SAMBILILO 59
Alumendo 4 Auvwilile Yeova
Lino Nebukadineza wasenzile ya cilolo ya Yayuda uku Babiloni, wapeezile Asyipenazi umuomvi uwa kwi sano mulimo uwa kuyangalila. Nebukadineza waneenyile Asyipenazi kuti asoole alumendo Aina Izlaeli aali nu umi usuma sana nupya alolekanga ningo. Alumendo yayo yali nu kusambiliziwa pa myaka itatu. Kusambiliziwa kuu kwali nu kuyalenga yaye aomvi asuma sana umu Babiloni. Alumendo yaa yali nu kusambilila ukubelenga, kulemba, nu kulanda ululimi luno Aina Babiloni yaomvyanga. Nupya yaalinzile ukulalya ivyakulya vino umwene na aomvi ya kwi sano yalyanga. Alumendo yayo yali a Danieli, Hananiya, Misyaeli, na Azaliya. Asyipenazi wayapeeezile mazina yauze aa Aina Babiloni aakuti: Belitesyazali, Syadilaki, Mesyaki, na Abedinego. Uzye masambililo yaa yali nu kulenga yate ukuombela Yeova?
Alumendo yaa 4 yalondesyanga ukuvwila Yeova. Yaamanyile ukuti yataalinzile ukulyako ivyakulya ivya mwene pano Masunde Yakwe Yeova yaalanzile ukuti vimwi pa vyakulya vii vyali vikowele. Fwandi yaneenyile Asyipenazi ati: ‘Twapaapata utaatupeelako ivyakulya ivya mwene.’ Asyipenazi wayaneenyile ati: ‘Ndi cakuti mutakulyako nupya umwene walola ukuti mukuloleka ukulwala, alankoma.’
Danieli wamanyile ivyakucita. Waneenyile uwayapeelanga ivyakulya ati: ‘Twapaapata uwatupeela sile ivilimwa na manzi pa manda 10. Lyene pa cisila ukatulinganye na alumendo aakalya ivyakulya ivya mwene.’ Uwayasakamalanga wazumile.
Pa cisila icakulya ivilimwa pa manda 10, Danieli na auze yatatu yalolike ningo sana ukucila alumendo asyala. Yeova watemilwe pali vino yasoolwilepo ukumuvwila. Wapeezile Danieli amano aakumanya umwalozile ivilolwa ni viloto.
Asyipenazi watwazile alumendo yaa kuli Nebukadineza lino wamazile ukuyasambilizya. Lino umwene walanzile nayo, waweni ukuti Danieli, Hananiya, Misyaeli, na Azaliya yali acenjele sana ukucila alumendo asyala. Acino wasoolwile alumendo yaa kuti yaombela ukwi isano lyakwe. Ilingi umwene waneenanga alumendo yaa kuti yamupandeko amano pa vintu vicindame. Yeova walenzile ukuti alumendo yaa yaye sana na mano ukucila yonsi aakweti amano na yayo aomvyanga ivya malele aombelanga umwene.
Nanti icakuti Danieli, Hananiya, Misyaeli, na Azaliya yali uku mpanga yuze, yatiilile ukuti yaali aomvi yakwe Yeova. Uzye nawe kwene, ulatwalilila ukuvwiila Yeova na lino usi na avyazi yako?
“Utaleka ali wensi akusuule pa mulandu wakuti wewe mwance. Lelo, uye icilangililo cisuma kuli yano yataila, umu milandile, mu vicitwa, mu kutemwa, mu utailo, nu mu kusanguluka.”—1 Timoti 4:12
Limwi Mungatemwa Ukulolako na Vii
VINO MUNGASAMBILILA UKU MALYASI YA MULI BAIBO
Yaakanyile Ukufukamila Icilubi
Syadilaki, Mesyaki, na Abedinego yakanyile ukupepa icilubi cakwe goldi cino umwene wa ku Babiloni wapanzile.
VINO MUNGASAMBILILA UKU MALYASI YA MULI BAIBO
Danieli Ali mu Ciwina Cakwe ya Cisama
Wapepa kuli Yeova cila wanda wakwe vino Danieli wacitanga!
