SUKULU LYAKWE YA KAKOSOOLA YA WENE Ya painiya yonsi aali ni myaka ya kuvyalwa ukutandikila pali 23 kufika pali 65, aakulonda ukulundulula umulimo wao uwa kusimikila, yakulaalikwa ukuti yakazanwe uku kukomaana kwakwe yaayo akulonda ukuya ukwi Sukulu Lyakwe ya Kakosoola ya Wene ukulayako pa Mulungu kasanya. Insita ni cifulo ukulayela ukukomaana kuu, yalamumanyisya.

APA KWIKALA Mukwai mwalangulukilako yauze. Mwaiusya ukuti, yano mufwile ukusungila apaakwikala a yaayo sile yano mwizile nayo, yano mukaikala nayo apa ng’anda, nanti yano mukasambilila nayo Baibo ndakai. Mukwai mutaika iviya apa ncende ino mutaakwikalapo.

IVIKUPONGA NU KWAKUVIZANA Ivintu vyonsi vino mwazana ivya eneco mufwile ukuvitwala ukwi ofesi lya Vikuponga nu Kwakuvizana. Ndi cakuti pali vino mwatimuponzya, muye ukwi ofesi kwene lii mukalole nga akuno vili. Ana yano mwazana iyaponga mufwile ukuyatwala ukwi ofesi lii. Lelo kwene, mutafwile ukulola iofesi lilyo ngati u kwakusungila ana. Mukwai mwasakamala ana inu, nupya mwaya nayo lyonsi.

KWAZWA ALWALE Mukwai mumanye ukuti iofesi lii likaombela sile pa ndwala na mazanzo IVIKAIZA MU KUPUMIKIZYA.

LUWATIZYO Vilimba apaakwikala yano yali pa kuwatiziwa yalavitantikila limwi pa nkoleelo ya ciimbili cakwe pulatifomu; nga cisi vivyo, ale yala-mumanyisya vino yapekinye. Yonsi aali pa kuwatiziwa yalinzile ukwikala apa vilimba vivyo lino ilyasi lya luwatizyo litatala lyatandika pa wanda wakwe ciili akatondo. Cila muntu alinzile ukwiza ni taulo alino ni vyakuzwala vya mucinzi pa kuya uku luwatizyo.

MISANGULO Kwaya impiya izikalondekwa pakuti tupekanye ningo apaakulonganila, iviombelo vya mazwi, ni vyakutambisizyako mavidyo, alino ni vintu vyuze ivingi ivya kwavwilizya ukuti tuipakizye ukongano, nu kupalama kuli Yeova. Imisangulo ino mukasangwilako mu kuitemelwa ikaavwilizya ku kupekanya ivintu vivyo alino nu ku mulimo wa mu nsi yonsi. Fwandi, nga mungatemwa ukuti musangwileko, itwika utumbokosi monsi sile tuno mungasumbilamo imisangulo inu. Tukataizya wakwe cimwi pa misangulo inu yonsi. Iumba Likatungulula likumutaizya sana pali vino mukalondesya ukutungilila ivya Wene.

MULIMO WA KUITEMELWA Ndi cakuti mungatemwa ukwazwilizyako umu milimo imwi apa ukongano uu, mukwai muye ku Dipatiment ya Vyeo nu Mulimo wa Kuitemelwa.

YA KAAZWA Cino ya kaazwa yaayelako, u kumwavwa. Mukwai mwalondela vino yakumunena, wakwe, kuno mufwile ukwimika ya motoka nanti majinga, kwakupitila antu, apaakwikala, alino na vyuze.