Ibuku lyakuti Malembo Aangazwa Aina Klistu lilaamwazwa ukuzana zuwa malembo na malyasi aangamwazwa ukucimvya intazi zino mukakwata. Lilaamwazwa nu kuzana malyasi amukulungatika yano mungaomvya pa kukomelezya yauze alino nu kuyazwa pakuti yapingula ningo pa vintu ivikalenga Yeova ukucindikwa. Mungasoolola umutwe wi lyasi uno mukulonda, nupya cila lyasi lyakwata mauzyo na mazwi sile anono akulondolola malyasi ya muli Baibo. (Lolini kambokosi “ Ivyakuomvya Lupapulo Luu.”) Mulazana ivyeo ivingi ivipusanepusane nu kusunda ukungamwazwa, kumutungulula, alino nu kuteekeziwa ukufuma umwi Izwi lyakwe Leza. Mulazana ni visinte vicindame vya muli Baibo vino mungaomvya ku kwazwa yauze aali ni ntazi nu kuyakomelezya.

Asi malembo yonsi yano iika umu malyasi aali umwi buku lii. Lyapangwa umu nzila yakuti lyamwazwa ukuzana malembo aangamwazwa, nupya mungaomvya iviombelo na vyuze pakuti musambilile na vyuze vino mukulonda. (Mapi. 2:​1-6) Pa kuti mulondelezye na vyuze, mungaomvya ivyeo ivyakutwazwa ukusambilila ivyaya muli Baibo Uwa Malembo ya Nsi Ipya. Mungaomvya Ibuku Ilya Kwazwa Inte Zyakwe Yeova Ukulondelezya Ivyeo nanti Cisontelelo Ica Mpapulo pakuti musambililepo na vyuze api lembo limwi nanti pakuti mumanye ivyakuliomvya. Mwalondelezya ivyeo ivipya pakuti muvwikisye ulondolozi upya uwa mu malembo.

Mukwai, si lekini ibuku lii ilyakuti Malembo Aangazwa Aina Klistu lyamwazwa ukwiluka, ukumanya nu kuvwikisya ivyeo ivyaya umu Malembo ya Muzilo. Lino mukuomvya ibuku lii, mulasininkizya ukuti “izwi lyakwe Leza i lya umi nupya lyakwata amaka.”—Aeb. 4:12.