CIPANDE 23
“Uvwini Vino Nkulanda”
Paulo wacingilila icumi uku maumba ya antu asoke nu ku yantu umu cilye ca Sanihedilini
Ukufuma pa Milimo 21:18–23:10
1, 2. I cani icalenga ukuti Paulo aye uku Yelusalemu, nupya iintazi ci zino amakwata nga wayako?
PAULO wafika umu Yelusalemu. Akupita umu kamuseo umuli sana antu aingi. Umusumba wa Yelusalemu walandwapo sana umu malyasi aakalanda pa yantu yakwe Yeova. Antu aingi akaikalamo yakauvwa ningo pali vino vyacitike mpiti umu musumba uu. Paulo amanyile ukuti Aina Klistu aingi akaikala umu musumba uu yataila sana ivintu vya mpiti icakuti yafilwa kusenuka na lino yamanya ukuti Yeova wasenuka muli vino akalanzyanya na antu yakwe. Ukulunda pa mulimo uwalenzile Paulo ukuti afume uku Efeso nu kuya uku musumba uu ukalamba, kuli kuti mulimo wa kutwala ivintu vino yakulondekwanga ivya kuyazwa umu wikazi, Paulo wazana ukuti Aina Klistu yamwi yacili yataamanya ukuti Yeova waleka ukuomba na Masunde yakwe Mose. (Mili. 19:21) Nanti cakuti wamanyile ukuti nga waswilila uku Yelusalemu angaya umu uzanzo, citaalenzile ukuti atayako.
2 Iintazi ci ino Paulo amakwata umu Yelusalemu? Intazi yonga ino amakwata imafuma uku yalondezi yakwe Klistu, aasoka pa mulandu ni vya ufi vino yuvwa pali aliwe. Lyene intazi izingi nazyo, zimafuma uku yalwani yakwe Klistu. Yamamupeela imilandu ya ufi, kumuma, nu kumutiinya ukuti yamamukoma. Ivimacitika vimalenga Paulo akwate isyuko ilya kucingilila icumi. Aina Klistu ndakai yangasambililako ivingi kuli vino Paulo wali u muicefye, musipe, na vino wali nu utailo lino wakwatanga intazi zii. Lekini tulole vino tungasambililako.
“Yatandike Ukulumbanya Leza” (Mili. 21:18-20a)
3-5. (a) U kukomaana ci ukwali umu Yelusalemu kuno Paulo wazanyilweko, nupya i vyani vino yalanzyanyizye pa kukomaana uku? (b) A masambililo ci acindame yano tungasambililako uku kukomaana kuno Paulo wakweti na ya eluda amu Yelusalemu?
3 Uwanda uwalondelilepo lino Paulo na yano wali nayo yafisile umu Yelusalemu, yaile mukulola ya eluda aatungululanga umu cilongano. Ilyasi litalanda pa yatumwa ali mu Yelusalemu pa nsita yii, limwi pa nsita yii ala yonsi yapita umu kuombela umu vilongano ivyali umu ncende izipusanepusane. Lelo pa nsita yii, Yakobo umwina wakwe Yesu wali umu Yelusalemu. (Gala. 2:9) Yakobo afwile u watungulwile ukukomaana kuno “ya eluda yonsi” yakweti apali na Paulo.—Mili. 21:18.
4 Paulo walamwike ya eluda “nu kutandika ukuyalondolwela ivintu vino Leza wacisile uku yantu ya mu nko ukupitila umu mulimo uno waombanga.” (Mili. 21:19) Vino wayalondolwelile vyayakomelizye sana. Naswe kwene tukauvwa ningo sana ukuvwa vino umulimo wa kusimikila ukulunduluka umu mpanga zyuze.—Mapi. 25:25.
5 Apa nsita imwi, Paulo afwile walanzileko pa misangulo ino wafumile nayo uku Europe. Aakutikanga kuli vino Paulo walandanga yafwile yuvwile ningo sana pali vino aina amu mpanga zyuze yaisileko sana mano. Baibo ikalanda ukuti, lino yuvwile vino Paulo walanzile, “yatandike ukulumbanya Leza.” (Mili. 21:20a) Na ndakai kwene, Aina Klistu akazizimizya mazanzo nanti indwala izipisye yakakomeleziwa nu kwazwiwa kuli ya kapepa yauze.
Aingi Yatwalilila “Ukulondela Sana Masunde” (Mili. 21:20b, 21)
6. Iintazi ci ino Paulo wizile amanya?
6 Ya eluda yanenyile Paulo ukuti mu Yudeya mwakatwike intazi pa mulandu na malyasi aufi yano yalandanga pali aliwe. Yatiile: “Mwina witu, watulola Ayuda uwingi atiyataila nupya yonsi yakulondela sana Masunde. Lelo iyuvwa pali wewe ukuti ukusambilizya Ayuda yonsi aakaikala na antu amu nko ukuti yasangukila Masunde yakwe Mose, ukuyanena ukuti yataazembulula ana yao nanti ukulondela intambi.” a—Mili. 21:20b, 21.
7, 8. (a) I vyani vino Aina Klistu yamwi ali umu Yudeya yatamanyile ningo? (b) U mulandu ci uno vino Ayuda Aina Klistu yelenganyanga vitayelile usangu?
7 U mulandu ci uno Aina Klistu aingi yatwalilile ukulondela Masunde yakwe Mose nanti cakuti ala papita imyaka 20 ukufuma pano yateliile ukuomba? (Kolo. 2:14) Umu 49 C.E. lino atumwa na ya eluda yakomenkine umu Yelusalemu, yatumile kalata uku vilongano muno yalondolwile ukuti antu ataile aafumile umu nko yatalondekwanga ukulalondela isunde lya kuzembululwa alino na Masunde yakwe Mose. (Mili. 15:23-29) Lelo muli kalata, yatalumbwilemo Aina Klistu Ayuda nanti cakuti aingi yatamanyile ukuti Masunde yakwe Mose yata ukuomba.
8 Uzye vino Ayuda Aina Klistu yamwi yamanyile ukuti Masunde yakwe Mose yacili yakaomba, capiliulanga ukuti yatalinzile ukuya Aina Klistu? Awe foo. Nupya citapiliulanga ukuti pa nsita imwi yatazile iyapepapo ya leza yauze nu kuti pa nsita yii lyene yalondanga ukutwalilila ukulayapepa. Ayuda ataile yacindike sana Isunde ilya kutandikilako lino Yeova wayapeezile. Nupya umwi Isunde lilyo mutali ivili vyonsi ivyakumile imipasi nanti ukuti litali ningo. Nomba Isunde lilyo lyali umu upangano wa mpiti, lelo Aina Klistu yalondekwanga ukulalondela upangano upya. Fwandi apa nsita yii, ukulondela ivyali umu upangano wi Sunde kutalondekwanga umu kupepa kwa cumi. Aina Klistu Aebele ali acincile yatamanyile ukuti yatalinzile ukulalondela ivyali umu upangano wi Sunde pano pa nsita yii ala yaya umu upangano upya. Yalondekwanga ukusenuka muli vino yelenganyanga pakuti yapitila pamwi nu utunguluzi wakwe Leza. b—Yele. 31:31-34; Luka 22:20.
“Vino Yuvwile . . . Visi Vya Cumi” (Mili. 21:22-26)
9. I vyani vino Paulo wasambilizye ukulozya uku Masunde yakwe Mose?
9 Uzye vino antu yalandanga ukuti Paulo wasambilizyanga Ayuda ukuti “yataazembulula ana yao nanti ukulondela intambi” vyali i vya cumi? Paulo wali u mutumwa uku yantu ataali Ayuda, nupya wayanenyile ukuti antu ataali Ayuda yatalinzile ukulondela Isunde. Nupya wayanenyile nu kuti ndi cakuti antu ataali Ayuda ataile yakulondela Isunde lya kuzembululwa ala yakulondela Masunde yakwe Mose. (Gala. 5:1-7) Nupya Paulo wasimikilanga ilyasi lisuma uku Yayuda yano wazananga umu misumba ino watandalile. Afwile walondolwelile antu yamwi alondesyanga ukusambilila ukuti imfwa yakwe Yesu yalenga Masunde yakwe Mose ukuta ukuomba nu kuti tungaya alungami pa mulandu nu utailo asi pa mulandu nu kulondela Masunde.—Loma 2:28, 29; 3:21-26.
10. Uzye Paulo walangilile uli ukuti wisile sana mano uku yantu lino walandanga pa Masunde na pa kuzembululwa?
10 Nanti cali vivyo, Paulo walangilile ukuti wataika mano uku yantu aatemilwe ukucita intambi zimwi izya Yayuda, wakwe lutambi lwa kukanaomba pa wanda wi Sabata nanti ukukanalya ivyakulya vimwi. (Loma 14:1-6) Nupya atisile masunde ukulozya pi lyasi lya kuzembululwa. Pa mulandu wakuti antu aingi yamanyile ukuti isi wakwe Timoti wali u Muyuda, calenzile ukuti Paulo azembulule Timoti pakuti Ayuda yatamutwisika. (Mili. 16:3) Kutali umuntu uwali nu kupingwila umwi ndi cakuti alinzile ukuzembululwa nanti foo. Paulo wanenyile aina Galatiya ati: “Ukuzembululwa nanti ukukanazembululwa vitacindama, lelo icacindama uutailo ukatungululwa nu kutemwa.” (Gala. 5:6) Fwandi ndi cakuti umuntu umwi wapingulapo ukuzembululwa pa mulandu wa kulondela Masunde nanti ala akulola ukuti alino angaya umuomvi wakwe Leza, cali nu kulangilila sile ukuti umuntu wiyo atakweti utailo.
11. I vyani vino ya eluda yanenyile Paulo ukucita, nupya i vyani limwi vino wali nu kulondekwa ukucita pakuti aombe vino yamunenyile? (Lolini na futunoti.)
11 Fwandi, nanti cakuti vino Ayuda yuvwile pali Paulo vyali ivya ufi, yatwalilile ukuvwa uyi. Na cii calenzile ya eluda yanene Paulo ukuti: “Tukweti aonsi 4 atiyalapa umulapo. Senda aonsi yaa mukaisangulule kulingana nu lutambi nupya ukayalipilile ivikulondekwa, pakuti yapele inyele uku mitwe yao. Lyene yonsi yalamanya ukuti vino yuvwile pali wewe visi vya cumi, lelo yalamanya ukuti waya ni miyele isuma nupya ukalondela Masunde.” c—Mili. 21:23, 24.
12. Uzye Paulo walangilile uli ukuti atumililanga sile pali vino welenganyanga lino waswike ya eluda amu Yelusalemu pali vino yamunenyile kucita?
12 Limwi Paulo nga wakanyile nu kwelenganya ukuti intazi iyalipo asi pa mulandu na vino yuvwile pali aliwe, lelo a pa mulandu na vino Ayuda yatemilwe sana Masunde Yakwe Mose. Lelo waitemiilwe ukusenuka nu kulondela vyonsi vino ya eluda yamunenyile ukucita pa mulandu wakuti vitapusine na masunde yakwe Leza. Ku cisila, walemvile ati: “Kuli yano yakalondela masunde nizile inja wa muntu aakalondela masunde nanti cakuti nsilondela masunde, pakuti nazwe aakalondela masunde.” (1 Kol. 9:20) Pa nsita yii, Paulo walondiile vino ya eluda amu Yelusalemu yamunenyile pakuti alange ukuti ‘walondelanga masunde.’ Vino wacisile vikatulanga vino tulinzile ukulacita ndakai nu kulalondela utunguluzi wakwe ya eluda nu kukanacita sile vino sweineco tukulonda.—Aeb. 13:17.
Paulo waicefyanga ndi cakuti vimwi ivilingana na Malembo. Uzye namwe mukaicefya?
“Atalinzile Ukuya nu Umi!” (Mili. 21:27–22:30)
13. (a) U mulandu ci uno Ayuda yamwi ali umwi tempele yatandike kupunda? (b) Uzye Paulo wapuswike uli?
13 Ivyacitike api tempele vitazifile. Lino manda yayanga ya kupalamila akufikilizya vino yalavile, Ayuda afumile uku Ezia yapeezile Paulo umulandu wakuti wingizyanga antu ataali Ayuda umwi tempele, nupya yalenzile kuye icimvulunganya. Ndi cakuti umusilika mukalamba umwina Loma atalesya icimvulunganya, nga calenzile ukuti Paulo yamukome. Nanti cali vivyo, umusilika umwina Loma wizile wika Paulo umu cifungo. Ukufuma uwanda kwene uno yamwisile umu cifungo, pali nu kupita imyaka ukucila pali 4 pakuti Paulo aye umuntungwa nupya. Lelo asi kuti iviipe vyali nu kuta ukumucitikila. Lino umusilika uzizye Ayuda icalenzile ukuti yaleme Paulo, yatandike ukulanda imilandu ipusanepusane ala yakupunda. Na cii calenzile ukuti umusilika mukalamba afilwe ukuvwa nanti acimwi. Ivintu vyatazile sana icakuti yafumizye Paulo apa ncende iya nu kumutwala kuuze. Lino Paulo nu musilika yali apiipi nu kufika pa nkambi apayelile asilika, Paulo wanenyile umusilika ati: “Nkukulenga ukuti unzumilizye ukulanda uku yantu.” (Mili. 21:39) Umukalamba wa yasilika wazumilizye Paulo, nupya Paulo walanzile pa utailo wakwe ala watasipa.
14, 15. (a) I vyani vino Paulo walondolwelile Ayuda? (b) I vyani vino umukalamba wa yasilika aina Loma wacisile pakuti amanye umulandu uno Ayuda yasokiile?
14 Paulo watandikile ukulanda na mazwi akuti, “Uvwini vino nkulanda.” (Mili. 22:1) Paulo walanzile na antu umu Ciebele nupya cii calenzile ukuti yakutike kuli aliwe. Ukwaula nu kupita umu mbali wayalondolwelile umulandu uwalenzile aye umulondezi wakwe Klistu. Vino wacisile, vyalenzile alande ivisinka vino Ayuda yalondekwanga ukumanya. Paulo wasambiliziwe kuli Gamalieli nupya pa nsita imwi Paulo wacuzyanga alondezi yakwe Klistu wakwe vino antu aingi yamanyile. Lelo lino wayanga uku Damasika, waweni icilolwa muno waweni Klistu uwatuutulwilwe ukufuma uku yafwe nupya walanzile nawe. Antu ali pa lwendo na Paulo yaweni uluswepo nu kuvwa mazwi nomba yatalolanga uwavwanganga. (Mili. 9:7; 22:9) Pa mulandu wakuti Paulo wizile apafula pa cisila ca kulola icilolwa, yatandike ukumutungulula lino yayanga uku Damasika. Lino yafisile kuuku, ali kuno umonsi uwi zina lyakuti Ananiya uwamanyikwe sana umu mipepele ya Yayuda wapozizye Paulo.
15 Paulo watwalilile ukulanda ukuti lino waswilile uku Yelusalemu, Yesu walolekiile kuli aliwe umwi tempele. Pa nsita yii, Ayuda yasosile sana nupya yatandike ukupunda ala ya kulanda yakuti: “Mukomini, pano atalinzile ukuya nu umi!” (Mili. 22:22) Pakuti Paulo apusuke, umukalamba wa yasilika wamutwazile kuno yasungilanga asilika. Pa mulandu wakuti umusilika mukalamba walondanga ukumanya icalenzile ukuti Ayuda yasokele sana Paulo, wapekinye ukuti kuye ukumuzikisya. Cii calenzile ukuti Paulo akwate isyuko ilya kulanda pa nsambu zino wakweti nupya pa nsita kwene yii ali pano walanzile ukuti wali u mwina Loma. Na ndakai kwene, ya kapepa yakwe Yeova yakaomvya insambu zino yakwata pa kucingilila utailo wao. (Lolini kambokosi akakuti “ Isunde Lya Ina Loma na Ina Loma,” na kakuti “ Milandu ya Ndakai Ino ya Nte Yacimvya.”) Lino Paulo walanzile ukuti wali umwina Loma, umusilika mukalamba wilwike ukuti wali nu kuomvya inzila yuze pakuti amanyilepo ivyeo na vyuze. Lyene uwanda uwalondelilepo, watwazile Paulo uku cilye ca Sanihedilini, icilye icali icikalamba ica Yayuda.
“Nene Mufaliseo” (Mili. 23:1-10)
16, 17. (a) Londololini ivyacitike lino Paulo walandanga umu cilye ca Sanihedilini. (b) Uzye Paulo walangizye uli ukuti wali u muicefye lino yamumile?
16 Lino Paulo watandike ukulanda umu cilye ca Sanihedilini, walanzile ati: “Mwe inane, nemo naya na kampingu musanguluke kuli Leza ukufika na ndakai.” (Mili. 23:1) Atavuzizye ivya kulanda, pano ilyasi likalanda ukuti: “Lino Ananiya simapepo mukalamba uvwile vivyo, wanenyile aimi umupiipi na Paulo ukuti yamume pa kanwa.” (Mili. 23:2) Cali i ca muzewanya sana! Vino yacisile vyalangilile ukuti vino yamupingwile vyali i vya ufi pano walanga atatala wamala ukulanda ivisinka vyonsi. Ali mulandu uno Paulo waswike ati: “Leza amakuma we musomvi we. Uzye watuwikala papo ukuti umpingule ukulingana na Masunde lino wewe kwene ukutama Masunde pa kunena antu ukuti yangume?”—Mili. 23:3.
17 Yamwi aimilile apiipi na Paulo yasakamile sana, nomba asi kuti yasakamile pa mulandu na vino yamumile lelo a pa mulandu na vino wacisile lino yamumile. Lyene yalanzile ukuti: “Uzye ukutuka simapepo mukalamba wakwe Leza?” Muli vino Paulo waswike, wayalangilile umulandu uno cacindamila ukuya umuicefye alino nu kucindika Masunde. Waswike ati: “Mwe inane, ntali manyile ukuti a simapepo mukalamba. Pano calembwa ukuti, ‘Utalinzile ukupontela ya kateeka ya yantu yako.’” d (Mili. 23:4, 5; Kufu. 22:28) Paulo wizile asenuka muli vino watandike ukulanzyanya na antu. Pa mulandu wakuti wamanyile ukuti icilye ca Sanihedilini capanzilwe na Afaliseo alino na Asaduki, calenzile alande ukuti: “Inane, nene Mufaliseo, umwana wa Yafaliseo. Nkupingwilwa pa mulandu nu kupaalila mu kutuutululwa kwa yafwe.”—Mili. 23:6.
Wakwe vino Paulo wacitanga, tukaezya ukutandika ukulanzyanya na antu pa vintu vino yazumilamo ivyakolana na vino twazumilamo
18. U mulandu ci uno Paulo walandiile ukuti u Mufaliseo, nupya tungakolanya uli vino wacisile ndi cakuti tukweti intazi ikolineko?
18 U mulandu ci uno Paulo walandiile ukuti u Mufaliseo? A pa mulandu wakuti wali u “mwana wa Yafaliseo” ali umwi umba lyakwe ya simapepo. Fwandi aingi yamulolanga ukuti wali u Mufaliseo. e Nomba u mulandu ci uno Paulo walandiile ukuti wazumiile umu kutuutuluka wakwe vino na Afaliseo yazumiilemo? Afaliseo yazumiile ukuti umu muntu mwaya cimwi icisifwa umuntu nga wafwa nu kuti umuntu uwacitanga ivisuma wavyalilwanga umu muntu muze. Nomba Paulo wene atazumiile umu vizumilo vii. Wazumiile umu kutuutuluka kuno Yesu wasambilizye. (Yoa. 5:25-29) Nupya, Paulo ataazumile muli vino Afaliseo yazumile ukuti umu muntu mwaya cimwi icikasyala icipuma umuntu nga wafwa, nupya ataazumile na muli vino Asaduki yazumiile ukuti kutaya ukutuutuluka. Naswe kwene tungaomvya inzila ikolineko lino tukulanzyanya malyasi yamwi na ya Katolika nanti lino tukulanzyanya na ya Plotestanti. Tungayanena ukuti naswe kwene twazumila muli Leza. Limwi yene yazumila ukuti muli Leza wenga mwaya ya leza yatatu lino swemo twazumila muli Leza wenga, umwineco wakwe Baibo. Nomba cisinka icakuti, swensi kwene twazumila ukuti kwaya Leza.
19. U mulandu ci uno umu cilye ca Sanihedilini mwizile imuya icimvulunganya?
19 Vino Paulo walanzile umu cilye ca Sanihedilini vyalenzile antu yapaatukane. Ilyasi likalanda ukuti: “Kwakatwike sana icongo, nupya ya kalemba yamwi amwi umba lya Yafaliseo yakatwike nu kutandika ukupaazya sana ala yakuti: ‘Tutazanyile iciipe icili consi umu muntu wii, lelo ndi cakuti iciumbwa ca mupasi nanti malaika walanzile kuli aliwe—.’” (Mili. 23:9) Nanti sile icakuti malaika aliwe alanda na Asaduki nga yataamuvwilile pano yataazumile muli ya malaika. (Lolini kambokosi akakuti “ Asaduki na Afaliseo.”) Izile iyatandika ukupazyanya sana icakuti nupya kwene umusilika umukalamba wapuswisye umutumwa lino wamufumizyepo. (Mili. 23:10) Nanti cakuti umusilika wacisile vii, Paulo wali umu uzanzo. I vyani lyene ivyali nu kumucitikila? Tulasambilila umu cipande icilondelilepo.
a Kufwile kwali ivilongano ivingi ivyalonganilanga umu mang’anda ya yantu pa mulandu wakuti kwali Ayuda aina Klistu aingi.
b Pa cisila ca nsita imwi, umutumwa Paulo walembiile Aebele kalata muno wayalondolwelile vino upangano upya wali ucindame. Wayalondolwelile nu kuti upangano upya walenzile upangano wa mpiti ute ukuomba. Ukulunda pa visinka vino umutumwa Paulo walondolwelile Ayuda Aina Klistu amanyile ukuti Masunde yakwe Mose yata ukuomba, vyalenzile nu kuti utailo wa Ina Klistu yamwi ukomeleko.—Aeb. 8:7-13.
c Asambilila yakalanda ukuti limwi aonsi yaa yalafile umulapo wa Unazili. (Mpe. 6:1-21) Cisinka i cakuti, vino isunde lya Unazili lyali umu Masunde yakwe Mose, nalyo kwene lizile ilita ukuomba. Nomba nanti cali vivyo, Paulo afwile walanzile ukuti cali nu kuya sile ningo ndi cakuti aonsi yafikilizya imilapo ino yalafile kuli Yeova. Ali mulandu kwene uno citali nu kwipila ndi cakuti wayalipilila nu kwikala nayo. Tutaamanya ningo ivyalondekwanga pakuti umwi alape umulapo. Nomba asi mulandu na vino cayanga, tutanga tulande ukuti Paulo afwile watungilile vino aonsi yapeelanga malambo ya nyama (wakwe vino Anazili yacitanga) aelenganyanga ukuti malambo yayo yangalenga yaye asanguluke uku membu zyao. Ilambo lyakwe Klistu ilimalilike likalenga imembu zyonsi ukufutika. Tutamanya vyonsi pali vino wacisile, lelo tungasininkizya ukuti ataali nu kucita icili consi icali nu kulenga kampingu wakwe ukononeka.
d Yamwi yakalanda ukuti Paulo afwile atalolekesyanga, na cii calenzile ukuti afilwe ukumanya ukuti uwalandanga a simapepo mukalamba. Nanti limwi ukuti afwile walengiile ukufuma pano wafumiile umu Yelusalemu na cii calenzile ukuti afilwe ukumanya simapepo mukalamba umupya uwalipo. Nanti limwi a pa mulandu wakuti pali sana antu aingi i calenzile ukuti Paulo afilwe ukumanya umuntu uwalanzile ukuti yamume.
e Umu 49 C.E. lino atumwa na ya eluda yalanzyanyanga ndi cakuti antu aizile iyaya Ayuda yalondekwanga ukulondela Masunde yakwe Mose nanti foo, aina Klistu yamwi aliko pa nsita iya yamanyikwe ukuti yali “umwi umba lya Yafaliseo nupya aataile.” (Mili. 15:5) Alino antu ataile yamanyikwanga pa mulandu wakuti uku cisila yali Afaliseo.
