Atumwa yuvwilile isunde lino Yesu wayapeezile ilya kusimikila ilyasi lisuma umu nsi yonsi. Umu 47 C.E., aina aa mu Antioki yatumile Paulo na Banaba ukuya umukusimikila. Ya kasimikila yaa yaili acincile yasimikiile mu citungu consi ica Asia Minor, yafisile nu ku Debe, ku Lisitila nu ku Ikoniya.

Paulo na Banaba yasimikilanga uku yantu yonsi, kuli kuti uku yakankala nanti ku yapiina, ku yance nanti ku ikolo. Antu aingi yuvwile icumi pali Klistu. Lino Paulo na Banaba yasimikilanga kuli Salegio Paulu mulasi wa mu Kupulo, kacita wa maleele umwi wezizye ukuyalesya. Paulo wanenyile kacita wa melele wiya ati: ‘Yeova alakufulula.’ Papo kwene sile kacita wa malele wapafwile. Lino Paulu Mulasi, waweni vivyo wizile ataila.

Paulo na Banaba yasimikilanga konsi sile, uku ng’anda ni ng’anda, mu mamaliketi, mu miseo, nu mu masunagogi. Lino yapozizye umulemale uku Lisitila, antu yelenginye ukuti Paulo na Banaba aa leza nupya yalondanga ukuyapepa. Paulo na Banaba yayalesizye, nu kuyanena iyati: ‘Mwapepa sile Leza! Pano swemo sweswe yantu sile.’ Lyene Ayuda yamwi izile nu kutunka antu kuti yasangukile Paulo. Antu yayo yatamile Paulo na mawe, nu kumufumizya ukunzi ya musumba pano yelenganyanga ukuti watafwa. Nomba Paulo ataafwile. Papo kwene sile, aina izile iyamusenda iyamuswilizya nu mu musumba. Pa cisila Paulo waswilile uku Antioki.

Mu 49 C.E., Paulo watandike ulwendo na luze. Lino waswilile umu kulola aina uku Asia Minor, waile aomba sana mulimo wa kusimikila uku Yulopu. Waile nu ku Atena, ku Efeso, ku Filipi, ku  Tesalonika, nu ku ncende zyuze. Lino Paulo wali pa lwendo luu, Sailasi, Luka nu monsi uwacance uwi zina lyakuti Timoti yamulondiile. Yaombiile pamwi ukupanga ivilongano nu kwazwa antu aalimo ukulunduluka. Paulo wikazile umu Kolinto pa mwaka onga na afu, ala akukomelezya aina. Wasimikilanga, kusambilizya, nu kulemba makalata uku vilongano. Nupya waombanga nu mulimo wa kupanga matenti. Pa cisila, Paulo waswilile uku Antioki.

Mu 52 C.E., Paulo watandike ulwendo lwakwe citatu luno watandikile umu Asia Minor. Waile apita uku Filipi aya afika nu ku Kolinto. Paulo wikazile iimyaka ingi mu Efeso, ala akusambilizya, kupozya alwale, nu kwazwa aa mu cilongano. Nupya cila wanda walandanga malyasi ku yantu aingi mu cikuulwa ca pi sukulu. Antu aingi yuvwile nu kusenuka. Lyene pa cisila ica kusimikila ilyasi lisuma umu mpanga izingi, Paulo waswilile uku Yelusalemu.