ISAMBILILO 07

Uzye Yeova Waya Uli?

LIZYINI

Uzye mukaelenganya ukuti Yeova Leza waya uli? Uzye wakulisya icakuti waya sana ukutali namwe, wakwe vino intanda ni vipindausiku vyaya sana ukutali namwe? Nanti limwi mukaelenganya ukuti wakwata sana amaka wa mvula iipisye umuli nu kupangalansya nomba atamanyikwa ningo ningo? Nomba uzye Yeova waya uli? Baibo ikatunena imiyele ino Yeova wakwata na vino wamwikako amano.

1. U mulandu ci uno tusilolela Leza?

“Leza u Mupasi.” (Yoani 4:24) Yeova atakwata umwili wakwe uno twakwata. U mupasi nupya akaikala ukwi yulu.

2. I miyele ci imwi ino Yeova wakwata?

Tutange tulole Leza, nomba nga twamumanya ningo tungamutemwa pa mulandu wakuti wene u wa cumi cumi nupya wakwata imiyele isuma. Baibo ikati Yeova “watemwa ivilungame, nupya asitazyela akwakwe yayo acumi.” (Masamu 37:28) Nupya waya “sana nu kutemwa nu luse” sana sana ku antu akucula. (Yakobo 5:11) Yeova “akaya umupipi sana na yayo ati yaputuka imisana. Wene akapususya antu yanoyati yapelelwa amano.” (Masamu 34:18) Nupya uzye imumanya ukuti vino tukacita vingalenga Yeova ukuya ni nsansa nanti ukuvwa uyi? Umuntu aakasoolola ukucita iviipe akasosya Yeova nupya akamulenga ukuvwa ulanda. (Masamu 78:40, 41) Nomba umuntu aakacita ivisuma akamuzanzya.—Belengini Mapinda 27:11.

3. Uzye Yeova akalanga uli ukuti watutemwa?

Imiyele iyakulisya pa miyele ino Yeova wakwata u kutemwa. “Leza u kutemwa.” (1 Yoani 4:8) Yeova atalanga sile ukutemwa muli Baibo, lelo walanga na muli vino waumba. (Belengini Milimo 14:17.) Elenganyini pali vino watuumba. Watupeela amaka akulola makaala asuma, ukukutika uku nyimbo, alino nu kuipakizya ivyakulya ivisuma. Akalonda twaipakizya umi.

LONDELEZYINI NA VYUZE

Sambililini vino Yeova akacita pakuti acite ivintu vyakuzungusya. Lyene mulole na vino Yeova akalanga imiyele yakwe isuma.

4. Umupasi wa muzilo aamaka yano Leza akaomvya

Wakwe vino tukaomvya amakasa itu ukukuomba imilimo, avino na Yeova akaomvya umupasi wakwe uwa muzilo. Baibo ikalondolola ukuti umupasi wa muzilo asi Leza, lelo aamaka yano Leza akaomvya pa kuomba ivintu. Belengini Luka 11:13 na Milimo 2:17, alino mulanzyanye amauzyo yaa:

Leza alapeela umupasi wa muzilo kuli yayo yonsi aakamulenga. Uzye lyene mukwelenganya ukuti umupasi wa muzilo a Leza nanti a maka yano Leza akaomvya? U mulandu ci uno mwalandila vivyo?

Yeova akaomvya umupasi wa muzilo pakuti acite ivintu vyakuzungusya. Belengini Masamu 33:6 na 2 Petulo 1:20, 21, alino mulanzyanye iuzyo lii:

Iinzila ci zimwi zino Yeova akaomvyezyamo umupasi wa muzilo?

5. Yeova wakwata imiyele isuma sana

Mose wali a kapepa wa cisinka wakwe Leza pa myaka iingi, nomba walondanga ukumanya ningo kaumba wakwe. Fwandi Mose wanenyile Leza ati: “Undangilile nzila zyako pakuti ntwalilile kukutumikila.” (Kufuma 33:13) Yeova wailondolwile kuli Mose vino waya. Belengini Kufuma 34:4-6, alino mulanzyanye amauzyo yaa:

I miyele ci ino Yeova wakwata ino wasokolwile kuli Mose?
I miyele ci ino Yeova wakwata ino mwatemwa sana?

6. Yeova akasakamala antu

Antu yakwe Leza Aebele yali azya umu Ejipti. Uzye Yeova uvwanga uli lino yaculanga? Lizyini BAIBO IBELENGELWE LIMWI alino mulondelemo, nanti belengini Kufuma 3:1-10. Lyene mulanzyanye amauzyo atiyalondelelapo.

MAZWI AKOPELWE LIMWI: Yeova Wayasakamiile Lino Yaculanga (2:45)

Uzye ilyasi lii likumusambilizya ukuti Yeova akauvwa uli nga antu yakucula?—Lolini vikomo 7 na 8.
Uzye mukwelenganya ukuti Yeova akalonda ukwazwa antu nu kuti wakwata amaka akucita vivyo? U mulandu ci uno mwalandila vivyo?