ISAMBILILO 44

Uzye Ukuzevya Konsi Kukazanzya Leza?

LIZYINI

Yeova akalonda twaipakizya umi nu kukwatako insita zimwi zya kuzevya. Nomba uzye ukuzevya konsi na maolide vikazanzya Leza? Tungalanga uli ukuti twatemwa Yeova lino tukupingulapo pa vintu vii?

1. U mulandu ci uno ukuzevya ukwingi kusizanzizya Yeova?

Mungazunguka sana ukumanya ukuti ukuzevya ukwingi, kwafumile uku visambilizyo ivitaya umu malembo nanti ku mipepele ya ufi. Kuzevya kuu kungauvwana ni vya mipasi nanti cisambilizyo cakuti kwaya cimwi icikasyala umuntu nga wafwa. Ukuzevya kumwi nako kwafuma uku vya mipasi ivikalanda pa vintu ivisi vya cumi cumi na pa masyuko. (Ezaya 65:11) Yeova akacelula ya kapepa yakwe ukuti: “Ipaatulini . . . nupya tiini ukulema uku cintu icikowele.”—2 Kolinto 6:17. a

2. Uzye Yeova akayuvwa uli pa kuzevya ukukalenga antu yacindikisya sana antu yauze?

Yeova akatucelula ukuti tutalinzile ukutaila sana umu yantu yauze. (Belengini Yelemiya 17:5.) Kukaya ukuzevya kumwi ukwakucindika ya kateeka nanti asilika. Yamwi yakazevya uwanda uno yapokiilepo untungwa nu kupeela umucinzi ku vintu ivikaimililako impanga yao, wakwe imendela. (1 Yoani 5:21) Yamwi nayo, yakacindika utuungwe twa miteekele nanti utuungwe utukaazwilizya antu. Uzye Yeova angayuvwa uli ndi cakuti tukucindikisya sana kaungwe nanti umuntu, sana sana aasicita ivintu ukulingana nu kulonda kwakwe?

3. I vyani ivikacitika uku kuzevya kumwi ivingalenga tupingulepo ukukanazanwa uku kuzevya kuko?

Baibo yalesya “ucakolwa, kuwowota, [alino nu] kumwesya.” (1 Petulo 4:3) Umu kuzevya kumwi antu yakacita ivintu ivingi iviipe ukwaula ukuikanya. Pakuti tutwalilile ukuzanzya Yeova, tulinzile ukutaluka uku miyele ii iipe.

LONDELEZYINI NA VYUZE

Londelezyini vino mungazanzya Yeova lino mukusoololapo ningo pa maolide nu kuzevya.

4. Mwakana ukuzevya ukusizanzya Yeova

Belengini Efeso 5:10, alino mulanzyanye mauzyo yaa:

I vyani vino tulinzile ukusininkizya lino tutatala twapingulapo ukuzevya maolide yamwi?
A maolide ci aaseka sana kuno mukaikala?
Uzye mukwelenganya ukuti maolide yayo yakazanzya Yeova?

Uzye mwatala mwelenganyapo pali vino Yeova akayuvwa pa kuzevya uwanda wa kuvyalwa? Baibo italandapo pali kapepa wakwe Yeova uwazevizye uwanda wa kuvyalwa, lelo yalandako pa antu yaili aatapepanga Yeova aazevizye uwanda wa kuvyalwa. Belengini Utandiko 40:20-22; Mateo 14:6-10. Alino mulanzyanye mauzyo yaa:

Uzye ivyacitike pa kuzevya kuu koili vyakolana uli?
Ukulingana na malyasi yaa aalembwa muli Baibo, uzye mukwelenganya ukuti Yeova akayuvwa uli pa kuzevya uwanda wa kuvyalwa?

Limwi mungayuzya ukuti, ‘Uzye cacindama kuli Yeova nga nkuzevyako uwanda wa kuvyalwa nanti ukuzevya kuze ukutaya umu malembo?’ Belengini Kufuma 32:1-8. Lyene, tambini VIDYO alino mulanzyanye mauzyo atiyalondelelapo.

VIDEO: Amaolide nu Kuzevya Ivisizanzya Leza (5:07)

U mulandu ci uno tulinzile ukusininkizizya ukuti tukucita vino Yeova akalonda?
Tungacita uli vivyo?

Vino tungacita pakuti tumanye ndi cakuti ukuzevya kumwi kusizanzya Leza

Uzye ukuzevya kuko kwafuma uku visambilizyo ivitaya umu malembo? Pakuti mumanye, londelezyini vino ukuzevya kuko kwatandike.
Uzye ukuzevya kuko kukacindikisya antu, utuungwe nanti ivintu ivikaimililako impanga? Tukacindikisya Yeova ukuluta icili consi nupya twataila ukuti alafumyapo intazi zyonsi izyaya pano nsi.
Uzye ivikacitika uku kuzevya kuko vyapusana na masunde aya muli Baibo? Tulinzile ukutwalilila ukuya ni miyele isuma.

5. Mwaazwa yauze ukucindika vino mwazumilamo

Cingatala ukukana ndi cakuti yauze yakumupatikizya ukuzevyako ukuzevya ukusizanzya Yeova. Mwayalondolwela umu mucenjelo pali vino imupingulapo nupya mwateekela. Pakuti mumanye vino mungacita, tambini VIDYO.

VIDYO: Mwalondolola Vino Mwazumilamo Umu Mucenjelo (2:01)

Belengini Mateo 7:12, alino mulanzyanye mauzyo yaa:

Ukulingana ni cikomo cii, uzye mulinzile ukunena ya lupwa inu aasi ya kapepa ukuti yatalinzile ukuzevyako olide imwi?
Mungacita uli pakuti mulange ya lupwa inu kuti nanti cakuti musikuzevezya pamwi nayo mwayatemwa nupya mukayataizya?

6. Yeova akalonda twaya ni nsansa

Yeova akalonda twakwata insita ya kuya pamwi nu kuipakizya na ya lupwa na ya cuza. Belengini Kasambilizya 8:15, alino mulanzyanye iuzyo lii:

Uzye icikomo cii cikalanga uli ukuti Yeova akalonda twaya ni nsansa?

Yeova akalonda antu yakwe ukulakwata insita ya kuya pamwi nu kuipakizya. Tambini VIDYO pakuti mulole vino ivya musango uu vikacitika pa maukongano ya mpanga izingi.

VIDYO: Kupokelela Aenyi Uku Maukongano ya Mpanga Izingi (5:40)

Belengini Galatiya 6:10, alino mulanzyanye mauzyo yaa:

Uzye tulinzile ukuzevyako maolide amanyikwa sana pakuti tucite ivisuma kuli yauze?
Uzye u kupeela kwa musango ci ukungamulenga ukuya ni nsansa, uzye u kupeela pa mulandu wakuti a olide nanti u kupeela ilili lyonsi lino mwalonda ukucita vivyo?
Insita zimwi ya Nte aingi yakapekanyizizya ana yao ivintu visuma nu kuyakalilako mawila. Ndi cakuti mwakwata ana, i vintu ci vimwi visuma vino mungayapekanyizizya?

YAMWI YAKALANDA UKUTI: “Citacindama ukumanya kuno olide yafumilile. Icacindama u kuipakizya nu kuya pamwi na ya lupwa ni vyuza.”

Mungasuka mutuuli?

VINO TWASAMBILILA

Yeova akalonda twaipakizya ukuya pamwi nu lupwa ni vyuza. Nomba akalonda twataluka uku kuzevya ukusimuzanzya.

I vyani vino mwasambilila?

A mauzyo ci yano tungayuzya pakuti tumanye ndi cakuti ukuzevya kumwi kukasosya Yeova?
Uzye tungazwa uli ya lupwa ni vyuza ukumanya vino twapingulapo pa kuzevya maolide?
Uzye mwamanya uli ukuti Yeova akalonda twaya ni nsansa?

Wanda wa kumalila isambililo:

Ezyini vii

Omvini vino imusambilila umwi sambililo lii pakuti mumanye maolide aseeka sana kuno mukaikala?

Vyuze:

Vyuze