VYA KUTANDIKA UKULANZYANYA
SAMBILILO 5
Mwaya nu Mucinzi
Cisinte ci sunde: “Lekini amazwi inu yaye asuma.”—Kolo. 4:6.
Vino Paulo Wacisile
1. Tambini VIDYO, nanti belengini Milimo 17:22, 23. Alino mwasuke mauzyo alondelelapo:
-
Uzye Paulo umvwile uli lino waweni imipepele ya ufi ino yali mu Atena?—Loliniko Milimo 17:16.
-
Ukucila ukususya aina Atena, uzye Paulo waomvizye uli umucenjelo pa kusimikila ilyasi lisuma kuomvya vino yazumilemo?
I Vyani Vino Tukusambilila Kuli Vino Paulo Wacisile?
2. Ilingi antu yakatemwa ukukutika kuli vino tukulanda ndi cakuti tukusoolola ningo amazwi yano tumalanda, inzila ino tumayalandilamo, alino ni nsita ino tumayalanda.
Mwakolanya Paulo
3. Mwasoolola ningo amazwi. Wakwe, lino mukulanda ku muntu asi Umwina Klistu mungasenulako inzila ino mumaomvya pa kulanda pali Baibo nanti pali Yesu.
4. Mutalungika zuwa umuntu. Mwaleka wino mukusimikilako akwata untungwa wa kulanda vino akuyuvwa. Ndi cakuti walanda cimwi icipusineko na vino Baibo ikasambilizya, mwataluka ku vili vyonsi vingalenga mwapazyanya. (Yako. 1:19) Ndi cakuti tukukutikisya lino umwi akulanda, tulamanya vino wazumilamo ni calenga azumile mu vintu kwene vivyo.—Mapi. 20:5.
5. Mwazumilizya nu kutaizya wino mu kusimikilako ndi cakuti calinga ukucita vivyo. Limwi wino mu kusimikilako angalola ukuti vino wazumilamo ali vya cumi kucila vino yauze yazumilamo. Mwatandikilapo ukulanda pali vino mwensi mwazumilamo, alino lyene mumwazwe ukuvwikisya vino Baibo ikasambilizya.
LOLINIKO NA
Mapi. 25:15; 2 Tim. 2:23-26; 1 Pet. 3:15
