimwi vino ikamo.

Yeova ali “Kasambilizya wa Papelapela.” (Eza. 30:20, NWT.) Nanti icakuti kabuku kaa kalamwazwa ukuya ya kawelenga nupya ya kasambilizya yasuma, mutalinzile ukwilila ukuti Yeova ali Ntulo ya vyeo nupya aliwe akaleta antu umwi uvi lyakwe. (Yoa. 6:44) Fwandi mwapepa kuli aliwe imiku iingi pakuti angamupeela umupasi wakwe uwa muzilo. Mwaomvya sana Izwi Lyakwe Leza. Mwaleka ukuti ululumbi lwaya kuli Yeova asi kuli mweisikulu foo. Mwaezya na maka ukwazwa yano yakukutika kuli mwemwe ukutemwa sana Yeova.

Mwapeelwa isyuko lya kusambilizya ilandwe ilicindame sana lino Leza wapeela antunze. Tukutaila ukuti lino “maka yano Leza akamupeela” yamwazwa, mulaomba ningo sana.—1 Pet. 4:11.

Asweswe ya kasambilizya yauzo,

Iumba Likatungulula Ilya Nte Zyakwe Yeova